චතුරගේ මතක අහුර....

ධාර්මිකයා....

2011-09-03T03:47:00.000+05:30

පින්තූරය මෙතනින්

මම ධර්මය උගනිමි
මම ධාර්මික මඟ ගෙන ඇතිමි
මම එම මඟම යන්නෙමි
මම හඬ නඟා කියමි ,මා දැහැමියෙක්මි
මම ධාර්මික මඟ ගෙන ඇතිමි
ඔබ ධර්මය දනිත්ද..?

අසරණ දෑසකින් කරන
අසරණ ආයාචනයකට පිහිට වන්නට
අසරණ සිතක් සනසන්නට
සාගිනි ඇවිලුනුව ඒ නිවා ගනු නොහැකිව
සාගින්නේ මියෙනු දැක
ඒ වලකනුව සිත් නොදී
ලොව මේ දේ පිළි ගනියි
මමත් ඒ දේ කරමි
ලොව මේ අත ගමන් කරයි
මමද ඒ මඟ ගනිමි
මේ දේ මේ ලෙසින් නොම වූ කලට
ලෝ දනා අතර මා සුවිශේෂ වනු කෙලෙස
කියා සිතන ඔබ
අවසන රැවටුවේ කවුද..?
ඔබමද ලෝ දනද..?

මේ ඔබ උගත් ධර්මයද
ඔබ සැබවින්ම දැහැමිද
වදනකට පමණක්
ධාර්මික භාවයක්
කුමට ඒ දැහැමි බව
රවටනු පිණිස අන් අයම
ලෝ පරකාස වන ඔබේ දැහැමි බව
ගෙන දුනිද ඔබ යහමඟ
හැරම තව පාපයක්

දුකකි ඒ මා සිතට
ලොවට පෙනුමට පිනට ලැදි ලෙස
ලොව රැවටුමට ගිය ඔබට
වී ඇති විපතක මහත..

චතුර....

ඔබේ ආලය....

2011-08-26T21:32:00.000+05:30

පින්තුරය මෙතනින්..

සිත් රිදුමට

කරනට හැකි සියළුම දේ කර

මුකුත්ම නොවුන විදියට

මුකුත්ම නොකිව් විලසට

නැවත ආදරෙයි කියා

නැවත තොඳොල් බස් දොඩන

ඔබ

ඔබගේ ආදරය

එක් එක් වේලාවට

එක් එක් වර්ණයන්ගෙන් සැරසී

වර්ණයෙන් මත්ව රඟන

වර්ණයෙන් ලොව රවටන

කටුස්සෙකුගේ

හැසිරීමෙන් වෙනස් නොවනවා යයි

කෙලෙසක නොපවසා සිටිම්ද..?

මම..

චතුර....

අනේ මංදා සිරිසේන - 02

2011-08-26T03:33:00.000+05:30

පින්තූරය මෙතනින්

අනේ මංදා සිරිසේන - 01 කියවලා නැත්නම් ගිහින් කියවලා එන්න.

මේත් මට 1 වෙනි ආයතනයෙදි හම්බ වුන මිත්‍රයන් ගෙන් කෙනෙක්. හොඳ මිත්‍රයන් රාශියක් අතර හිටපු මෙයාට එක නරක පුරුද්දක් තිබුනා, ඒ තමයි සිංහලෙන් කියනවා නම් 1000 ටෝක්ස් දෙන එක.මෙයාගේ පුරුද්දක් තිබුනා එක එක දේවල් කියන එක. ඉතින් යාළුවන්ගෙන් ගොඩාක් දෙනෙක් කළේ වට වෙලා සමහර වෙලාවට මෙව්ව අහගෙන ඉන්න එක. අනිත් එවුන් කළේ මෙයත් එක්ක කතා කලොත් අපිට ගම රට අතැරලා කුරුඳු වත්තට එන්න වෙයි කියලා කතා කරන එක නවත්තපු එක.තවත් සමහරු කරන්න වෙන දෙයක් ඇත්තෙම නැත්තන් ඔය කතා අහන්න පුරුදු වුනා.තවත් සමහරු ඔව්වා අහන් ඉඳලා ඒ විදියට කියන්න කරන්න පුරුදු වුනා, ඒ කියන්නේ ලොකු ලොකු වැඩ තමයි තවත් සමහරු ඉතින් ඔව්ව් අහන්න ගියෙත් නෑ ඇහුනත් ඒවා ගානකට ගන්නේ නැතුව තමන්ට පුළුවන් විදියට තමන්ගේ කටයුතු කරගෙන හිටියා.
මේ කියන යාළුවට හැදිලා තිබුණ රෝගය එසේ මෙසේ එකක් නෙවෙයි , ඒ කියන්නේ මෙයා කියන්නේ කරන්නේ මේ වගේ දේවල්

දවසක් මම මෙයා යාළුවෝ වට කරගෙන කතා කරන තැනක ඉඳන් අහගෙන හිටියා,
මෙන්න මෙයා ඒ වෙලාවේ කතාව කියන් ගියේ මෙහෙමයි..

යහළුවා : මචං මම අහවල් ආයත්නේට මේ මේ මේක ඉගෙන ගන්න යනවනේ..
යාළුවෝ : අපි නම් ඔය කියන තැන දැකලත් නෑ බන්, එතන හෙන ගානක් ගන්නවලු නේද බං,
යහළුවා : ඔව් බන් ඒත් හොඳයි, අපේ තාත්තටයි අම්මටයි ඕවාට පේ කරන එක සිම්පල් නේ බං,මොකටද සල්ලිත් තියාගෙන භාගෙට ඉගෙන ගන්නේ , ඒකයි මමත් ඕකට යන්නේ..
යහලුවෝ : ඔව් බන් ඒකත් ඇත්ත තමයි. අපිට ඉතින් ඉරිදට සෙනසුරාදට ඔව්වට එන්න සල්ලිත් නෑ බං ,ගෙවලා ආවත් සෙනසුරාදා ඉරිදත් පැය තුන ගානේ එන්නයි යන්නයි බස් එකට වෙලාව අපරාදෙන බං, එතකොට වෙන වැඩක්කර ගන්න හැටියක් නැහැනේ. (මේ කියපු යහළුවා දුර බැහැර පෙදෙසක සිට කොළඹට ළඟා වන්නෙකි )
යහළුවා : මට නම් ඉතින් ප්‍රශ්නයක් නෑනේ බන්, වීක් ඩේස් වලට අම්මයි තාත්තයි දෙන්නම වැඩට ගියාට වීකෙන්ඩ් එකට අම්ම ගෙදරනේ බං අම්මගේ කා එක මට දෙනවා , අහවල් ආයතනයේ පාක් එකේ දා ගත්තැකි බං,
යහලුවෝ : ඇයි බන් උඹ අම්මලාට කියන්නේ නැත්තේ උඹට හැමදාම එන්න කා එකක් අරන් දෙන්න කියලා , එතකොට අපිටත් රවුමක් ගියෑකිනේ බං..?
යහළුවා : අම්මලා කැමති නෑ මචං ඒකට, අනික මෙතන පාරේ අයිනෙනේ දාන්න වෙන්නේ , ලෙක්චරර්ස්ලට පාක් එකේ ඉඩ දුන්නට ස්ටූඩන්ට්ස්ලාට පාක් එකේ වෙහිකල් දාන්න දෙන්නේ නැහැනේ
යහළුවෝ : ඔව් නේ..

මොහුට ඉංග්‍රීසි භාෂාව හැසිරවීමට හොඳට හැකියාවක් ඇත.නමුත් ඔහු සිංහල කතා කරන්නේද ඉංග්‍රීසි උච්චාරණය දමා ගොඩ සුද්දෙක් මෙන්ය. "දිනක් තවෙකෙක් උඹට කඩ්ඩ ඔච්චර හොඳට පුළුවන් උනේ කොහොමද බං..?
උඹ කොහෙද පංති ගියේ..?"
ඔහු : "මහ ලොකු පන්ති ගියේ නෑ බං අපේ අම්මයි තාත්තයි විතරක් නෙවෙයි සීයයි ආච්චියිත් ගෙදර සිංහල කතා කරන්නේ නෑනේ.. ඒකයි"

තවත් දිනෙක ඔහු මිතුරන් සමඟ
ඔහු : මචං අපේ අයියා එන මාසේ රට ඉඳන් එනවනේ
යහළුවෝ : උඹට මොනවද ගේන්නේ?
ඔහු : මම නම් කිව්වෙ මොනවත් ගේන්න එපා කියලා ඒත් අයියා අම්මලාට කියලා තිබුනා ලැප් එකකුයි අළුත් කැම් එකකුයි ගේනවා කියලා
යහළුවෝ : ෂා මරුනේ

දිනක් මම ඔහු සමඟ ව්‍යාපෘතියක වැඩ කටයුත්තක නියැලී සිටියෙමි. ඔහුට දුරකතන ඇමතුමකි
මෙසේ පිළිතුරු දෙයි..
ආ ඇඳපු ඇඳුම් ටික තියෙන්නේ අල්මාරිය උඩ..
එය නිම වූ පසු ඔහු :
මචං මේ අම්මා ඇඳුම් ටික වොශිං මැශින් එකට දාන්න හොයනවා බං මට ඕකට ඒ ටික දාන්නවත් වෙලාවක් හම්බ වුනේ නෑ බන් මේ දවස් ටිකේ..
මම : එකනේ නේද වෙලාවක් නැහැනේ..

පසුගිය දින කිහිපයක පටන් ඔහු දේශන වලට සහභාගී නොවූ නිසාවෙන් සහ ඔහුගේ ජංගම දුරකථනයට දින කිහිපයක පටන් ඇමතුමක් ලබා ගත නොහැකි වූ නිසාවෙන් මිතුරෙකු ඔහුගේ නිවසට දුරකථන ඇමතුමක් දුන්නේය. දුරකථනයට පිළිතුරු දුන් ඔහුගේ සොහොයුරිය පවසා තිබෙන්නේ අප මිතුරාට සහ ඔහුගේ පියාට ඩෙංගු උණ සෑදීම නිසා රෝහල් ගතකර ඇති බවය.

රෝහලට යාමට අවසර ලැබෙන්නේ දෙදෙනෙකුට පමණක් නිසා අප කිහිප දෙනෙකු ඔහුගේ නිවසට ගොස් ඔවුන්ගේ පවුලේ සාමාජිකයන්ගෙන් සුවදුක් විමසීමට තීරණය කළෙමු. දුරකථන ඇමතුමකින් අසා ගත් පරිදි අප ඔහුගේ නිවසට ළඟා වීමු. නිවෙස පිහිටා තිබුනේ මහා මාර්ගයෙන් මඳක් ඔබ්බට වන්නටය. නිවෙස අසලට ගිය මිතුරන් ගේට්ටුවෙන් ඇතුල් වීමට පෙර එක් මිතුරෙක් "කියලා තියෙන විදියට නම් ගේ මේක වෙන්න බෑ "යයිකීවේය. "කමක් නෑ අපි අහලා බලමුකෝ "කියා තවෙකෙක් කී නිසාවෙන් ගේට්ටුවෙන් ඇතුළු වූ ඔහු ගෙදර සීනුව නාද කළේය . නමුත් කිසිම ප්‍රතිචාරයක් නැත. ඉන්පසුව ගෙදර කවුද..? කියා කිහිප විටක් ඇමතූ පසු කාන්තාවක් මෙහෙන් එන්න මම වැඩක් යයි කියනු ඇසුනෙන් අපි නිවසේ පිටිපසට ගියෙමු.

කාන්තාවක් කරාමයක් අසල රෙදි සෝදමින් සිටියාය. "ඇන්ටි මේ ____ ගේ ගෙදරද..?""ආ .. ඔව් පුතා, ඔය ගොල්ලොද ඊයේ කතා කළේ" ඇසුවාය. "ඔව් අපි තමයි ඇන්ටි කතා කළේ , දැන් __ටයි තාත්තටයි කොහොමද..?""ටිකට් කපන්න තව දවස් තුනක් වත් යයි පුතේ , මේ දවස් ටිකේම ඒ දෙන්න ළඟ හිටියේ __ගේ අයියා තමයි, වැඩට යන්නෙත් නැතුව මත් මේ උදෙඋටයි දවල්ටයි උයලා පිහලා දීල දුව අතේ තමයි කෑම බීම ඇරියෙත් පුතේ මම ගියොත් රෙදි ටිකවත් හෝදන්න කෙනෙක් නැහැනේ.. " "කරදර පිට කරදර පුතේ , __ගේ අයියත් ආපහු එන්න වුනේ වැඩ කරපු තැන වහලා දාපු හින්ඳනේ, තාම එයැයිටත් මෙහෙ වැඩ කරපු තැනට ආපහු යන්න බැරි වුනා." "කරදර ආවම ඔහොම තමයි ඇන්ටි අපිටත් තියෙන දෙයක් කියන්නකෝ ආව එකේ අපිත් මොනවහරි කරලා දෙන්නම්.." "අනේ ඔය ළමයින්ට එහෙම කියන්න පුළුවන්ද යංකෝ ගෙට .."
නිවසේ ඉදිරිපස දොර විවෘත කළ ඇය අපට නිවසට ආරධනා කළාය. "මම පුතාලට තේ ටිකක් හදන්නම්කෝ ", "කමක් නෑ ඇන්ටි එපා ", "මට කරදරයක් නෑ දරුවෝ ඉන්න මම හදලා දෙන්නම්". අප මිතුරාගේ මව නම් ඔහු මෙන් නොවේ , ඉතා කාරුණික නිහතමානී තැනැත්තියක් වූවාය.

"යකෝ මූ කිව්වට ගෙදර කාර් එකක් තියා අර ගේට්ටුවෙන් කාර් එකක් ඇතුලට ගන්නත් බෑනේ" එක් මිතුරෙක්
"ගෙදර රෙදි හෝදන්නේත් අම්මනේ "තවෙකෙක් "ඉතින් බං ඔය අපේ අම්මලත් හෝදලා දෙන්නේ ඕක අරුමයක්ද..?""නෑ බං අරූ කිව්ව එව්වා උඹට මතක නැද්ද"
"උඹ ආවේ ආදයම් මනින්නද..? , ලෙඩ්ඩු බලන්නද..?, ලෙඩ්ඩු බලන්න ආවා නම් කට වහගෙන හිටපන්.."මම හා තවෙකෙක් කීවෙන් ඔවුන් ඉන්පසු කුමක් වත් කීවේ නැත.
අවසානයේ අපි ගෙන ගිය දෑද දී තවත් දවසක ඔවුන් නිවෙසට කැඳවාගෙන ආපසු යන අරමුණ සිතැතිව ආපසු පැමිණියෙමු.

නමුත් ආපසු ඔහු දේශන කරා පැමිණෙන තෙක් අපට ඔහුගේ සුවදුක් විමසීමට යාමට නොහැකි විය. ඉන් පසු කිසි දිනෙක අප් මිතුරන් කිසිවෙක් ඔහුගෙන් පරණ කිසිවක් විමසීමටද ගියේ නැත. නොගියවුන් හට එය කීවේද නැත. ඉන් සෑහෙන කලක් යනතුරුම ඔහු මිතුරන් මඟ හරිමින් තමන්ගේ ලජ්ජාව වසා ගැනීමට උත්සාහ කරනු පෙනිනි. නමුත් කිසිවෙක් කිසිවක් නොකී නිසා ඔහු සාමාන්‍ය ලෙස මිතුරන් අතරට එක් විය , නමුත් කෙදිනකවත් ඔහු ඉන් පසුව පෙර දී මෙන් තමන් ගැන කීමට උත්සාහ නොදැරීය.

තමන් ගැන අනවශ්‍ය පමණට බොරු කීමෙන් සහ අතන් ගැන අනුන්ට බොරු කීමෙන් රැවටෙන්නේ සහ අපහසුතාවයට පත්වන්නට සිදුවන්නේද තමන්ට යයි සිතා වැඩ කටයුතු කරනවා නම් මෙවන් තත්ව ඇති වන්නේ නැත. තමන්ට නැති දෙයක් තියෙනවා කීමට තරම් හීන මානසිකත්වයක් ඇති කර ගැන්ම වෙනුවට තමන්ට ඇති දේ ගැන කීමෙන් තමන්ට සැබෑ ලෙස හිතවත් මිතුරන් පිරිසක් ඔබටත් ඇති කර ගත හැකි වේවි. තමන්ට නැති දේ පවසා ඇති කර ගන්න මිතුරන් තමන්ටෑක් වන්නේ තමන්ගේ අදහස් වලට සහ තමන්ට ඇති හිතෛෂී බව නිසා නොව තමන් ඒ පැවසූ තමන්ට නැති දේ නිසාය. එවන් මිතුරන් කිසි විටෙකත් ඔබට ඒ දේ නැතැයි කියා දැනගත් විට ඔබ සමඟ රැඳෙන්නේ නැත.හොඳම දේ තමන් තමන් වීමය.
මෙය සටහන් කිරීමේ අරමුණ ඔහුව උපහාසයට ලක් කිරීම නොව ඔහුට සිදු වුන දෙයින් තවෙකෙකුට එය සිදු වනු වලකනු පිණිස බව කරුණාවෙන් සලකන්න..

චතුර....

දියමන්ති මාලය....

2011-08-24T09:03:00.003+05:30

ඔබේ දෑතින් අල්ලන් මා එක්කන් යන්නම් ආයේ
ඔබේ දෑසින් කඳුළැල් නම් ගිලිහෙන්නේ නෑ ආයේ
සුදු දියමන්ති මාලේ ඔබේ හෙලෙහි රඳවාලා
ගෙන යන්නම් ඔරුවේ මා මේ සීත රෑ යාමේ

ඔබේ දෑතින් අල්ලන් මා දිවගෙන යන්නම් ආයේ
මගේ දෑසින් කඳුළැල් නම් ගිලිහෙන්නේ නෑ ආයේ
ඒ ඔරුවේ නැඟ ඔබ හා උණුසුම් තුරුලේ හැංගීලා
සැනසුම් සුසුමන් අල්ලනම් මා මේ සීත රෑ යාමේ

මුදු මීදුමෙන් පිරි කඳු යායේ
ඔබ හා කිවූ ගී මතකයි ..මතකයි.. මට
ඇවිදින් යනකොට ගිම්හානේ
ඔබ හා කිවු ගී මතකයි
සීත පවනැල් දසතින් හඹා එද්දී
ඔබගේ සිරුරේ දැවටිච්චී
මට සිහියට එන්නේ ඒ කාලේ
ඔබ මාහා සුරතල් වෙච්චි..

පින්තූරය මෙතනින්

ඔබේ දෑතින් අල්ලන් මා එක්කන් යන්නම් ආයේ
ඔබේ දෑසින් කඳුළැල් නම් ගිලිහෙන්නේ නෑ ආයේ
ඒ ඔරුවේ නැඟ ඔබ හා උණුසුම් තුරුලේ හැංගීලා
සැනසුම් සුසුමන් අල්ලනම් මා මේ සීත රෑ යාමේ
ගෙන යන්නම් ඔරුවේ මා මේ සීත රෑ යාමේ

MP3 ය මෙතනින්....

සන්ජය බණ්ඩාර....

ඔබේ දෑතින් අල්ලන් මා දිවගෙන ගිය ඒ කාලේ
ඔබේ සුසුමේ දැවටුනු ඒ සෙනෙහේ විඳි කාලේ
අමතක කරනෙමි මා මේ සීත රෑ යාමේ
දෑසට කඳුලැල් නැං වූවත් තනිකම සොඳුරුයි සැමදා මාහට..

චතුර....

අනේ මංදා සිරිසේන - 01

2011-08-21T05:38:00.000+05:30

පින්තූරය මෙතනින්..

මේක මගේ පුද්ගලික අත්දැකීම් කිහිපයක් එකතු කරලා ලියන්න හිතුන දෙයක්

කතාවේ මුල කොටසට ආයතන තුනක් සම්බන්ධයි නම සඳහන් කරන්න අකමැති නිසා ඒ ආයතන තුන මේ විදියට හඳුන්වන්නම්.

1. ආයතනය : මෙය රජයේ අනුමත විශ්ව විද්‍යාලයක්. දක්ෂ සිසුන් බිහි කරන ආයතනයක්.
2. ආයතනය : මෙය රජයේ විශ්ව විද්‍යාලයක් ලෙස පිළි නොගත්තත් මෙහි උපාධි පාඨමාලාව රජයේ අනුමතයි. තවත් දක්ෂ සිසුන් බිහි කරන ආයතනයක්.
3. ආයතනය : මෙය ලංකාවේ පුද්ගලික විශ්ව විද්‍යාලයක් මෙයද විවිධ ආකාරයේ දක්ෂ සිසුන් බිහි කරන ආයතනයකි..

පළවෙනි කතාව : මම දවසක් එක් ආයතනයක විශින් ශිෂ්‍යයන් සඳහා වූ වැඩමුළුවකට සහභාගී වීමට ගියෙමි. ඔන්න ඉතින් මේ වැඩමුළුවටත් විවිධ ආයතන වල සේවය කරන අය විවිධ විශ්ව විද්‍යාල වල ශිෂ්‍යයන් පෙර කී ආයතන තුනේ ශිෂ්‍යයන් පැමිණ තිබිනි.මමත් වාඩි වූ තැන අසල සිටියේ 1 ආයතනයෙන් පැමිණි ශිෂ්‍යයෙකි .මම වාඩි වී ටිකක් වෙලා යන විට ඔහු
ඔහු: මචං උඹ මොකේද බං..?
මම 3 වෙනි ආයතනේ ඉගෙන ගන්නේ බං. (3 වෙනි ආයතනය ගැන කීවද මම 1 වෙනි හා 2 වෙනි ආයතනයන්හිද ශිෂ්‍යයෙක්මි.. )
ඔහු : මචං ඕකේ ඩිග්‍රිය පිළි ගන්නවද බං..?
මම : මම දන්නේ නෑ බං (වෙන මොනවා කියන්නද ?)
ඔහු : නෑ මචන් මෙහෙමනේ අර මේ අයතනය මේ මේ ආයතන (නාමාවලියක්ම කීවේය ) වැඩක් නැහැනේ අර ආණ්ඩුවේ අහවල් ආයතනයේ ලැයිස්තුවේ නැහැනේ( ඔය ආයතන නාමාවලියට තුන්වන ආයතනයත් අයත් විය )
මම : ඔව් බන් ඔව් ඔව්..
ඔහු : එතකොට බං , 1 වෙනි ආයතනේ ඒ කියන්නේ මම ඉගෙන ගන්න එක ඒ ලැයිස්තුවේ තියෙනවනේ (ආඩම්බර ලීලාවෙන් ),
මම : ආ.. ඔව් ඔව් වෙන්න ඇති නේ..?
ඔහු: වෙන්න ඇති නෙවෙයි බන් එහෙම තමා, එතකොට ඔය දෙවෙනි ආයතනය තියෙනවා නේද මචන්..? , ඒක අර ආයතන ලැයිස්තුවේ නෑ, නමුත් ඒකේ පාඨමාලාව අර රජයයේ අහවල් ආයතනේ අනුමතයිනේ බන්..
මම : හ්ම්ම්ම්ම් මම දැනගෙන හිටියේ නැහැනේ බං
ඔහු ඊට පස්සෙත් දේශනය පටන් ගන්නා තුරු මචන් මේ අරකේ , එතකොට මේකේ අර මේ..බ්ලා බ්ලා බ්ලා බ්ලා....

දේශනයට 1 හා 2 ආයතනයේ උගන්වන දේශක මහතුන් දෙදෙනෙකුද පැමිණ සිටියෝය. 1 ආයතනයේ දේශක මහතා පෙන්වා අර මිතුරා , අර අපේ සර් කෙනෙක් බං,

වැඩමුළුව අතර මඟදී ඒ දේශක මහත් මා ළඟට පැමිණ
ඔය ළමයා අර අහවල් ආයතනේ අහවල් බැච් එකේ නේද..?
මම: ඔව් සර්
දැක්කහම කතා කරන්නවත් එන්න එපා උගන්නපු සර් කෙනෙක් කියලා..
මම නෑ සර් මම යන්න ලෑස්ති වෙලා සර්ට කතා කරන්න හිටියේ..
හා හා ඒකට කමක් නෑ දැන් ඔය ළමයා මොනවද කරන්නේ..?
සර් මම මේ බ්ලා බ්ලා බ්ලා (විස්තරය )
හොඳයි හොඳයි..
2 ආයතනයේ දේශකතුමාද මා අසලට "පැමිණ ආ චතුර දැන් කීවෙනි අවුරුද්දද..? "
මම: සර් දැන් මේ බ්ලා බ්ලා බ්ලා විස්තරය..
ඉන්පසුව මා මිත්‍රයා එක්වරක්වත් මාදෙස හැරී බැලුවේ නැත, යනතුරු කතා කළේද නැත. නමුත් ඉතින් ඔහු කෙරේ තරහවක් නොවූ හෙයින් ආපසු එන්නට සූදානම් වී මචන් අපි එහෙනම් වාෂ්ප වුනා , තවත් මේවගේ එකකදි හම්බ වෙන්නේ නැතෑ නේද..?
මා දෙස අපහසුවෙන් බැලූ ඔහු අපහසුවෙන් "ඔව් මචන් හම්බ වෙයිනේ" කියා යන්නට ගියේය .

අනේ මංදා සිරිසේන මේවා අහලා පණ යනවලු කියා මට සිතුනි... අවශ්‍ය දේත් අනවශ්‍ය දේත් හෙලා දකින්නට යනවාට හොඳ පාඩම්ය, විවිධ ආයතන ගණනාවකම මිතුරන් ඇති නිසා මම මේ දෙයද කියමි. එක් ආයතනයක් වත් ලේබලයකට ලක් කළ නොහැක. අඩු වැඩි වශයෙන් එක් එක් ආයතන වලින් දක්ෂ සිසුන් බිහිවේ. මම දන්නා එක් පෞද්ගලික ආයතනයක ශිෂ්‍යයෙකු මෘදුකාංග නිර්මාණය වෙනුවෙන් රාජ්‍ය සම්මාන පවා ලැබුවේය. තවත් අයෙක් තම පළමු වෘත්තියටම වෙනත් අයෙක් තරමක අත්දැකීම් සඳහා ගන්න වැටුපක් ලැබුවේය. රාජ්‍ය ආයතන වලද දක්ෂ සිසුන් ඇත. එය අමුතුවෙන් කිව යුතු නොවේ, නමුත් දක්ෂතාවන්ට රාජ්‍යද පෞද්ගලිකද කියා නොව බලපාන්නේ තමන්ගේ පුද්ගලික කැපවීම හා උනන්දුවය. කැපවීමෙන් උගත් තැනැත්තා සාර්ථක අනාගතයක් ඇති සාර්ථක පුද්ගලයෙක් වන්නේය.

හීනමානයෙන් වන්නේ තමන්ටම අවැඩකි. ඒ මදිවාට අනවශ්‍ය සතුරන් ඇති කරලීමටද එය උදවු වේ.. මේ වගේ අයට කියන්න තියෙන්නේ ඉතින් අනේ මංදා සිරිසේන කියාය..

මේ දින වල වේලාව හිඟය ,වෙලාවෙන් කොටසක් යන්තම් වැය කර මෙය කොටා ගතිමි, කතාවේ හොඳම හරිය අනේ මංදා සිරිසේන -02 හවසට පළ කරමි ..

මතු සම්බන්ධයි..

චතුර....

එයාට සඳුදට විභාගෙලුනේ..

2011-08-19T11:33:00.000+05:30

පින්තූරය මෙතනින්

මූණු පොතේ යාලුවොත් එක්ක කතා කළාට

පැය විසි හතරම මූණු පොතේ එක එක එව්වා දැම්මට

තත්පරයක් ගානේ යාළුවන්ට අදහස් දුන්නට

මූණුපොතේ යාළුවන්ගේ පින්තූර වල ඇද කුද හොයන්න වෙලාව තිබ්බට

එකම එක මිනිත්තුවක්

මට කතා කරන්න

මගේ දුරකථන ඇමතුමකට උත්තර දෙන්න

මට කෙටි පණිවුඩයක් එවන්න

එයාට වෙලාවක් නෑලු

එයාට සඳුදට විභාගෙලුනේ....

ප.ලි මේක අහපු මගේ යාළුවෙක් මෙසේ කීවේය : කෙල්ලට කොල්ලා එපා වන තාක් කොල්ලා කෙල්ලගේ බල්ලාය....

චතුර....

කළය....

2011-08-18T06:03:00.000+05:30

පින්තූරය මෙතනින්..

ඔන්න ඉතින් මේ සිද්ධියත් වුනේ දහම් පාසලේදි තමයි.

පරණ දහම් පාසල් කතා කියවලා නැත්නම් ගිහින් කියවලා එන්න.

නාරං භාවනාව..

සරම....

මේ සිද්ධිය වුනේ චතුර හතර ශ්‍රේණියේ විතර ඉන්නකොට (මතක විදියට ).අයියා වැඩි කාලයක් ගෙදර හිටියේ නැති නිසා දහම් පාසල් ගියේ අක්කයි මමයි. අම්මයි ලොකු අම්මයි දහම් පාසලේ ඉන්න නිසා වෙන ළමයින්ට වගේ නෙවෙයි චතුරටයි අක්කටයි දාම් පාසල් යන්න වුනේ ගොඩාක් උදෙන් . ඒ මොකද ගුරුවරු ළමයින්ට කළින් යනවනේ.

ඔන්න ඉතින් චතුරයි අක්කයිත් අම්මත් එක්ක ඔහොම කළින් තමයි ගියේ.කලින් ගියාම ඉතින් අපේ ලොකු අම්ම පොඩිත්තගේ වැඩේ අනේ පුතේ අනික් ළමයි එන්න කළින් අරක කරන්න මේක කරන්න කියලා අක්කටයි මටයි කියන එක තමයි. අම්මා ආචාර්‍යය මණ්ඩලයේ ඉන්න නිසා තවත් කළින් ආව එක්කෙනෙක් තමයි ලක්මිණි අක්කා. එයත් අපේ අක්කගේ වයසේ.දෙන්නම හිටියේ එකම පන්තියේ.කවුරුත් ආදරේට කිව්වේ ලකී කියලා.

ඉතින් ලොකු අම්මා උදෙන්ම එන අපි කට්ටියට දෙන වැඩ කොටසකින් එකක් තමයි දහම් පාසලේ ළමයින්ට බොන්න වතුර කළයක් ගෙනත් තියන එක. ඒ කාලේගම කෙලවරේ තිබ්බ නිසා පන්සලට විදුලි පහසුකම් තිබ්බේ නෑ. ඉතින් පන්සල් වත්ත කෙරවලේ තිබ්බ ළිඳකින් තමයි වතුර ගේන්න තිබුනේ. ඒ කළෙත් මහ විශාල කළයක්. සාමාන්‍ය ප්‍රමාණයේ කළයක් එහෙම නෙවෙයි. ඔන්න ඔය කළෙත් එක්ක තවත් පොඩි කළේකුත් තියෙනවා, ඒ කළේට වතුර ගේන්න ඕනේ චතුර ලොකු කළයට වතුර ගේන්න ඕනේ චතුරගේ අක්කයි ලකී අක්කයි. ඔය කාලෙ වෙනකොට මේ අක්කලා දෙන්නටම මේ කළය බරට බරේ උස්සන් එන එක එපා වෙලා තිබ්බේ, ඒත් ලොකු අම්ම නිසා වැඩේට බෑ කියන්නත් බැහැනේ.කළය බර වැඩි වෙලා මේකනම් මහ වදයක්, අපිටමනේ මේ කළය උස්සන් එන්න වෙන්නේ හැමදාම කියලා ඉතින් කියන කොට ලකී අක්කා කියන්නේ කමක් නෑ අපි කළේ උස්සගෙන ගියාට බලන්නකෝ මුළු දහම් පාසලම බොන්නේ අපි දෙන්නා අත හෝදපු වතුරනේ කියලා හිත හැදෙන්න කියනවා.(අත හෝදපු වතුර කිව්වේ, දන්නවනේ දෙන්නෙක් එක්ක කළයක් අරන් එනකොට උස්සන් එන්න ඕනේ විදිය දෙන්නම එක අතක් කළෙකටේ ගැට්ටෙන් දාලා අල්ලගෙන තමයි එන්නේ ඔය වෙලාවට අල්ල ඇතුලට නොයන්නෙත් නැහැනේ ) .

තව මේ කතාවට සම්බන්ධ කෙනෙක් තමයි පන්සලේ ඒ දවස් වල ආවතේව කටයුතු වලට හිටපු තරමක පිස්සුවක් තිබ්බ සාගර. සාගර මාසෙකට සැරයක් මානසික රෝහලෙන් ප්‍රතිකාර ලබා ගත්ත , ඒත් කාටවත් හානියක් නොකරපු, කරන තරමක් පිස්සු වැඩ කරපු අහිංසක තරුණයෙක්.කාත් කවුරුවත් නැති සාගරට ප්‍රතිකාර වලට අනිත් යන වියහියදම් එහෙම දීලා හාමුදුරුවෝ ඒ දවස් වල පන්සලේ ආවතේව කටයුතු වලට නවත්තගෙන හිටියා. ඒත් මේකට පිස්සු කිව්වට මේකා දහම් පාසලේ ළමෙක් මොනවා හරිකරපු ගමන් නවතින්නේ එක්ක්කෝ අපේ ලොකු අම්මා ළඟ එහෙම නැත්නම් ලොකු හාමුදුරුවෝ ළඟ, තව කේලම එක දෙක කරලා කියලා. ඒක නිසා කොච්චර අහිංසක වුනත් චතුරලා වගේම දහම් පාසලෙ අනික් ළමයිනුත් මේ සාගර එක්ක තරහයි.ඒත් කේලම් කිව්වට දහම් පාසලේ ළමයි චණ්ඩිකම් පෙන්නලා දහම් පාසලේ ළමයින්ට සාගර බයයි. ගහනවයි කිව්වොත් මිනිහා අයේ පැත්ත පළාතකට එන්නේ නෑ.සමහර විට තිබ්බ පොඩි පිස්සුවත් හීන්දෑරෙ සරීරෙත් හින්ඳා මෙයා ළමයින්ට බය වෙන්න ඇත්තේ.

ඔන්න එදා නම් තව බංකු වගයකුත් එළියට අදින්න කියලා ඒක ඉවර වුනාම වතුර ගේන්න යන්න කියපු නිසා චතුරගේ අක්කටයි ලකී අක්කටයි එදා නම් මේ වතුර කෙරුවාව ගැන හොඳටම තරහා ගිහින් තිබ්බේ. "මේක අදින්න ඉතින අපිමනේ හැමදාම එන්න ඕනේ. "කිය කිය එදා තරහින් පිපිරි පිපිරි තමයි මේ දෙන්නා එදා වතුර ගේන්න ගියේ. ඔන්න භාගයක් වතුර පුරවනකොට ලකී අක්කට මෙහෙම අදහසක් පහළ වුනා "අනූ මේ කලේ තිබ්බොත්නේ ආයිත් අපිට වතුර ගේන්න වෙන්නේ, අපි මේක බිඳිමු " ,"හා" කියලා චතුරගේ අක්කත් එක පයින්ම කැමති වුනා. ඔන්න මේක නිකන්ම බිඳින්නත් ලේසි නැති නිසා දෙන්නා එක්ක කලෙන් භාගයක් විතර පිරෙන්න වතුර පුරවලා ළිං පඩිය උඩට කලේ ඇත ඇරියා. ඔන්න කළේ බිඳුනා.

"ආ පුංචි නෝ නා කළේ බින්ඳා නේද..?" ආපහු හැරිලා බලනකොට සාගර පිටිපස්සේ ,ආවාසයේ කළෙත් අරගෙන වතුර අරන් යන්න.. ඔන්න පැනපු ගමන් චතුරගේ අක්කා "ඒයි සාගර මෙහෙට එනවා..""අම්මට හරි ලොකු හාමුදුරුවන්ට හරි ලොකු අම්මාට හරි කිව්වොත් මම කරන දේ බලා ගත්තැකි හරිද..?"

"හා මම නම් ඕන් කියන්නේ නෑ ඔන්න" සාගරත් බයෙන් වගේ කිව්වා . අක්කලා දෙන්නා ඉතින් චතුරගේ අතේ තිබ්බ පොඩි කළයට වතුර පුරවගෙන ආපහු ආවා. මෙන්න පන්සල කිට්ටුවට එන්න හම්බවුනේ නෑ සාගර කඩාගෙන බිඳගෙන දුවගෙන ගිහින් දහම් පාසල මැද්දට පැනලා චතුරගේ අම්මයි ලොකු අම්මයි ලකී අක්කගේ අම්මයි ඉන්න තැනට පැනලා කියපි "ඉස්කෝලේ නෝනලා අද පුංචි නෝනලා දෙන්නා කලේ බින්දේ කොස්ගහ මුල නෙවි ළිං පඩියේ " කියලා.ඉතින් කළේ බින්ද විදියත් සාගරයා තව අතින් දාලා කිව්වා . හානේ මේ ගෑනු ළමයි දෙන්නා කරලා තියෙන වැඩක් කියලා ලොකු අම්මා කම්මුලටත් අත තියාගෙන කිව්වා.

තුන්දෙනාටම බැන්නට පස්සේ දුන්න දඬුවම තමයි මීට පස්සේ කළේ වෙනුවට පන්සලේ තිබ්බ ලොකු බෝතල් කීපයකට වතුර අරන් එන්න භාර දුන්න එක.ඒක කළයට වැඩිය අමාරුයි මොකද එක කළයයක් උස්සන් එන තරම් ලේසියෙන් වතුර බෝතල් කීපයක් උස්සගෙන එන්න අමාරුයි. පස්සේ ඉතින් අර කිව්වත් වගේ චතුරගේ අක්කාආවාස ගෙයි පිටි පස්සේ බූරු ඇඳක නිදා ගන්න පිස්සු සාගරට පන්තියේ අනිත් ළමයිනුත් එක්කාසු කරගෙන කසන ඇට දිය කරපු වතුරත් එක්ක දිමි ගොටුවකුත් දැම්මා...

ප. ලි එදා හවස ගෙදර එන ගන්මන් චතුර අක්කගෙන් "මේ ඔය දෙන්න කවදද මට හොරෙන් කොස් ගස් මුල කළ ගෙඩි බින්දේ..?"

චතුරගේ අක්කා .." ඈ මොකක්..?"

චතුර "ඇයි අනේ අර සාගරයා ගිහින් කිව්වෙ ලොකු අම්මට අද පුංචි නෝනල කළේ බින්දේ කොස්ගස් මුල නෙවි ළිං පඩියේ කියලා.."

චතුරගේ අක්කා "ඒක ගිහින් ඒ පිස්සගෙන්ම අහගන්න...."

ප. ප. ලි ටික දවසකින් කළ ගෙඩියට වෙච්චි දේම වීදුරු වතුර බෝතල් වලට වෙන්න පටන් ගත්තු නිසා වතුර ගේන රාජකාරියෙන් අප තිදෙනා මුදා හරින ලදී..

චතුර....

සරම....

2011-08-14T00:22:00.001+05:30

පින්තූරය මෙතනින්

මේක චතුර දහම් පාසල් ගිහින් වෙච්චි දෙයක්

එතකොට චතුර එක ශ්‍රේණියට ඇතුලත් කළා විතරයි. අම්මයි ලොකු අම්මයි දෙන්නම ඉන්න හින්දා චතුරට දහම් පාසලේ වසරක් ඉහළ පන්තියට තමයි ඇතුලත් වෙන්න ලැබුනෙත් දහම් පාසලට භාර දුන්නට චතුරට අම්මා සරමක් මහලා දුන්නේ නෑ, ඒ දවස් වල ටිකක් අම්මට වැඩ වැඩි වෙච්චි නිසාත් ගෙදර ඒ දවස් වල පොඩි වැඩ වගයක් කරපු නිසත් වෙන්න ඇති. මේ කියන දවස් වල චතුරගේ තාත්තා උසස්වීමකට මොකක් හරි විභාගයකට සහභාගී වෙන්න පන්ති වගයකට සහභාගී වුනා ඒ නිසා සති අන්තයටත් තාත්තා ගෙදර හිටියේ නෑ.තාත්තා ගෙදර හිටියේ නැති නිසාත් ගෙදර වැඩ වගයක් තිබුණ නිසාත් අම්මත් ඒ දවස් ටිකේ දහම් පාසලට ගියේ නෑ.

ඉතින් එදත් චතුර දහම් පාසල් ගියා. ඔය කාලේ දහම්පාසලේ විනය ඇඳුම් ගැන එහෙම භාරව තිබුනේ ලොකුඅම්මාට තමයි. ඔන්න ඉතින් සරමක් ඇඳගෙන ගියේ නැති නිසා ලොකු අම්මත් කිව්වා ඊළඟ දවසේ නම් කොහොම හරි අම්මාට කියලා සරමක් මහගෙන ඇඳන් එන්න කියලා.දැන් ඉතින් චතුර ගෙදර ඇවිල්ල අම්මට කිව්ව එන සතියේ නම් කොහොම හරි සරමක් මහලා දෙන්න ඕනේ කියලා, ඉතින් අම්මත් කිව්ව එන සතියේකොහොම හරි මහලා දෙන්නම් කියලා. ඒත් ඉතින් දන්නවනේ ඔය කාලේට මොකක් හරි හම්බ වෙනවා කිව්වම තියෙන නොඉවසිල්ල , ඔන්න ඉතින් හවස තාත්තා ආවමත් කීප පාරක්ම කිව්වා "තාත්තේ ලොකු අම්මා කිව්ව සරමක් මහගෙන ඇඳන් එන්න කියලා". ඉතින් දවසම මහන්සි වෙලානේ තාත්තත් ඇවිත් හිටියේ ඔය කන්දොස්කිරියාවෙන් බේරෙන්න හිනා වෙලා එහෙම තාත්තා මෙහෙම කිව්වා"එහෙම එක සතියෙන් සරමක් මහගෙන යන්න රෙදි ගන්නේ කොහොමද..? කියන්න ලොකු අම්මට ,සරමක් මහගන්න ලොකු අම්මගේ සාරියෙන් කෑල්ලක් කපලා දෙන්න කියලා ඊළඟ දවසේ .."

ඔන්න ඊළඟ දවසෙත් චතුර දහම් පාසල් ගියා ඒත් අම්මට වැඩ වැඩි නිසා සරමක් මහලා දෙන්න හම්බ වුනේ නෑ. යන්න ලෑස්ති වෙලා අම්මා කිව්වා ඔන්න ඔහේ අදට විතරක් ඕක ඇදන් යන්න කියලා. ඔන්න ඉතින් චතුරත් ඕක ඇදන් දහම් පාසල් ගියා. එදා ලොකු අම්මා සරමක් මහලා ඇඳන් ආවේ නැත්තේ ඇයි කියලා ඇහුවේ රැස්වීම උදේ රැස්වීම මැද්දේ. ඔන්න ඉතින් චතුරත් පැනපු ගමන් කිව්වේ එකපාරටම මතක වෙච්චි තාත්තා කිව්ව කතාව."ලොක්කම්මේ තාත්තා කිව්ව එක පාරටම සරම් මහන්න රෙදි ගන්න බෑ , සරමක් මහ ගන්න ලොකු අම්මගේ සාරියෙන් කෑල්ලක් කපලා ඉල්ලගෙන එන්නය කියලා", ඕක අහපු ලොකු අම්මගේ මූණ රතු වුනා, අනික් ළමයිනුත් හිනා වුනා. උදේ රැස්වීමට පන්සිල් දෙන්න වැඩලා හිටපු පන්සලේ පොඩි හාමුදුරුවන්ටත් හිනා. ලොකු අම්මා ඉතින් චතුරට මොනවත් කිව්වේ නෑ, එදත් ඉතින් චතුර දහම් පාසල් ඇරිලා ගෙදර ගියා..

ඔන්න හවස ලොකු අම්මා එනවා ගෙදර, ඇවිත් අම්මාට කිව්වා විස්තරය. අම්මත් ඉතින් මොනවත් කියන්නේ නැතුව අහගෙන හිටියා. ඊට පස්සේ ලොකු අම්ම ගියාට පස්සේ තාත්තා එක්ක කියනවා අන්න ඔයා කියපු එක පුතා අකුරක් අඩු කරන්නේ නැතුවම ගිහින් කියලා. තාත්තටත් ඉතින් වැඩේට හිනා..

එදායින් පස්සේ චතුරගේ තාත්තා චතුරට මොකක් හරි කියනවා නම් දහපාරක් විතර හිතුවලු.

චතුර....

පෑනේ මිතුරෝ....

2011-08-12T13:47:00.000+05:30

පින්තූරය මෙතනින්..

මේක කළේ නිවාඩු කාලෙක ගෙදර ඉන්න ගමන්. නිවාඩු කාළේට අයියත් ගෙදර ඉන්න නිසා ඉතින් තුන් දෙනාම එක්ක මොනව හරි මගෝඩිස් වැඩක් තමයි ඉතින් කළොත්.

ඒ දවස් වල තිබුණ ලොකුම උණ තමයි පෑනේ මිතුරන්ව ඇති කර ගන්න එක. ලෙඩේ ගෙදරට ගෙනාවේ අක්කා තමයි එයාගේ ඉස්කෝලේ යාලුවෙකුට වෙනත් රටක ඉන්න පෑනේ මිතුරෙක් ස්ටිකර් වගයක් එවලා කියන එකත් එක්ක. ඔන්න ඉතින් තුන් දෙනාම එක්ක ඒ දවස් වල ඔක්කෝම පත්තර වල තියෙන පෑනේ මිතුරු සමාජ හොයන්න පටන් ගත්තා.

කොහොම හරි පත්තර කිහිපයක තිබුණ දැන්වීම වලට පිළිතුරු යවලා හොයා ගන්න හම්බවුනා මිතුරු සමාජවලට බැඳෙන ක්‍රම . ඒ අතරේ තව ඉරිදා ටයිම්ස් පත්තරේ තිබ්බ මිරර් මැගසින් එකේ ඒකේ ඒ කාලේ ළමා අතිරේකයක් තිබුණේ නෑ මට මතක විදියට ළමයින්ට වෙනම පිටුවක් විතරයි, ඔය අතිරේකේ පළවෙනවා පෑනේ මිතුරුමිතුරියන් ඇති කර ගන්න ඕනේ පාසල් ශිෂ්‍ය ශිෂ්‍යාවන්ගේ ලිපින ,ඔය ලිපින වලට ලියලයි කොහොම හරි කිහිප දෙනෙක්ව අඳුන ගත්තා.

නුවර පැත්තේ තිබුණ එක පෑනේ මිතුරු සමාජයක සඟරාවකින් විදේශීය මිතුරු මිතුරියන් කිහිප දෙනෙකුට යවපු ලියුම් වලටත් ප්‍රතිචාර ලැබුනා ඒ වගේම ඒ සඟරාවට අපේ තොරතුරු යවලා ඒකෙනුත් ලිපි කිහිපයක් ආවා.

ඔන්න ඉතින් ඔය අතරේ තවත් ලංකාවේමිතුරු මිතුරියන් ඇති කර ගන්න සඟරවකට ඉල්ලුම් කරන්න ආවා. ඒ සඟරාවේ තිබුණා මෙහෙම කොන්දේසියක් , මිතුරු ජාලයේ සාමාජිකත්වය ගන්න බලාපොරොත්තු වෙන අය වයස අවුරුදු දහ අටට වැඩි අය වෙන්න ඕනේ කියලා. ඉතින් තුන් දෙනාම කල්පනා කළත් (ඒකාලේ මම කල්පනා කළා වුනාට මගේ තීරණ සතපහකටවත් ගණන් ගත්තේ නෑ ඔය දෙන්නා )තුන්දෙනාගෙන් එක්කෙනෙකුටවත් බැරි නිසා අක්කා මෙහෙම තීරණයක් ගත්තා ,අයියගේ නම දාලා වයස විදියට අවුරුදු විසිපහ දාලා අදාල පෝරමයට ඒ වයසට හරියන උපන් දිනයත් දාලා පුරවලා අරින්න. ඔන්න ඉතින් එහෙමෙ කළා.

යැව්වට පස්සේ ඔය ජාලයෙන් ලියුමක් ආවා අපගේ මිත්‍රත්ව ජාලයේ සඟරාවේ ඊලඟ කලාපයේ ඔබගේ නම පළ කරනවයි කියලා.ඉතින් නිවාඩුවත් ඉවර වුනා. ඔන්න මාස කීපයකට පස්සේ ලියුමක් ආවා. අයියගේ නමට. ඉතින් එදා ගෙදර හිටිය නිසා ලියුම ගත්තේ ගිහින් අක්කා, ඔන්න ඉතින් ලියුම කඩලා බැලුවම තමයි කරපු වැඩේ බරපතල කම තේරුනේ.

ලියුමේ තිබ්බේ මෙහෙම.

දයාබර ____අයියා (අයියගේ නම ) වෙත

(අසවල් )සඟරාවේ මේ මස කළාපයෙන් ඔබගේ නම හා ලිපිනය දැන ගතිමි. ඔබට මෙය කරදරයක් යැයි නොසිතන්න.බ්ලා බ්ලා බ්ලා බ්ලා (ඇය සේවය කරන ආයතනය , ලිපිනය , එන්න පාර ඔය වගේ දේවල් ) තුන් මසක අසාර්ථක විවාහයකින් වෙන්ව සිටින මා යහපත් ගුණවත් උසස් රැකියාවක් කරන (රණවිරු සොහොයුරන් විශේෂයි ) නිහතමානී අවංක සොහොයුරෙකු හඳුනා ගැනීමට කැමැත්තෙන් සිටිමි.(මට මතක නෑ තව මේකේ ගොඩක් විස්තර තිබුනා ). අන්තිමට තිබුනා ලියුමට ප්‍රතිචාර දැක්වුවොත් හම්බ වෙන්න එන්න වුනත් කැමතියි කියලා.

කොහොම හරි පස්සේ දැනුම තේරුම තියෙන කාලේ වෙනකොට තේරුනා ඕක මිතුරු හවුලක් නෙවෙයි සහකාරයන් සහකාරියන් සොයන අයට තියෙන හවුලක් කියලා.

ඔන්න ඉතින් අක්කා චතුරටත් ඇහෙන්න ලියුම කියවද්දී අම්මා ආවා, ඇවිත් කවුද දුවේ ලියුම එවලා තියෙන්නේ කියලා ලියුම අරන් බැලුවා. ඔන්න අක්කගේ මූණ නිකන් ඇඹුල් වෙලා ගියා. චතුරයා ඉතින් එතකොට එකවසරේ හරි දෙක වසරේ හරි තමයි.

ඔන්න ඉතින් අම්මා"කවුද ඔය සඟරාවට නම ඇරියේ ?"

(අක්කා බිම බලාගෙන ඇඹරෙනවා.)

චතුර පැනපු සැණින් :"අයියාට ආපු ලියුමට අයියගේ නම දාලා අක්කා ලිව්වා "

එදා දවසම ඉතින් බැනුම් තමයි. ඔක්කෝම ඒ දෙන්නට ඉතින් ඒත් ඒ කාලේ හිටපු විදියට ඉතින් ඒ දෙන්නාට බනිනවා කියන්නේ ඉතින් මට බනිනවාට වැඩිය දුකයි. ඔන්න ඉතින් හවස තාත්තා ආවමත් කිව්වා, තාත්තා නම් එච්චර ගණන් ගත්තේ නෑ ඒත් අම්මගේ තීරණය විදියට මිතුරු සමාජයේ සාමාජිකත්වය අහෝසි කරනත් නම පළ නොකරන්නත් කියලා නැවතත් ලියුමක් ලියලා අරින්න සිද්ධ වුනා.

ඊට පස්සේ ලියුමක් ලියනවා නම් අම්මට පෙන්නන්නත් අම්මට කියලා මිසක් ලියුම තැපැල් කරන්න බෑ කියලත් ලියුමක් ආවොත් කඩන්න කලින් අම්මා අතට පත් කරන්න ඕනේ කියලා අළුත් නීතියකුත් ආවා. පස්සේ කාලේක ලියුම් ලියන්න පටන් ගත්තු අක්කටයි අයියටයි වඩා වැඩි ලියුම් ප්‍රමානයකුත් මුද්දර සිය ගණනින් එවන යාළුවෝ පිරිසකුත් චතුරට හම්බ වුනා.

පව් අර බලාපොරොත්තුවෙන් ලියුම් එවපු සහෝදරී, මොකක් වෙතත් එයා මිතුරෙක් වෙනුවට සහකාරයෙක් හොයා ගන්නනේ හැදුවේ.

චතුර....

දේශන අතරතුර - 03

2011-08-10T21:31:00.000+05:30

පින්තූරය මෙතනින්..

දේශන අතරතුර -01

දේශන අතරතුර -02

කියෙව්වේ නැත්නම් කියවන්න.

මේ සිදුවීම සිදුවුනේ අපේ පළවෙනි වසරේ තුන්වෙනි අධ්‍යයන වාරෙදි. මේ මිත්‍රයා මුස්ලිම් ජාතිකයෙක්. මේ කාලේ තමයි තුනවන අධ්‍යයන වාරේ පටන් ගත්තුම කාලේ. ඒ කියන්නේ අගෝස්තු මැදහරියේ විතර. ඒ අවුරුද්දේත් මේ වගේ කාලේ තමයි. ඔන්න ඉතින් ඒ කියන්නේ මුස්ලිම් ජාතිකයන් නෝම්බි සමරන කාලෙනේ.

ඔන්න ඉතින් මේ යාළුවත් ඉතින් නොකා නොබී එහෙම තමයි උදේ ඉඳන් ඉන්නේ. ඒ දවස් වල මෙයා තවත් අමතර විභාගයකටත් පාඩම් කළා , ඉතින් ඒක නිසා ටිකක් නිදි මරලත් එහෙම තමයි එන්නේ .

ඔන්න ඉතින් මෙයා එදත් එහෙම පාඩම් කරලා එහෙම තමයි ඇවිත් හිටියේ. එදා හවස එකට විතර ලැබ් සෙෂන් එකක් පටන් ගත්තා. ඔය වෙලාවට කාලා එහෙම කාටත් මොනතරම් ආසා හිතෙන පාඩමක් කෙරුවත් නින්ද යන වෙලාවනේ . එදා කරපු පාඩමත් ටිකක් නිදිමත එකක්. ඒ දේශක තුමාත් උගන්නන කොට ටිකක් අහන් ඉන්න අමාරුයි එපා වෙනවා, කියවගෙන කියවගෙන යන එක්කෙනෙක්. ඉතින් ටිකක් මේ වෙලාවට නිදිමත හැදෙනවා.

ඔන්න ඉතින් මේ වෙලාවේ මේ නොකා නොබී නිදි වරලා හිටිය මේ යාළුවටත් හොඳටම නිදිමත ඇවිල්ලා ළඟ හිටපු එකාට ස'ර් ළඟට එනවන් ඇහැරවන්න කියලා පොඩි නින්දක් දාල. ලැබ් සෙශන් එකක්නේ ස'ර් ට හරියට කට්ටියව පේන්නෙත් නැති නිසා ලේසියෙන් නිදා ගත්තැකි. මෙයා තව ඒ දවස් වල බයෙන් හිටියේ දවස් දෙක තුනක් එන්න බැරි වෙච්ච නිසා සීයට අසූව නැති වෙයි කියලා, පැමිණීම ළකුණු කරන කොට මෙයා හැම වෙලාවෙම විපරමෙන් තමයි හිටියේ මෙයාගේ නම මඟ ඇරෙයි කියලා.

ඔන්න පාඩමත් ටික වෙලාවක් කරගෙන යනවා. කවුරුවත් වෙන වැඩක් නෑ ස'ර් ලැබ් සෙෂන් එකේ කරන පාඩම කවුරුත් අත් හදා බලනවා. ඔන්න ඔය අතරේ එක පාරටම නැඟිටපු මෙයා Number 1 is presentකියලා කිව්වා.

ඔන්න ස'ර්ටත් මේක මීටර් නෑ ස'රුත් මෙයාගේ මූණ දිහා බලන් ඉන්නවා. ඒ පාර මෙයා තවත් හයියෙන් Sir number 1 is present කියලා කිව්ව එතකොට තමයි ඔක්කොටම තේරුනේ මෙයා හීනෙන් පැමිණීම ළකුණු කරනවා කියලා හිතාගෙන නැගිටලා කියලා.ඔක්කෝටම හිනා,

මෙයාට නිදිය ගත්තු එකට දඬුවම විදියට නිදිමත නැති වෙනකම් හයවෙන්නි තට්ටුවේ ඉඳලා පළවෙනි තට්ටුවට බැහැලා තියෙන පඩි ටික ගණන් කරගෙන එන්න කිව්වා.මෙයත් විනාඩි පහක් ගියේ නෑ ආයිත් ඇවිත් පඩි ගණන කිව්වා . ස'ර් ගත් කටටම කිව්වා ඕක නෙවෙයි ගණන හරි ගණන ගැනගෙන ආවම කියන්නම් කියලා. මෙයා ඊට පස්සේ හරි ගණන ගැනගෙන ආවම තමයි ආයිත් ඇතුලට ගත්තේ. වෙලා තියෙන්නේ මෙයා එක තට්ටුවක් බැහැලා ඒක හයෙන් වැඩි කරලා. ඒත් මුල් තට්ටු දෙක අතර අනික්වට වැඩිය පඩි සංඛ්‍යාවක් තියෙනවා..

මේ සිද්ධිය වුනෙත් තුන්වෙනි අධ්‍යයන වාරෙදිම තමයි. මේ කියන දවස් වල ව්‍යාපෘති වඩ කටයුතු වගයක් සහ විභාගයක් එක ළඟ යෙදිලා තිබුනා , ඔන්න ඉතින් කට්ටිය ගජරාමෙට නිදි මරන් ව්‍යාපෘතිය කරනවා සහ විභාගේට පාඩම් කරනවා. මේ කියන සිදුවීම සිදුවෙච්චි දේශනය තිබ්බේත් දිවා ආහාර වේලෙන් පස්සේ . ඔන්න ඉතින් නිදිමත හැදෙන එක අහනත් දෙයක් යැ. ඒ මදිවට නිදාගන්නේත් නැතුව ඉන්න අයනේ.

ඔන්න ඉතින් දේශනෙන් ටික වෙලාවක් යද්දී පිටිපස්සේ ආසන වල කට්ටිය හොඳටම නිදි අනිත් අයත් අත් දෙකට මූණ තියන් හරිම අමාරුවෙන් ඇහැරගෙන ඉන්නවා.මේ කියන යාළුවත් හරිම නිදිමතෙන් අත්දෙක තියාගෙන අත්දෙක උඩ මූණ තියාගෙන අමාරුවෙන් ඇහැරගෙන හිටියේ.

මෙයා කණ්නාඩි දාන එක්කෙනෙක්. ඔන්න ඉතින් ටික වෙලාවක් යද්දී මහා සද්දයක් ඇහුන , දේශනයක් මැද්දේ නිසා තරමක සද්දේට ඩග් ගානවා ඇහුනා. බැලින්නම් අර යාළුවා නින්ද ගිහින් මේසෙට මූණ වැදෙන විදියට කෝම හරි තදින් නිදිකිරා වැටිලා. පස්සේ මිනිහා ඔළුව උස්සද්දී තමයි දැක්කේ මිනිහාගේ ඇස් දෙක වාසනාවට බේරිලා තියෙන්නේ කියලා. වැටිච්චි පාරට මේසේ වැදිලා කණ්නාඩිය කැඩිලා ඒත් වාසනාවට ඇහේ නෙවෙයි ඇහැ අයිනට කණ්නාඩියේ රාමුව කැඩිලා වැදිලා තිබුනේ. කාචය ප්ලාස්ටික් නිසා රාමුවෙන් ගැලවිලා තිබුනා මිසක් බිඳිලා තිබුනේ නෑ.

චතුර....

දේශන අතරතුර - 02

2011-08-10T08:00:00.002+05:30

පින්තූරේ මෙතනින්

මේ කතාවත් අර දමිළ දේශකතුමා සහ අර අනිත් මිත්‍රයා සම්බන්ධවයි.මිත්‍රයා සහ දේශකතුමා ගැන කියෙව්වේ නැත්නම් මෙතනින් ගිහින් කියවලා එන්න. ඔන්න අර කළින් එකේදි ඒ දේශකතුමා අපේ මිත්‍රයාට ගෑනු ළමයයි නොකියා ගෑනු ළමයයි කිව්වනේ.

ඔන්න ඉතින් මේ මිත්‍රයයි තව එයාගේ යාළුවෝ දෙන්නෙකුයි එහෙම ස'ර්ව කේන්ති ගස්සන වැඩක් කරන්න දින ගැන ගැන හිටියේ. ඒත් ඉතින් ස'ර්'ව මොනවා කළත් කේන්ති ගස්සන එක නම් ලෙසි නැති නිසා මේ යාළුවෝ ටික තීරණය කරලා තිබ්බේ කඩාකප්පල් කාරී ශබ්දයක් හරි වෙන ඒවගේ දෙයක් හරි කරන්න.

ඉතින් එදත් මේ කට්ටිය ටිකක් දේශන ශාලාවේ මැදහරියට වෙන්න ඉඳගෙන හිටියේ.දේශකතුමා දේශනයට දාල රූපසටහනක් බෝඩ් එකේ අඳිනවා පැහැදිලි කරන්න.ඔන්න මේ අතරේ අර සෙට් එකෙන් එකෙක් ස'ර්ට ඇහෙන්න දැම්ම පළවෙනි සද්දය.

ඒක තමයි අර සිංහලෙන් Flirt Whistle කියලා කියන විසිල් එක.අර සාමාන්‍යයෙන් ගෑනු ළමයින්ට ඇහෙන්න ගහන විසිල් එක. අහලා නැත්නම් මෙතන තියෙනවා අහන්න.

ඔන්න ඉතින් පළවෙනි පාරට ඕක කාගේ හරි ෆෝන් එකක දැම්මට ඇහුනේ නෑ. ඉතින් දෙවෙනි පාර ඕක සද්දෙ වැඩි කරලා හොඳට ඇහෙන්න දැම්මා.ඔන්න ඒ පාර නම් ස'ර්ට ඕක ඇහුනා .

බෝඩ් එකේ අඳින එක නවත්තලා හැරිලා බැලුවා සද්දය ආපු පැත්ත.ස'ර් බලන කොට ඉතින් මේ කට්ටිය බිම බලාගෙන හිනාවෙනවා. ඒ වෙලාවේනම් ස'ර්ගේ මූනේ තිබ්බේ කේන්ති ගිය පාටක්. ඉතින් ඔක්කොම හිතුවේ අදනම් වැඩේ හරි තමා කියලා.

ටිකක් වෙලා කන්න වගේ බලන් හිටපු ස'ර් එදත් අර පල් හිනාව දාලා අර බිම බලන් හිටපු එවුන් ටික දිහා බලලා මෙහෙම කියනවා . "Guys, I'm straight and I have two kids...."එදාට පස්සේ නම් එකෙක්වත් ස'ර් එක්ක විහිළු කරන්න ගියේ නෑ.

මේකත් වුනේ දෙවෙනි අධ්‍යයන වාරෙදි. මේකෙදි එක විෂයකට ආවේ තරුණ දේශක තුමෙක් . මෙතුමා උපරිම වශයෙන් අපිට වැඩිය අවුරුදු තුනක් හරි හතරක් හරි වැඩිමල් ඇති. පළමු පන්තියේ සාමාර්ථයක් අරගෙන උපාධිය ගත්ත නිසාවෙන් තමයි මුළින්ම දේශන වලට ඉල්ලුම් කරලා තියෙන්නේ.

ඔන්න ඉතින් මෙයා දේශන පැවැත්තුවට කවුරුත් මෙයා ඉන්නවද කියලාවත් ගණන් ගන්නේ නෑ. කොටින්ම කිව්වොත් ස'ර් ශාලාවේ හිටියත් නෑ වගේ තමයි.ඉගෙන ගන්න අය අහන් ඉන්නවා අනිත් අය එක එක සෙල්ලම්. කෙල්ලන්ට එක එක එව්ව කරන එක , නිදා ගන්න එක වගේ එව්වා.

මේකුන්ට බැන්නොත් කොහොමටවත් පාලනය කර ගන්න බැරි වෙයි කියලා හිතපු ස'ර් කළේ තමන්ට එව්ව ඇහෙන්නේ නැති විදියට දේශනය අහන් ඉන්න අයට විතරක් දේශනය කරලා යන්න ගිය එක. මේ කියන දවසෙත් මේ ස'ර් ගේ දේශනයක් , ඒත් ස'ර්ට වෙන මොකක් හරි වැඩක් තිබ්බ නිසා ප්‍රශ්න වගයක් කරන්න දීලා ගියා.

ඉතින් කොල්ලන්ටත් නිකන් ඉන්න බෑනේ ඔය ගෑනුළමෙක් අයිනේ වාඩි වෙලා හිටපු මිත්‍රයෙක් ඒ ගෑනු ළමයගේ පෑන් පැන්සල් දාන පර්ස් එක අරගෙන තින් අත යවනවා. (කියන්න එපා ඉතින් තාම කරන්නේ පහේ පන්තියේ වැඩ කියලා..). ඔය ප'ර්ස් වල පෑන් පැන්සල් ලක්ෂයක් විතර දාන්න තරම් සයිස් එව්වනේ ගන්නේ. මේකත් තරමක ලොකු එකක්.

ඔන්න ඉතින් අතින් අත යවන කොට අර ගෑනු ළමය කෑ ගහනවා ඕක දෙන්න කියලා. ඒත් ඉතින් ඔය වෙලාවට ඕක දෙන එකක් යැ. ඔය අතරේ ඕක මඟදි නැවතිච්චි තැනක එකෙක් ඕක ඇරලා බලල ඇතුලේ මොනවද තියෙන්නේ කියලා.කොහොම හරි ඕකේ තිබිලා තියෙනව අර ගෑනු ළමයි අසනීප වුනාම හදිසියට භාවිතයට ගන්න ජාතියේ දෙයක්(චන්ද්‍ර මාසෙකට සැරයක් හැදෙන ලෙඩේ ).

කවුද දන්නේ ඔය අලි සයිස් පර්ස් වල එව්ව තියෙනවයි කියලා.අනික කොල්ලෝ ඔය එව්ව හරියකට දැකලා තියෙන එකක්යැ. ඔන්න අරුත් ඕක එළියට අරන් (ඕක තිබ්ලිලා තියෙන්නේ පොඩි පොලිතින් එකක වගේ ඔතලා ) ඒ මොකක්ද බන් මේ සිලි සිලියේ තියෙන ස්පොන්ජිය කියලා උස්සලා අර ළමයාට පෙන්නල ඇහුවා. ඕක දැක්ක විතරයි අර ගෑනු ළමය අඬන්න ගත්තා, අනික් ගෑනු ළමයි ඔක්කොම කන්න වගේ කොල්ලෝ සෙට් එක දිහා බලන් ඉන්නවා.

ඔය අතරේ කන්න වගේ බලන් හිටිය ගොඩෙන් අපේ රෙපී නැඟිටලා ඇවිත් "තමුසෙලටත් ඕනේ මඟුලකුත් නෑ එපා මඟුලකුත් නෑ"කියලා පර්ස් එකයි අර අනිත් එකයි උදුරගෙන ගස්සගෙන ගිහින් අර ගෑනුළමයට දුන්නා.ඊට පස්සේ තමයි එකෙකුට මීටර් වෙලා කිව්වේ ඕක අහවල් එකක් වෙන්න ඇතිය කියලා.එදා ඉඳන් අර යාළුවට සිලි සිලියේ ස්පොන්ජි කිව්වම පරම්පරාවම මතක් කරලා දෙනවා.

අවුරුද්දක් විතර යනකන් සමාව ඉල්ලුවත් කෙල්ල නම් කොල්ලා දිහා සමාව දෙන්න තියා පැත්තවත් බැලුවේ නෑ. කොටින්ම කිව්වොත් බැච් එකේ එක කොල්ලෙක් දිහාවත් බැලුවේ නෑ.පස්සේ ඉතින් සමාව ඉල්ලලා තියෙන තරම කියන්නේ දෙවෙනි අවුරුද්ද පටන් ගන්න කොට මේ දෙන්න ආවේ ආදරවන්තයෝ වෙලා..

චතුර....

දේශන අතරතුර - 01

2011-08-08T21:57:00.003+05:30

පින්තූරය මෙතනින්..

දේශන අතරතුරදි සිද්ධ වුන රසවත් සිදුවීම් කීපයක් මතක් වුන නිසා ලියන්න හිතුනා..

මේක වුනේ අපි පළමු අවුරුද්දේ පළවෙනි අධ්‍යයන වාරයට පෙර තියෙන හුරුකරවීමේ කාලසීමාවේදී. මුල් සතියෙදි අපිට විවිධ ක්‍රියාකාරකම් කරන්න තිබුනා, ඒ ඒවායින් එකක් තමයි කණ්ඩායම් වශයෙන් සාර්ථක ඉදිරිපත් කිරීමක් කිරීම , ඒකට දේශන දෙකක් වගේ වෙන් වෙලා තිබුණා අන්තිමට දේශන ඉවර වෙලා දේශන වලින් ඉගෙන ගත්දේ ප්‍රායෝගිකව ඉදිරිපත් කරන්නයි තිබුනේ.

මුලින්ම දේශක තුමිය සියළුම සිසුන්ව කණ්ඩායම් කිහිපයකට බෙදලා දීලා ඒ ඒ අයට කැමති මාතෘකාවක් තෝරාගෙන තමන්ගේ ඉදිරිපත් කිරීම පහුවදාට කරන්න කියලා නියම කෙරුවා. මේ ඉදිරිපත් කිරීමට එක් එක් සාමාජිකයා තමන්ගේ කොටස ගැන මුලින්ම හැඳින්වීමක් කරන්න ඕනේ මේකට අවශ්‍ය නම් බෝඩ් එක පාවිච්චි කරන්න පුළුවන් සහ තමන් හොඳින්ම සූදානම් වෙලා තමන්ගේ ඉදිරිපත් කිරීම හොඳින් නරඹන්නන්ට තේරුම් යන විදියට තේරුම් කරන්න ඕනේ. ඉන් පස්සේ තමයි කණ්ඩායමම එකතු වෙලා හදපු පවර්පොයින්ට් ප්‍රසන්ටේශන් එකෙන් තමන්ගේ ඉදිරිපත් කිරීම කරන්නේ.

මේකට අර මුලින් තනියම කිරීම නියම වුනේ පවර් පොයින්ට් භාවිතයේදී ඉදිරිපත් කිරීමක් කරද්දී ඒ ඉදිරිපත් කිරීම කරන්න තිරය මත තියෙන දේ පදනම් වෙලා ඒ දේම කියන එක නවත්වන්න. ඒත් අන්තිමට තමන්ට රූප සහ අනෙකුත් දේවල් එකතු කරලා හදා ගත්ත ප්‍රසන්ටේශන් එක කැමති ආකාරයකට පැහැදිලිව ඉදිරිපත් කළ හැකි.

ඉතින් ඔන්න මම මේ කියන යාළුවා ඔය කණ්ඩායම් වලට බෙදලා දෙන දවසේ ඇවිත් හිටියේ නෑ, පහුවදා ඉදිරිපත් කිරීම කරන්න ඕනේ වෙලාවේ අර දේශක තුමී ඔක්කෝම ඉන්නවද කියලා අහපු වෙලාවේ මෙයා කිව්වා මම ඊයේ හිටියේ නෑ මැඩම් මට කණ්ඩායමක් නෑ කියලා. මෑන්ස් රෙඩි නැතිනිසා තමන්ගේ කණ්ඩායමට දාගෙන ලකුණු අඩු කර ගන්න එකම එක කණ්ඩායම් නායකයෙක්වත් ලෑස්ති නෑ.

ඔන්න ඒ පාර දේශකතුමී මෙයාට කිව්ව ඔය ළමය කැමති දෙයක් ගැන හොයලා ප්‍රසන්ටේශන් එකක් සරලව තමන්ට ඉදිරිපත් කරන්න හදාගෙන එන්න කියලා අනිත් අයගේ ප්‍රසන්ටේශන් ගන්නකම්.ඔන්න ඉතින් මෑන්සුත් අහල පහල හිටිය එකෙක්ගේ පෙන් එකකුත් ඉල්ලගෙන ගිහින් ප්‍රසන්ටේශන් එක හදන් ආවා අනික් අය කරලා ඉවර වෙන කොට පැයකට විතර පස්සේ.

මිනිහගේ ටිකිරි මොළේට එකපාරටම මතක් වෙලා තියෙන්නේ කම්පියුටර්වෛරස් කියන මාතෘකාව , ඔන්න ඉතින් මිනිහා ගූගල් එකෙන් එවේලේ උඩින් පල්ලෙන් හොයාගෙන කොළේක ලියන් ආව විස්තරයක් එහෙම කරලා බෝඩ් එකෙත් ඇඳලා පොඩි විස්තරයක් කළා, මිනිහට ඉතින් පොඩි විතර සමාවක් ලැබුනා ඉතින් සූදානම් වෙලත් නැහැනේ, ඊට පස්සේ මිනිහට තමන් හදපු ප්‍රසන්ටේශන් එක හරියට ප්‍රසන්ට් කරන්නයි කියලා දේශකතුමී බලන් ඉන්නවා, ඔන්න මිනිහා ඉතින් I'm going to explain about computer viruses කියලා ආයිත් කියලා ඔන්න ප්‍රසන්ටේශන් එක සේව් කරගෙන ආපු පෙන් එක කම්පුටරයට ගැහුවා.

ඒ කාලේ ලැබ් වල ඉන්ස්ටෝල් කරලා තිබ්බේ මැකාෆි , ඒකත් ඒ දවස් වල එක්ස්පයර් වෙලා හරි මොකක් හරි වෙලා තිබ්බේ, ඒ වුනාට දේශන ශාලාවල පරිඝනක වලට දාල තිබ්බේ කැස්'ප'ස්කි. අනික දැන් තියෙන වර්ශන් එකේ ඉන්ෆෙක්ටඩ් ෆයිල් එකකට දානවට වැඩිය මහා කැත විදියට චූස් චාස් ගාන සද්දයක් ඔය කාලේ තිබ්බ වර්ශන් එකේ තිබ්බේ. මිනිහ පෙන් එක ගහල තප්පර දෙකක් යන්න කළින් අර මහා කැත සද්දේකුත් එක්ක ස්ක්‍රීන් එකේ ට්‍රොජන් ඩිටෙක්ටඩ් කියලා වගේ මැසේජ් එකකුත් එක්ක රතු පාට ඇලර්ට් එකකුත් ආවා. මේක බලන් හිටපු ළමයින්ට විතරක් නෙවෙයි අර දේශකතුමීටත් හිනා, පස්සේ මෙයාට වෙන දවසක ප්‍රසන්ටේශන් එක කරන්න කියලා දේශකතුමී එතුමිගේ ඊළඟ දේශනයට යන්න ගියා.ඒ වුනාට අපේ අදහස නම් මේක තමයි කරපු හොඳම ප්‍රසන්ටේශන් එක කියලා . සජීවී නිදර්ශකයකුත් තිබ්බානේ.

මේ සිද්ධිය වුනේ දෙවෙනි අධ්‍යයන වාරේ. ඒකේ එක විෂයකට හිටියේ දෙමළ දේශකතුමෙක්. මෙතුමාට ඉතින් ඔය ළමයි කරන නවීන පන්නේ කිසිම දෙයක් පේන්න බෑ, බනින්නේ නම් නෑ ඒත් මහ කැත විදියට කට්ටියම ඉස්සරහා හිනාවෙන්නේ . ඔන්න අපේ බැච් එකේ හිටියා කොණ්ඩෙ බෙල්ල දිහාට වවා ගත්තු පොරක්.

ඉතින් ඒ දවස් වල මූ ඒක තවත් ලස්සන වෙන්න ස්ට්‍රේට් කර ගත්ත. ස්ට්‍රේට් කළාට පස්සේ මේකාගේ කොණ්ඩේ ඉස්සෙල්ලාටත් වැඩිය කැපිලා පේන්න ගත්තා. ඉතින් මේ දේශකතුමාත් මූ ස්ට්‍රේට් කරලා ආපු පළවෙනි දවසේම ඕක දැක්කා.මෙයැයි ඕකට මොකාක් හරි කියනවමයි කියලා කට්ටියම කතා වෙලයි හිටියේ , ඒත් මුල් පැය භාගේදිම මෙයාට ඒකට කියන්න දෙයක් හිතා ගන්න බැරුව වෙන්න ඇති දේශන ශාලාව හරහා එක පාරක් ඇවිදගෙන ගියත් ම්ම්හ් නෑ මුකුත් කිව්වේ.

ඔන්න ඉතින් දෙවෙනි පාර දේශන ශාලාවේ අපේ මිත්‍රයා ළඟින් ඇවිදගෙන යද්දී මෙයාට වාසනාව පෑදුනා. මේ කියන මිත්‍රයා ගාව එහා පැත්තෙන් එදා ඉඳගෙන හිටියේ ගෑනු ළමෙක්. දන්නවනේ ඉතින් ගෑනු ළමයි ගාව තියෙන ජාති ,පෑන් පැන්සල් වයි වර්ණ කොළ වගේ එව්ව. ඔන්න මෙයැයි ගාවත් තිබිලා තියෙනවා රෝස පාට කොළ වගයක්.මේ දේශකතුමා ඔතනින් යද්දී මෙයින් එකක් බිමට වැටිලා තිබිලා තියෙනවා. ඔන්න ඉතින් දේශකතුමා පාත් වෙලා ඕක ඇහිඳලා උඩට උස්සලා හොඳට බලල අර යාළුවා දිහාට හැරිලා කියල ඇහුවා"Is this yours..?",ඔන්න ඉතින් යාළුවත් "No Sir "කියලා උත්තර දුන්නා. ඊට පස්සේ පල් හිනාවක් දාල අර දේශකතුමා මෙහෙම කියනවා .. But that color suits you well.. දේශකතුමා ගියාට පස්සේ අර යාළුවා මෙහෙම කියනවා "උගේ *@#$%"

චතුර....

අඟන සහ පර පුරුෂයා..

2011-08-08T12:12:00.000+05:30

පැහැපත් ඡවියෙන්ද

දිගු වරලෙන්ද

මනාවූ රුවෙන්ද යුතු

ඇය රුවැති අඟනක් විය

කාලයේ වරදින්

දෛවයේ සරදමින්

ඇයට ලැබුණු අධම පුරුෂයාගේ පහත් ක්‍රියාවෙන්

ඇය වෙසඟනක් විය

ඇය ස්පර්ෂයට

ඇගේ රුව දැකීමට

ඇගේ රුව විඳීමට

ඇය විඳ ගැනීමට

පහසින් මත් වීමට

නොයෙක් පර පුරුෂයන්

ඇය වෙත එන්නාහ

ඇය ඔවුන්ට රහස, පහස, සුවය දෙන්නීය

එක් දිනක් තවත් එක් පුරුෂයෙක් ඈ වෙත ආවේය

රහස ,පහස ,සුවය විඳ ගත්තේය

එයින් මත් වූවේය

සුරාතාන්තයට පැමිණියේය

අඟනද ඔහු රිසිසේ සිටියාය

ඈ අත ගතමනාවද තැබූ ඔහු

යන්නට සැරසින

නළල සිඹ

"දියණියන් වැඩිමහල්ය දැන් ,ඔවුන් ප්‍රවේසම් කරනු වස් "

"සමසක සිට ඔවුන් තනිකර ඇය පවුල් යහනට නො එයි දැන්"

"නුඹ නාඩ ඉඳපන් මම සැමදාම එන්නම් "

යයි ' අඟනගේ සවන්පත් මත මිමිනුවේ"ලු"

පින්තූරය මෙතනින්..

චතුර....

ආදරයක්ද .. ? තරඟයක්ද .. ?

2011-08-08T08:08:00.000+05:30

දුරකථනය නිවා දැම්මොත්
පසුදිනට "ඔබ ඇමතු දුරකථනයෙන් ප්‍රතිචාරයක් නොමැත කරුණාකර පසුව අමතන්න "
"මම පොඩි වැඩක ඉන්නේ ගෙදර ගිය ගමන්ම ගන්නම්"
පසු දිනට"මම පොඩි වැඩක ඉන්නේ පස්සේ ගන්න "
මොකද කරන්නේ..? "මම පාඩම් කර කර හිටියේ."
පසුදිනට "මම පාඩම් කරනවා පස්සේ ගන්න"
"අපි හෙට හම්බ වෙමුද..?" " බලමු"
පසුදිනට මම වෙන වැඩක් කරන විට "මම අද ගෙදර ඉන්නේ.."
ඇමතුමක්, "ඔයා මොකද කරන්නේ ..?" "මම පොතක් කියව කියව හිටියේ .."
පසුදිනට " මේ ඔයා අර අහවලාගේ මේ පොත කියවලා තියෙනවද..? එතකොට අර පොත , එතකොට අර අරයගේ පොත් ?"
ඇමතුමක් ,"ඔයා කොහෙද ඉන්නේ..?" "මම මේ කලින් අධ්‍යයන වාරේ ප්‍රතිඵල බලන්න ආවා"
පසුදිනට "මට ගිය අවුරුද්දේ විෂයන් වලට මේ ප්‍රථිඵල තියෙනවා , එතකොට මේ අවුරුද්දේ ඒවට මෙහෙමයි තව මේ......."
ඇමතුමක් "ඔයා මොකද කරන්නේ ?" "මම මේ සින්දුවක් අහනවා"
පසුදිනට "මේ අර අහවල් ගායකයගේ අර සිංදුව හරිම ලස්සනයි , එතකොට ඔයා අර අහවල් ගායකයාගේ සිංදු අහලා තියෙනවද..?"
මුහුණු පොතට ලැප්ටොප් පින්තූරයක් දැමීම
පසුදිනට "මේ මගේ ලැප් එකේ වේගේ ඔයාගේ ලැප් එකට වැඩිය වැඩියි"
මේක ඇත්තටම ආදරයක්ද ..? තරඟයක්ද..?

Picture source : http://www.sauce-music.com/Art.asp Accessed on 08th August 2011 07.00 [Online]

චතුර....

ජාලයෙන් ස්වායත්ත වන්න ....

2011-08-06T22:59:00.000+05:30

ජාලයක් ඇත
අහි ජාල පුරුක්වන අප
ජාලයට එක් කිරීමද ජාලයෙන් ගැනීමද කරන්නෙමු
නමුත් ජාලය නැති වූ කළ
ජාලයෙන් තොරව කළ හැකි කිසිවක් අප නොසිතමු
ජාලයෙන් ස්වායත්ත වන්න
ජාලයෙන් එපිට ලෝකය
ජාලයේ ලක්ෂ්‍යයකට සීමා වී සිටින ඔබට වඩා
බොහෝ පුළුල්ය
නමුත් එය විඳ ගැනුම
එයට ඇතුල් වීම
ස්වායත්ත වීමට සිතන තරම්
පහසු නොවනු ඇත....

Picture source : http://www.squidoo.com/digitalartsoftwareAccessed on 06th July 2011 19.00 [Online]

චතුර....

නොසෑහුන සිත....

2011-08-05T18:53:00.000+05:30

මෙය ඇත මට
නමුත් මෙහි අඩු ලුහුඬු ඇත
එය සර්ව සම කර ගනිමි මම
මෙය නැත මට
එය කෙසේ හෝ කර ගනිමි මා සතු
එය තිබුනද
අවැසි ලෙස නොතිබෙද
වෙනසටත් ඉඩ නොම දෙද
එය ඉවත ලා හොඳ දේ සොයමි මම
මෙය මෙපමණකි
නමුදු එය එපමණකි
නමුත් එය මා නොසනසවන කල
දමමි ඒ දෙයද ඉවතටම
ඉවත ලූ පසු
සොයමි මම මට අවැසි දෙය
හමු වූ කළ ඒ වැනි යමක්
සසඳමි ඒ, පෙර සමඟ
මේ දේ ඒ දේ කොයි දේ
ගෙන දේද වැඩි සතුට
මේ දේ මේ අඩුවද
මේ දේ මේ දෙය වැඩිද
පෙරදේ එය සමව තිබිණිද
හොඳම දේ , ඒ මා සෙවූ දේ
මා ළඟම තිබී ඇත
අවසනේ මා විසින්ම ඉවත හැරදමා ඇති එය
නැවත මා සතු කර ගනු කෙලෙස
පමා වැඩි සිත , ඔබ එයට පමා වැඩිය
හොඳම දේ සෙවූ සිත ඔබ
අසල වූ හොඳම දෙයම අහිමි කර ඇත
හොඳම දේ හොඳම ආකාරයට
සොයන නුඹ ,නොසෑහුන සිත
කවදා මෙල්ල කර ගනුද
ඒ නිම නොවෙන අසීමිත
නොසෑහීමම....

Picture source : http://debbieflood.blogspot.com/2010_07_01_archive.html Accessed on 05th July 18.00 [Online]

චතුර....

ආදරේ මෙයද..?

2011-08-05T15:18:00.000+05:30

දවසක් ආදරෙන් හිටියොත්
මාසයක් තරහා වෙන
වචනයක් වැරදුනොත්
වචන සීයකින් පලි ගන්න
ආඩම්බරකමට මුල්තැන දෙන
ආදරේ මෙයද?
එහි සෙනෙහසක් ඇත්ද?
මා හට වැරදී ඇති සෙයකි....

Picture source : http://www.artistsforum.org/viewtopic.php?f=4&t=2108065Accessed on 05th of August 2011 15.16 [Online]

චතුර....

සිරිමතී....

2011-08-03T16:50:00.000+05:30

"අම්මේ මගේ කකුල් රිදෙනවා "පුංචි සහන් නගන මැසිවිල්ල නිසාවෙන් සිරිමතී දරුවාට කිසිත් නොකියා දරුවාව වඩා ගෙන උරෙහි තිබූ බෑඅගයද අනෙක් උරයට දමාගෙන බස් නවතුම කරා එන්නට පිටත් වූවාය.පෙරපාසල් වියේ යන දරුවෙක් වූවත් උසුලන දුක් කන්දරාව නිසාදෝ ඇයට දරුවාගේ බරක් නොදැනුනි. මහත්තයා "මහත්තයා මීගොඩට යන බස් නවත්තන්නේ කොහෙද?"ඇය තමන් මෙන් බොරැල්ල දෙසට ගමන් කරමින් සිටි තලතුනා පෙනුමැති මහත්මයෙකුගෙන් විමසා සිටියාය."ඔහොම යන්න , ගියාම උමං මාර්ගය හම්බ වෙයි ඇතුලෙන් වම් පැත්තට හැරෙන්න කොටා පාර කියන බෝඩ් එක බලන්න" කරුණාවන්ත බැල්මක් හෙලූ එම පුද්ගලයා නැවත හැරී ගමන් කරන්නට විය. එතුමාට පින්සිද්ධ වෙන්න ඕනේ. අද දවසට මට එකම එක වචනෙකින්වත් කරුණාවෙන් කතා කලේ ඒ මහත්තයා,සිරිමතී ගේ සිත කියයි..

සැමියා හැරගොස් සිටින සිරිමතී තම පාසල් යන දියණියත් පස් හැවිරිදි පුතුත් රැක බලා ගත්තේ වත්තක කිරි කැපීමෙන්ය. දියණිය පාසල් ගොස් එනතුරා සිය කුඩා පුතු අසල පෙරපාසලෙන් පැමිණි පසු ඔහුත් සමඟ කිරිමිදවීමේ කාර්‍යයට සවස දෙක පමණ වනතෙක් හවුල් වන ඇය සවස් වරුව වතු හිමියාගේ නිවසේ වැඩ පලට උදව් වන්නීය.සහන්ට හදිසියේම සහලවල උණ ගත් නිසාවෙන් අසල්වැසි කාන්ති කියා සිටියේ "නංගියේ මොන උණක්ද දන්නේ නෑනේ අනේ ඉක්මනට ළමා රෝහලට අරන් පලයන්" කියාය. උදේ රැයින්ම අවදිව සිය කිරිකට්ටියේ වැඩ නිමකළ ඇය සිය දියණියද පාසලට ඇරලවා වතු හිමි වික්ටර් මහත්මාගේ නිවසට ගියේ ඇයට සවස වඩට ඒමට නොහැකි වේ යයි පැවසීමටය. වික්ටර් මහතා නම් දරු දෙදෙනා කෙරේ අනුකම්පා කරන නිසාවෙන් ඇයට කුමක් වත් කියනු නැතැයි ඇය සිතුවාය. ඇය යනවිට වික්ටර් මහතා නිවසේ සිටියේ නැත. සිටියේ වික්ටර් මහතාගේ නෝනාය. "නෝනා මේ පොඩි එකාට සනීප නෑ මම මේ නෝනා වාට්ටුවටවත් ගෙනිහින් බලන්න කියලා" ඇය සිය කාරණාව නෝනා ඉදිරියේ දිග හැරියාය. "අනේ මංද උඹලට පිච්චිය නැති උනාට යන්න ඕනේ කොළඹ රටේ " නෝනා ගත් කටටම එසේ කීවාය, එමලින් දැන් වයසක එකී , ඒකි කෝමද මේ වැඩ ටික තනියම කර ගන්නේ..? නෝනා තවත් ගෝරනාඩුවය. "අනේ නෝනො එහෙම කියන්න එපා , මට ඉන්නේ ඉතින් මුන් දෙන්න විතරනේ, කාන්ති අක්කා කිරි ටික අකුලලා ගෙනත් දෙයි " කඳුළු පිරුණ දෙනෙතින් බැගෑපත්ව කීවාය. "මම දන්නේ නෑ ඉක්මනට වරෙන් හවස් වෙන්න කලින් " ඇය නෝනාගේ ස්වරය තවත් ටිකකින් "උඹ යන්න ඕනේ නෑ"කීමට කලියෙන් ඉක්මන් ගමනින් පිටත් වූවාය.

"දඩාස්" කොහෙ බලාගෙනද ගෑනියේ යන්නේ..? තව ටිකෙන් මගේ අම්බ්‍රෙල්ල එකත් කැඩෙනවා.." ලස්සන නෝනා කෙනෙකු රලු වචන වලින් නැවතත් ඇයට දමා ගැසුවාය. අනේ නෝනා මට සමා වෙන්න මම වෙන කල්පනාවක ආවේ නැවතත් ඇය උරුම බැගෑපත් ස්වරයෙන් කීවාය සිරිමතීගේ ඉහේ සිට දෙපතුලටම කෝපාවිෂ්ඨ බැල්මක් හෙළු ඇය මොහොතකදු තම ගමන පමා නොවීමට ඉඩ නොදී යන්නට ගියාය. බස් නැවතුමට එන තෙක්ද ඇයට සිහි වූයේ රෝහලේදීත් "තමන්ගේ දරුවා මෙහෙමද බලා ගන්නේ , තමන්ගේ දරුවා මීට වඩා පරිස්සමෙන් බලාගත්තොත් හොඳයි කියා දොස්තර මහත්වරුන්ද ඇයට දොස් නැගූ ආකාරයයි".

"අසරණ මම වෙන මොනවා කරන්නද දෙයියනේ..?" නැවතත් ඇය සුසුමක් හෙලමින් බසයක් ඒදැයි බැලුවාය.. බසයකට මඟ බලමින් උන්නද නැවත කල්පනා ලෝකයේ සිටි ඇයගේ සිතුවිලි දැහැන බිඳුනේ අසල නැවතුනු බසයේ කොන්දොස්තරගේ හඬිනි. රාජගිරිය , බත්තරමුල්ල මාලඹේ අතුරුගිරිය මීගොඩ මීගොඩ මීගොඩ ..බසයට නැඟුන ඇය හෙමින් හෙමින් බසයේ ඉදිරියට ගියාය, සමහරු දරුවාත් කර පින්නාගෙන සිටින ඇය දුටු විට ඉවත බලා ගත්තෝය, සමහරු නිඳි කිරා වැටුනෝය, සමහරු මේ මොන මල කරදරයක්ද කියා මෙන් ඔරවා බැලුවෝය, කමක් නෑ මට මේ දුර ආවනම් දරුවත් අරන් හිටගෙන යන්න බැරි කමක් නෑ ඇගේ සිත ඇයටම කියයි. "ඔය දරුවත් එක්ක ඉන්න අක්කට කවුරු හරි සීට් එකක් දෙන්න" , කොන්දොස්තර බසයේ පිටුපස සිට මොර දුන්නත් සිරිමතීට අසුනක් පිරි නමන්නට කෙනෙක් ඉදිරිපත් වූයේ නැත. අවසානයේ බසයේ ඉදිරිපස අසුනකට වන්නට හිඳගෙන සිටි තරුණ මහතෙක් කාරුණික සිනහවක් පාමින් ඇයට අසුන පිරි නැමුවේය.

ටිකට්ස් ටිකට්ස් නැවතත් කොන්දොස්තර හඬ තලයි. බසය ටික දුරක් ගිය පසු නින්ඳේ හුන් සහන් අවදි විය, "අම්මේ මට ඕක් වගේ" වේදනා බර මුහුණින් දරුවා කීවේය , දෙයියනේ මම සිලි උරයක්වත් දාගෙන ආවේ නෑනේ, ඇය නැවතත් සැක හර දැන ගැනීමට සිය මල්ලට අතදා බැලුවාය,එකදු සිලි උරයක් නැත. අසුනේ අනෙක් පස හිඳසිටියේ තරුණ ගැහැනු ළමයෙකි. ඇයට සිරිමතී පිළිබඳ වගක්වත් නැත , කනේ ඉයර් ෆෝනයක් ගසා ගෙන කවුළුවෙන් ඉවතබලා සිටි ඇය තමා දෙස හැරී බැලූ එකම වතාව වූයේ නින්දේ සිටි සහන්ගේ පය ඇයගේ ඇඟේ වැදුන අවස්ථාවයි. "නෝනා දරුවට වමනේ යන්න එනවලු, මට පොඩ්ඩක් වීදුරුව අයින දෙනවද නෝනා ළමයට වමනේ කරවන්න", දෙවරක්ම මෙසේ පැවසූ නමුත් යුවතිය වැරදීමකින්වත් සිරිමතී දෙස නොබැලුවාය, ඇය තවමත් සංගීතයට හෝ රේඩියෝවට කන් දෙමින් කවුළුවෙන් ඉවත බලා සිටියි. සිරිමතී දෙස බලා සිටි පිටිපස අසුනේ විශ්‍රාම ව සිටින ගුරුමෑණියක් යයි සිතිය හැකි වයසක කාන්තාව තරුණ ගැහැණු ළමයාගේ උරහිසට අත තැබුවාය. එසැණින් පියවි ලොවට පැමිණි තරුණ යුවතිය ඒදෙස හැරී බැලුවාය , එසැනින් සිරිමතී, "නෝනා පොඩ්ඩක් මට වීදුරුව අයින දෙනවද දරුවට වමනේ යන්න වගේ".. යයි නැවතත් කීවාය. අහංකාර පෙනුමකින් සිටි තරුණිය මුහුණට සිනාවක් නංවාගෙන "එන්න එන්න මට ඔයා කතා කරනවා ඇහුනේ නෑනේ" කියා සිනහ මුසු මුහුණින් අසුනේ තම ස්ථානයට සිරිමතීට ඒමට අයගේ මල්ලද ඔසවාගෙන සිරිමතීට උදවු කළාය. සිරිමතියගේ මුවඟටද අහිංසක සිනහවක් නැඟුනි. අසුනේ තැන් මාරු කළද සහන්ට වමනය ගියේ නැත. මීගොඩින් බසයෙන්බැස ගත් සිරිමතී සිය කුඩා නිවස්නය කරා අලස ගමනින් පියමන් කළේ වික්ටර්මහතාගේ නෝනාගෙන් හවස් වරුවට හවසට අසන්නට වන දෝස් මුරයෙන් ගැලවෙන්නේ කෙසේදැයි සිතමින්ය....

Picture source : http://snarkernackle.blogspot.com/2006_03_01_archive.html Accessed on 03rd July 16.00 [Online]

චතුර....

මගේ නෙතඟට කඳුලක් ගෙනත්....

2011-08-02T16:50:00.001+05:30

කොච්චර ලං වෙන්න හැදුවත්
ලං වෙන තරමටම ඈත් වෙන
කොච්චර ආදරෙයි කිව්වත්
අන්තිමට කේන්තියකින් ඉවර වෙන
කතා නොකරන්න හිටියත්
ඔය කටහඬ ඇහෙන කොට මටම කතා කරන්න හිතෙන
නොදැක ඉන්න හිටියත්
අන්තිමට ඔය රුව දකින්න දුවගෙන යන
කොච්චර එපා කිව්වත්
අන්තිමට ඕනෙම වෙන
ඔයාගේ ආදරය
මටත් නොදැනිම
මගේ නෙතඟට කඳුලක් ගෙනත්....

Picture source : http://my.opera.com/Kaitz/blog/tear Accessed on 02nd August 2011 16.00 [Online]

චතුර....

පාෂාණයේ රහස සොයා..

2011-08-02T05:46:00.001+05:30

හද උණුසුම් කරන

දීප්තිමත් පාෂාණයේ

ආලෝකයට නෙත් යොමන්න

ආලෝකයේ කාන්තිය දකින්න

එහි ඇති අරුත සොයන්න

දිවි ඇති තුරු අරුත සොයා යන්න

ඔබ එය සෙවීමට අසමත් වේ නම්

ඔබ සත්‍යය සොයා

නිවැරදි මඟ ගොස් නැත

ඔබ ආලෝකයේ කාන්තිය

නිවැරදිව දැක නැත..

සත්‍ය සෙවුමට ආලෝකයේ කාන්තිය දකින්න..

පාෂාණය හිමි ආනි ෆ්‍රාග්ලන්තයේ මහා ශ්‍රාවකයාට පැවසූ අවසන් වදන් පෙළ....

Hans Bemmann ගේ The Stone and the Flute ඇසුරෙනි..

Picture source : http://www.dailypainters.com/paintings/63256/Riding-The-Creek-western-horse-and-rider/ Accessed on 02nd August 2011 05.00 [Online]

චතුර....

ගිම්හානයට සැමදා වර්ෂාව අහිමිද..?

2011-08-01T17:22:00.001+05:30

ගිම්හානයේ
අහඹු ලෙස මතු වූ
ගිම්හානයට වර්ෂාව නොදුන්
වැහි වළාව මෙන්
හිස්ව තිබූ සිත් අහසට
පෑයූ ඔබ මගේ සඳ
සිත් අහසේ අමාවක උදාකර
මා හට අහිමි වේද..
ගිම්හානයට සැමදා වර්ෂාව අහිමිද..?

Picture source : http://www.thepaintingloft.com/group/jonathanwheeler/forum/topics/post-your-florals-here?commentId=4556549%3AComment%3A123029&xg_source=activity&groupId=4556549%3AGroup%3A1556 Accessed on 01st of August 2011 16.30 [Online]

චතුර....

කැරපොත්තා..

2011-07-31T05:09:00.004+05:30

චතුරට නුවරින් පාසල මාරු කරන්න වුනාට පස්සේ මාසයක් විතර ඉන්න සිද්ධ වුනේ චතුරගේ ලොකු අම්මලගේ ගෙදර. ඉතින් ඔය මාසයම වගේ එහේ ඉඳන් තමයි ඉස්කෝලේ ගියේ.ලොකු අම්මලාගේ ගෙදර තියෙන්නේ අකරවිට. ඒකියන ගම තියෙන්නේ අවිස්සාවේල්ලට කළින් හම්බවෙන කොස්ගමට කිට්ටුවෙන් තමයි.ඉතින් චතුර ඒ දවස් වල පොඩි එකා හින්ඳා කවුරු හරි ඔක්කෝම වගේ වැඩ ටික කරලා දෙනවා,ඇඳුම් ටික මැදලා දෙන එක කළේ ඒ අක්කා හරි ලොකු අම්මා හරි තමයි. චතුර ඊට පස්සේ අවුරුදු ගානක් ඉස්කෝලේ ගිය ස්කූල් වෑන් හම්බවුනේ මෙහේ ඉන්න ගිහින් තමයි. ඒ වෑන් එකේ ඇන්ටිලගේ ගෙදර තිබ්බෙත් ඔය කිට්ටුව නිසාවෙන්. ස්කූල් වෑන් එක ගැන කියවලා නැත්නම් මෙතනින් ගිහින් කියවලා එන්නකෝ.

ඔය පැත්තෙන් වෑන් එක පිටත් වෙන්නේ සාමාන්‍යයෙන් උදේ පහට පහයි දහයට විතර. ඒ ඒකාලේ අනික් ඉස්කෝල අටට පටන් ගත්තට චතුරලාගේ ඉස්කෝලේ හතයි තිහට පටන් ගත්ත නිසාත් ඔය වැන් එකේ රියදුරන්ට සහ අන්කල්ට වැඩිය වේගයෙන් රථය ගෙන යන්න බැරි නිසාවෙන්, තව ඉතින් කොළඹ තියෙන මාර්ග තදබදයය නිසාවෙන්.ඔය වෙලාවට ඔය වෑන් එකට කට්ටිය නඟින්නේ පුදුම නිදිමතකින්, ඇයි ඉතින් වෙන ළමයි සැප නින්දේ ඉන්න වෙලාවටනේ අපි ඉස්කෝලේ ගියේ. සමහරු නම් ලෑස්ති වෙලා පුටුවකට හරි වෙලා පොඩි නින්දක් දාලා ඉඳලා තමයි හෝන් එකේ සද්දේට ඇහැරිලා වෑන් එකට නගින්නේ, සමහර පොඩි ඈයෝ ලෑස්ති කරලා හිටපු ගමන්ම නින්ද යන නිසා සමහර අම්මලා තාත්තාලා වඩාගෙන ගෙනත් වෑන් එකෙන් තියන්නේ. ඔහොම යන අය සමහර වෙලාවට ඇහැරෙන්නේ ඉස්කෝල ළඟට ගියහම එහෙමත් නැත්නම් සාමාන්‍ය විදියටනම් හයයි තිහ පහුවෙලා ඉර එළිය වැටිලා වෑන් එක මාර්ග තදබදයකට අහුවෙලා ඉන්නකොට.

ඔන්න මේ කියන දවසෙත් ඇඳුම් එහෙම මැදලා කමරේ තියලා තිබ්බා, ඉතින් චතුරයත් ඇඳගෙන උදෙන්ම කාලා එහෙම (මම කෑවේ ගෙදරදි වෑන් එකේදි කන්න ගියොත් මට කන්න ගෙනියන දේකින් පොඩ්ඩක්වත් හම්බ වෙන්නේ නෑ)උදේම ඔන්න වෑන් එකට නැගලා ආයිත් නින්දට යන්න ලෑස්තිය. එදා වෑන් එක අරන් ආවේ අන්කල්. ටික දුරක් යද්දී මට දැනුනා මගේ කමිසේ ඇතුලෙන් බැනියමට උඩින් සතෙක් යන විත්තිය. ඔන්න ඉතින් චතුරයගේ ඉවසිල්ල කොච්චරද කියනව නම් ඒ වෙලාවේ මැරෙන්න කෑ ගහන්න හිතුනත් පොඩි ඇදේකටත් හිනාවෙන අක්කලා ටිකක් හිටපු හින්ඳා අමාරුවෙන් වුනත් කටවහගෙන හිටියා, සතා එහෙට මෙහෙට යනවට කමිසේ උඩින් සතාව තද කර ගෙන දැන් හෙමින් හෙමින් අත බුරුල් කරලා කමිසෙන් එළියට ගන්න ලෑස්ති වුනා, කොහොමින් කොහොම හරි අනිත් අතින් බොත්තම් දෙකක් විතර ඇරලා එළියට දාන්න හදනකොටම අතබුරුල් වෙච්චි නිසාම ද කොහෙද හිටපු සතා එළියට පැන්න, පනිනකොට පහුවෙච්චි ලයිට් කණුවක එළියෙන් තමයි තමයි දැක්කේ නිකන් කටු කටු වගේ බැනියමට උදින් දැනුනට ඉඳලා තියෙන්නේ කැරපොත්තෙක් කියලා, හම්මේ චතුරයට දැනුන නිදහස නිකන් නිවන් ගියා හා සමානයි( තාම නිවන්වත් පත්තු කරගෙනවත් ගිහින් නෑ අහන්න එපා නිවන් ගියාද කියලා).

ඔය ටික ඉතින් කාට වත් පෙනුනේ නෑ මොකද ඒ වෙලාවට කරුවලයි සහ කට්ටියම සැප නින්දෙනේ. අනික චතුර තමයි ඒ කාලේ අන්තිමට නගින එක්කෙනාට කලින් වෑන් එකට නගින්නේ, මේක වුනෙත් ඒ අන්තිමට නගින අක්කා නැගල පිටිපස්සට ගියාට පස්සේ. ඔන්න ඉතින් චතුරයත් මුකුත් නොවුනා වාගේ බොත්තනුත් දාගෙන ආයිත් නිදියන්න ලෑස්ති වුනා, කොටින්ම කිව්වොත් චතුරයා ළඟින්ම ඉඳගෙන වෑන් එකේ ගිය කල්පයටවත් වැඩේ මීටර් නෑ.චතුරයා සැනසුනේ වෙනමොනවත් හින්දා නෙවෙයි චතුරලාගේ සීට් එකට පස්සේ සීට් දෙකක තිබ්බ යස්සනියන්ගේ පාරාදීසයේ(ඒකාලේ කිව්වෙ ඔය නම , නමට හේතුව හිටිය අක්කලා සහ නංගිලාගේ හපන්කම් තමයි ) කිසිමකෙනෙකුට ඕක නොදැනුන එක නිසාවෙන්.නැත්නම් ඉතින් චතුරයට පොළොව හාරගෙන තමයි යන්න වෙන්නේ.

කැරපොත්තා ආයේ ආවොත් හොඳ පාරක් දෙන්න පොතකුත් අරගෙන චතුරයා ආයිත් නින්දට යන්න ලෑස්ති වුනා, ඔන්න වෑන් එක තව ටික දුරක් යනකොට පිටිපස්සෙන් මර ලතෝනියක් ඇහෙනවා "බුදු අම්මෝ මෙන්න මොකෙක්ද මගේ ඇගේ යනවෝ "කියලා, තව මිනිත්තුවක් විතර යද්දී මර ලතෝනිය දෙගුණ තෙගුණ වුනා , ඒකට තවත් ඒ පේළියේම හිටපු අක්කෙකුයි නංගියෙකුයිත් හවුල් වුනා. ඔන්න අඩ නින්දේ වාගේ හිටපු වෑන් එකේ ඇන්ටි විතරක් නෙවි නිදාගෙන හිටපු මුළු වෑන් එකම ඇහැරුනා. ඇන්ටි ඉක්මනට නැඟිටලා "ආනන්ද ආනන්ද පොඩ්ඩක් නවත්තන්න කියලා " ලයිට් එහෙම දාල තව තිබ්බ ටෝර්ච් එකකුත් අරගෙන(උදෙන් යන නිසා වෙන් ගෙදර ඉඳන් පාර අයිනට එන්න වෑන් එකේ සමහර ළමයි ගාව ටෝචුත් තිබුනා ඒ කාලේ ) සෝදිසි මෙහෙයුම දියත් කළා, අන්තිමට වෑන් එකේ පිටිපස්සේ පේළි ඔක්කෝගෙම අක්කලා නංගිලාගේ ඇගේ සැපට ඇවිදපු කැරපොත්තාව අන්කල් වෑන් එකෙන් එළියට විසි කළා.
ඔය අතරේ නැඟිට ගත්තු කල්පයා මේ කැරපොත්තා කරපු දේටපින් දෙනවා මොකද පොඩ්ඩ ඇත්තන් ඒකාලේ යස්සනියන්ගේ පාරාදීසේ අක්කලා කරන කියන දේවල් මතක් වෙලා.

පස්සේ උපකල්පනය කරපු විදියට කලින් දවසේ අයන් කරලා රැක් එකේ එල්ලලා තිබුණ කමිසෙට අඳිද්දී දැක්කේ නැති වුනාට කැරපොත්තා නැඟලා ඉන්න ඇතියි කියන එක. ඊට පස්සේ නම් සේප්පුවක දාලා තියලා ගත්තත් චතුර ඇඳුමක් අඳිද්දී සියපාරක්වත් සෝදිසි කරලා ගසලා බලලා මිසක් නම් ඇන්ඳේ නෑලු.

Picture source : http://www.srilankamirror.com/english/index.php?option=com_content&view=category&layout=blog&id=1&Itemid=18&limitstart=2900 Accessed on 31st July 2011 5.05 [Online]

චතුර....

යකුන් අප සිතනා තරම් කළු නැත..

2011-07-28T20:31:00.001+05:30

බලා සිටියෙමි
හමුවනතුරු සැඩ වාග් ප්‍රහාරයක්
නොසැලි සිටියෙමි
සිතට එඩි ගෙන
විපත දැන් දැන් එයි කියා
නමුදු කිසිවක් සිදු වූයේ නැත
සිංහ සෙයියාව
රඟ දුන්නාට
යකා හට කළ හැකි
වැඩක් නොම නැත
හීන් සැරයට යකා බයව ඇති සැටියකි,
කළ හැකිව තිබු
එකම දෙය වන උමතු සුනඛ රැඟුමද
සැනින් නිම විය.

යකුන් අප සිතනා තරම් කළු නැත..

Picture source : http://maximuminsanity.blogspot.com/2007_06_01_archive.html Accessed on 28th July 2011 20.00 [Online]

චතුර....

පරවේණි උරුමය....

2011-07-28T09:04:00.001+05:30

අඩු නැතිව
වැඩි නැතිව
මටත් ලැබුනා
පරවේණි උරුමය
උරුමයද කරුමයද
නොවිසඳිය හැක එය
පලක් ඇති මුත්
පලක් නැති ලෙස මටම එය එපා වන තරමටම
පරවේණි උරුමයට
ඇත යොමුව ගිජු ලිහිණි ඇස්
ඔබ නැති නිසාවෙන්
සිටින ගිජු ඒ තන්හාපතින්..
පලවා හැරුමට එක් සරින්
නැවත නොම හෙලනා ලෙස ඒ බැලුම්
පියාණෙනි නැවත එනු මැන
සවිය වනු මැන
හිඳිනු ලෙස මා පසුපසින් ..

Picture source : http://trip2orissa.com/orissa-paintings.html Accessed on 28th July 2011 07.00 [Online]

චතුර....

බාලගිරි සහ මම....

2011-07-27T20:27:00.003+05:30

උදේ 7 ට - ඊයෙත් පටන් ගන්න බැරි වුනා අදවත් පටන් ගන්න ඕනේ..

උදේ 8 ට - කාලා පත්තරෙත් බලලම පටන් ගන්නවා..

උදේ 9 ට - සින්ඩිය පැත්තත් බලල තවත් ටිකක් කියවලම පටන් ගන්නවා..

උදේ 10.30 ට - හොඳ ෆිල්ම ටිකක් හම්බ වුනා මේක ඩවුන්ලෝඩ් වෙන්න දාලා අළුතෙන් දාල තියෙන බ්ලොග් පෝස්ට් ටිකත් කියවලම පටන් ගන්න ඕනේ..

11.30 ට - ඔන්න ඔහේ ගෙදර ඉන්න තියෙන දවස් ටිකනේ මේ මූවි එකත් බලලම පටන් ගන්න්නවා...

දවල් 2 ට - ඔන්න ඔහේ කාලාම පටන් ගන්නවා..

2.30 ට - අළුතෙන් පෝස්ට් එකක් ලියන්න ඕනේ..

2.45 ට - මේක පස්සේ ඉවර කරනවා, දැන් අර නවකතාව භාගයක් වත් කියවලා ඉවර කරන්න ඕනේ....

හවස 4 ට - පුතේ ගෙදර ඉන්න දවසනේ මම පිහදලා දෙන්න ලස්කාව නාවන්න..

හවස 4. 30 ට - පුතේ මට පන්සල් යන්න තියෙනවා මල් ටිකක් කඩලා දෙන්න..

4.45 - ඔන්න ඔහේ අර පෝස්ට් එකේ ඉතුරු ටිකත් ලියලා ඉවර කරන්න ඕනේ..

5 ට - මූණු පොත පැත්තේ ගිහින් චැටක් දාලම පටන් ගන්නවා..

6. 30 ට - පොඩ්ඩෝ මෙන්න මේක කරලා දෙන්න මට යාළුවෙක් හම්බ වෙන්න යන්න තියෙනවා , ඕක හෙට දෙන්න ඕනේ..

8 ට - පුතේ මෙන්න ඔයාට දිලීපගෙන් කෝල් එකක්..

8.45 ට - ඔන්න ඔහේ නාට්‍යයත් බලලම පටන් ගන්නවා..

9.30 ට - ස්කයිපියෙන් " මචාන් චතුර මෙන්න මේක වැඩ කරන්නේ නෑ පොඩ්ඩක් බලපන් ", චාලි

10.30 ට - Gtalk එකෙන් ශශික " මචන් මේල් වගයක් එව්වා පොඩ්ඩක් බලපන් "

11 ට - පොඩ්ඩෝ වැඩේ ඉවරද ..? "න් නෑ මේ තව පොඩ්ඩක් තියෙනවා දැන් ඉවර කරලා දෙන්නම් "

රෑ 11.30 ට - ස්කයිපියෙන් චාලි ," මචාන් මේක මම වෙනස් කළා දැන් මේ පාට් එක වැඩ නෑනේ.. පොඩ්ඩක් බලපන්.."

12.30 ට - අරයගෙන් කෝල් එකක් " ඔයා මේ දවස් ටිකේ ගෙදරනේ ඉන්නේ මගේ මේ ප්‍රොජෙක්ට් එකට පොඩ්ඩක් උදවු කරනවද..? "

පාන්දර 1.30 ට - මේසේ උඩ "ග ර් ර් , කු රූ ස් ස් , ග ර් ර්"

පාන්දර 2 ට - අම්මා,"කොච්චර කිව්වත් අහන්නේ නෑ රෑ තිස්සේ ඇහැරගෙන මේක ඉස්සරහම තමයි නිදියන්නේ , මම මේන් එක ඕෆ් කරන්න කලින් ඕක නිවලා ඇඳට ගිහින් නිදිය ගන්න"

පාන්දර 2.01 ට - ඇඳටගිහින් ලැපෙන් කරන්න පටන් ගන්නවා..

පාන්දර 2.02 ට- ලැප ඔන් කරයි

පාන්දර 2.30 ට ඇඳ මත නින්දෙන් , " කෝ අර පරණ ඩොක් එක "

පාන්දර 3.01 ට - නින්දෙන් ඇහැරී," ඔන්න ඔහේ හෙටම පටන් ගන්නවා..", 'ලැප නිවා දමයි'

බාලගිරි අද නොවෙයි හෙට ....

Picture source : http://www.balkhis.com/random-blurbs/7-unhealthy-habits-that-affects-your-productivity/ Accessed on 27th July 2011 20.00

චතුර....

අපේ ප්‍රධානියා..

2011-07-26T15:44:00.000+05:30

අපි වැඩක් කරන්න වැඩිපුර වෙලාව ගත්තොත්

ප්‍රධානියා කියන්නේඅපි හෙමින් වැඩ කියලා

ප්‍රධානියා වැඩක් කරන්න වැඩිපුර වෙලාව ගත්තොත් ඒකට කියන්නේ

සර්ව සම්පූර්ණ කටයුත්තක් ඔහු සාර්ථක නිම කරන්නෙක්

අපිට වෙලාවට වැඩක් ඉවර කරන්න බැරි වුනොත්

අපිට කියන්නේ අපි කම්මැලියෝ කියලා

ප්‍රධානියාට වෙලාවට වැඩක් ඉවර කරන්න බැරි වුනොත්

ඒකට කියන්නේ එයා කාර්‍යබහුලයි කියලා..

අපි හොඳට වැඩක් නිම කළොත්

ඒක ප්‍රධානියාට මතක නෑ

අපි අතින් වැරැද්දක් වුනොත්

ප්‍රධානියාට කවදාවත් ඒක අමතක වෙන්නේ නෑ

ඔක්කොම ප්‍රධානියෝ එක වගේද..?

ඒත් මෙහෙමත් හිතුවොත්

ප්‍රධානියා කියන්නේ හැම වෙලාවෙම සේවකයන් උනන්දු කරවන කෙනෙක්

ඔහු අතිකාල සේවයට වැඩිපුර වේතනයක් ගෙවන කෙනෙක්

සේවකයෙක් අසනීප වුනොත් ඔහු රෝහලටම ගිහින්

සේවකයන් මුණ ගැහෙන කෙනෙක්

සේවකයෙක් අතින් වරදක් වුනොත්

එය නැවත නිවැරදි කරගන්න දෙවන අවස්ථාවක් දෙන ඉවසන කෙනෙක්

ඔහු ඔබේ ප්‍රධානියා වුනොත්....

Picture source : http://www.realsoftwaredevelopment.com/software-developers-guide-to-managing-your-boss/ Accessed on 26th July 2011 14.00[ Online]

Picture source : http://www.soannoying.com/blogs/b/1516 Accessed on 26th July 2011 14.00[ Online ]

Love you Mr. Kalakaar ඇසුරෙනි.

චතුර....

සාරිය..

2011-07-25T21:09:00.000+05:30

නිවාඩු දවසනේ ඔන්න ඉතින් පොඩි පොඩි වැඩ වගයක් කරගන්න තිබ්බ නිසත් පොඩි වෙනසකටත් එක්ක කියලා අම්මයි මමයි අයියයි ඔන්න ඊයේ පොඩි සාප්පු සවාරියක් වගේ එහෙමත් නොවෙන ගමනක් ගියා.

කොහොමින් කොම හරි ඔන්න අපේ අම්මත් අන්තිමට ඇඳුම් සාප්පුවකට ගොඩ වෙන්න තීරනය කළා, " අම්මා මල්ලිත් එක්ක යන්නකෝ මම වාහනේ ඉන්නම්" ඔන්න අපේ අයියා ශේප් වෙන්න ලෑස්තිය," නෑ නෑ ඔයත් යන්" ඔන්න ඉතින් අපි දෙන්නත් එක්ක ඉතින් අපේ අම්මත් ඇඳුම් සාප්පුවට ගොඩ වුනා.

" ආනේ කාලේකින්නේ දැක්කේ ඔයාව ඥානේ( අපේ අම්මව මිතුරියන් අමතන ආකාරය )" කියාන එක පාරටම ආවේ අපේ අම්මගේ පරණ මිතුරියක්." ආ රංජි ඔයා" ඔන්න අපේ අම්මත් ඇඳුම් තේරිල්ල පැත්තක තියලා ඔන්න කතාව , ටික වෙලාවකින් අපි දෙන්නා දිහාවටත් හැරිලා මොනවද මොනවාද කිව්වා ඉතින් අපිත් හිටපු විදියටම හිටියා, ඔන්න ඊළඟට යාළුවා ගියාම තමයි අපි හැමදාම බය අති භයංකාර වෙලාව ඊයෙත් ආවේ. ඒ තමයි ඉතින් සාරි තේරිල්ල. ඔන්න ඉතින් සාරි පෙන්නන්න ගෑනු ළමෙකුත් ආවා, " අනේ පව් මෙයාට සොරි.කොම් තමා" අපේ අයියත් එයාට පොඩි බැල්මක් දාන ගමන් කිව්වා.( මෙයා ඉතින් කොතන ගියත් ඇහැට ප්‍රිය දසුනක් වුනත් අප්‍රිය දසුනක් වුනත් "නියම කුකුළා" , වෙලාවට බ්ලොග් කියවන්නේ නැත්තේ සිකුරා නලලේ නෙවි සරුවාංගෙම කියලා හිතා ගත්තොත් තමයි හොඳ ..)

ඔන්න ඉතින් අම්මා අපි දිහාට හැරිලා අහනවා
" මේකෙ පාට හොඳද ?"
" හොඳයි හොඳයි ඕක තමයි ලස්සනම" ,අපි

"ඒත් මේක නිකන් අවුට් ඔෆ් ෆැශන් වගේ නේද?"

"මේක හොඳද ?",අම්මා

"ඔව් ඔව් ඒක අරකට වැඩිය හොඳයි ", අපි

"මේක හොඳද?",අම්මා

"ඔව් ඔව් ඕක තමයි දැන් ට්‍රෙන්ඩ් එක", අයියා

" ඈ.. ?තමුසේ කෝමද සාරි ට්‍රෙන්ඩ් දන්නේ ??" ,මම

"ඉක්මනට ගෙදර යන්න ඕනේ නම් කට වහගෙන හිටු " , අයියා අයියා කනට කර රහසින්..

"අනේ මංද මේක මගේ ඇඟට හරියන එකක් නෑ ", " මේක ලස්සනද..?", අම්මා

"ඔව් ඔව් ඕක තමයි අපේ ලෙක්චරර්ස්ලත් දැන් අඳින්නේ" මම

" තරුණ අය අඳින එව්ව මේ වයස මට හරියයිද? " අම්මා

"ඕකනේ කිව්වෙ , කට වහගෙන හිටු" ,නැවතත් අයියා කනට කර රහසින්

" මේක නම් මගේ හිතට ඇල්ලුවා"

"ඔව් ඔව් ඕක හොඳයි "අපි

" නෑ ඒත් මේක ඇන්ඳම ටිකක් පිම්බෙනවා වගේ මැටීරියල් එකක් වෙන එකක් බලමු "අම්මා

" මේ මැටීරියල් එක හරි නෑ ඕක ඉක්මනට ඩැමේජ් වෙනවා "
" ඔය පාට දෙකක්ම මං ගාව තියෙනවා ඒක නිසා ඔය පාටින් එපා",අම්මා .............................................................................................................
.............................................................................................................
.............................................................................................................
..................................................................................................................................................................................................................................................................................................................................................................................................................................................................................................................................................................................................................................................................................................................................................................................................................................................................................................

සංවාදය තව පැයක් හමාරක් දිග්ගැස්සුනි.අවසානයේ සොයාපු දේ සම්භ විය. සාරිය ගත්ත අම්මාට වඩා සංතෝස අපිටය. "වෙලාවට අක්කා ගෙදර නැත්තේ නේද?" මම අයියාගෙන් ඇසිමි "අනේ වාසනාවන් නැත්තන් ඇඳුම් සාප්පු වලටම ඉරිදයි සෙනසුරාදයි යයි " අයියා. අක්කා විවාහ වීමට පෙර රෙදි යාරයක් මිලට ගැනීමට කඩ සාප්පු ගණනාවකට ගොඩ වී අවසානයේ රෙදි රෝල් දහසක් පමණ පෙරලා රෙදි යාරය මිලට ගත් සැටි මට මතක් විය.

අම්මලාට අක්කලාට මේ වගේ පැය ගානක් ඇඳුම් තෝරන්න යන එක නම් ලොකු ප්‍රශ්නයක්. කාන්තාවන් එක්ක සාප්පු සවාරි යන වෙලාව දා ගන්නකොට පොඩ්ඩක් වැඩියෙන් වෙන කාර්‍යයකට යන වෙලාව මෙන් දෙගුණයක් වෙලා යොදා ගන්න.ගොඩාක් වෙලාවට සරිලන මිලට හිතන හරියන එකම සෙවීමට කාන්තාවන් දස්සියන් නිසා මෙයට වේලාව ගත වීම වැඩි වනු ඇත.

මගේ අවවාදය :අම්මලා අක්කලා එක්ක හෝ ඔබගේ සහකාරිය සමඟ සාප්පු යනවිට පරිස්සම් වන්න, ඉක්මනට ඒමට අවශ්‍ය නම් තේරීමට ඔබ මැදිහත් නොවන්න.

Picture source : http://www.thehindu.com/todays-paper/tp-national/tp-andhrapradesh/article2052836.ece Accessed on 25th July 2011 20.00 [Online]

චතුර..

ඔයා කොහෙද..?

2011-07-25T19:46:00.001+05:30

හෙලෝ
ඔයා කොහෙද?
මම හොස්පිට්ල් එකේ
ඔයා කොහෙද?
බස් හෝල්ට් එකේ
ඔයා කොහෙද?
මම බස් එකේ
ඔයා කොහෙද?
බස් එකෙන් බහින්න මේ යන්නේ
ඔයා කොහෙද?
මම පුස්තකාලේ
ඔයා කොහෙද?
මම යාළුවොත් එක්ක ඉන්නේ
ඔයා කොහෙද?
මම අද යාළුවොත් එක්ක ඩිස්කෂන්
ඔයා කොහෙද?
මම ලෙක්ච'ර්' එකක ඉන්නේ
ඔයා කොහෙද?
අම්මත් එක්ක ඇඳුම් ගන්න ආවා
"ඇයි මල හත්තිලව්වේ ගෙදර ඉන්නේ කොයි වෙලාවටද?"
මෙහෙම හිතුනට මම කොහොමද ඔයාගෙන් එහෙම අහන්නේ....

Picture source : http://annliciousy.tumblr.com/post/4254186283/this-reminded-me-of-where-are-you-now-by-britney Accessed on 25th July 2011 19.30 [Online]

චතුර....

හලාගෙන ඩයි කුප්පියක්..

2011-07-24T06:02:00.000+05:30

ඉපදෙන සැවොම
වයස්ගත වන බව දැන
රූපයෙන් මන්මත්ව
සිටිනු රිසි සැම දිනෙම
අනුන් රවටනු පිණිස
මවා බොරු රූපයක්
හලාගෙන ඩයි කුප්පියක්
තම රුව ඇති සැටි
පෙන්වුමට කිමද ඒ හිරිකිතක්
සියළු දේ නැසෙන්නෙය
ඔබට පමණක් නොව සැමට එය පොදු දෙයකි
ඔබත් මහළුව දිරයි
තමා මිස අන්කෙනෙකු නොවේ ඒ රුව තුලම
ලෝධර්මතාවයට
පිටු නොපා සිටියේ නම්
අනුන් රවටනු පිණිස
කිමට තව බොරු රන් රූපයක්..

Picture source : http://www.clubplanet.com/Articles/2223/Hair-Dying-101-Stop-Worrying-and-Love-the-Bottle Accessed on 23rd July 2011 22.30 [Online]

චතුර....

මරණය අභියස හිඳ..

2011-07-23T09:41:00.000+05:30

දියට බසින විට
සිතුනෙද කිසිවිටෙකත්
සැණෙන් මහදිය කඳක් ගලයි කියා
මහදිය කඳක් ආවත්
සැඩ වේගයකින්
සිතුනෙද සැඩපහරට හසුවේවි කියා
කාලය වෙනස් වන සැනෙකින්
වන සිදුවීම
මරණය සිදුවන්නේ අසවල් වෙලාවේයයි
මරණය අභියස හිඳගෙනවත්
කිය හැකි හපනෙක් වේද
පහලව මේ දියත..

දියට බසින විට අනතුරක සේයාවක් නැතත් සැමවිටම අනතුර ගැන විමසිලිමත් වන්න..

චතුර....

ප.ලි. මුලින්ම කොමෙන්ටුව දාන එක්කෙනා මධුරංග අයියට විස්තරේ ලියලා කොමෙන්ටුව දානවනම් හොඳයි..

මමී පපා පපී ජූස් පාන් චූස් ..

2011-07-22T21:59:00.000+05:30

රෝහිනී නැන්දට

ආන්ටි මයි ඩාලින්

අල්ලපු ගෙදරට අලුතෙන් ආපු අක්කා කිව්වලු

මිසිස් පෙරේරා අනියන් එකක් දෙනවද කියලා

අල්ලපු ගෙදර නැන්දා ආවලු

තව ශුගර් ටිකක් තිබ්බා නම් ඔයාගේ ඩ්‍රින්ක් එක මරු කියලා

ඒ මාමා කිව්වලු

මල්ලි අපි ප්ලේ කරමු කියලා

ඒ පොඩි එකා කිව්ව්වලු

මේවා අහපු අපේ පොඩි එකා

"මමී පපා පපී ජූස් පාන් චූස් "

කියලා කිව්ව්වලු..

තේරුම
"අම්මේ තාත්තා පරිප්පු හොඳි එක්ක පාන් කනවා.."

Picture source : http://www.crestock.com/image/20113-Shopping-family.aspx Accessed on 22nd July 2011 20.30 [Online]

චතුර....

නිහඬ උත්තරය..

2011-07-22T20:08:00.001+05:30

හිතට ආපු කේන්තියට

නිවෙන්නට ඉඩක් ඉඩක් නොදී

වචන දෙකක් කියෙවුනාට

මට ආපහු ඒ ගැන කියන්නේ නැතුව

මුකුත් නොවුන තරමටම

ඔය ලෙංගතු හිනහවෙන්

ඔය ආදර කතාවෙන්

දීපු නිහඬ උත්තරය

සැරයි අතුල් පහරකට වැඩියෙන්..

Picture source : http://www.blogcatalog.com/blogs/ishita-bandyo-fine-artsAccessed on 22nd July 2011 19.30[Online]

චතුර..

මගේම අදහස..

2011-07-22T06:29:00.001+05:30

මමම හොඳයි කියාපු

මමම හොයලා දීපු

මටම හිතුනු

මගේම අදහස

මගෙන්ම අහගෙන

මාව අමතක කර

මගේම අදහස උඹලගේ කරගෙන

උජාරුවෙන් මටම පෙන්නපු හැටි....

Picture source : http://www.wiggz.com/blog/art/tag/paintings/page/2/ Accessed on 27th July 2011 06.00 [Online]

චතුර....

මී දරු ප්‍රසූතිය....

2011-07-21T15:20:00.000+05:30

මේ සිද්ධිය වුනේ අපි ගිය ජීව විද්‍යා පන්තියේදී. අපි කියන්නේ මගේ හොඳම යාළුවා හිරාන් , එයා තමයි ඉතින් ඒ කාලෙත් අදත් ඉන්න හොඳම යාළුවා. අපි ජීව විද්‍යාවට ගියේ කොළඹ දිස්ත්‍රික්කයේ ප්‍රධාන ජීව විද්‍යා

ගුරුතුමියකගේ පන්තියට. මිස්ගේ නම මෙතන කියන එක හරි නැහැනේ ඒක හින්ඳ මිස්ගේ නම විදියට හවස මිස් කියලා කියන්නම්. මේ මිස් ඒකාලේ එක අවුරුද්දක ශිෂ්‍යයන්ට පන්ති තුනක් පැවැත්වුවා. අපි ඉතින් සහභාගී වුනේ ගෙදර පන්තියට තමයි. මිස්ගේ ගෙදර තියෙන්නේ හෝමාගම. ඒකාලේ මිස් හිටියේ හරියටම මොන ඉස්කෝලෙද කියලා මතක නෑ මට මතක ඇති විදියට කනත්ත බාලිකාවේ හරි කනත්තේ අනිත් පැත්තේ තියෙන දොන් ඉස්කෝලේ හරි තමයි. දැන් නම් මේ ගුරුතුමිය මිගාර මාතා බාලිකාවේ ජීව විද්‍යාව උගන්වනවා කියලා තමයි ආරංචිය.

කොහොමින් කොහොමින් හරි ඔය මිස්ගේ පන්ති තුනෙන්ම අඩුවෙන්ම ළමයි හිටියේ ගෙදර පන්තියේ තමයි. ඒ ගෙදර පන්තියට ළමයි එන්න අකමැති වෙච්චි හින්ඳා නෙවෙයි ගෙදර පන්තියේ ඉඩ තිබ්බෙ ටිකයි ඒ ටිකත්

නිකන් පොල් පටවල වගේ ශිෂ්‍ය ශිෂ්‍යාවෝ ඉඳගෙන හිටියේ. කොහොම වුනත් මිස්ගේ පන්ති වලින් සුව පහසුවයි පුද්ගලික අවදානයයි අනික්වාට සාපේක්ෂව වැඩි ගෙදර පන්තියට නිසා ගෙදර පන්තියට තමයි වැඩිම

ඉල්ලුමක් තිබුනේ. ගෙදර පන්තියට සහභාගී වෙන්න තිබ්බ තරඟය නිසාම පන්තියට ඇතුලත් වෙන්න චතුරයයි හිරානයයි අම්මලත් එක්ක පන්තියට නම දෙන්න ගියේ සාමාන්‍ය පෙළ විභාගය ඉවරවෙලා දවසක් හරි දෙකක්

හරි ඇතුලත. ඒ වෙන කොටත් ළමයි දහයක් විතර නම් භාර දීල තිබුනා, හිතා ගන්න පුළුවන්නේ ඔය පන්තියට ඇතුලත් වෙන්න තිබ්බ තරඟය.

පන්තියට සහභාගී වුනාට පස්සේ තමයි දැන ගත්තේ අපේ පන්තිවලම තවත් දෙතුන් දෙනෙක්ම ඔය පන්තියට සහභාගී වෙනවා කියලා. ඒ අයගෙන් එක්කෙනෙක් තමයි තිරංග. ටිකක් විතර කට හැකර ( ටිකක් නෙවි හොඳටම ) කළොත් අණ්ඩපාල වැඩක් කරන ජාතියේ කෙනෙක් තමයි තිරංග. මේකා කරපු වැඩ ගැන නම් වෙනම බ්ලොග් එකකුත් ලිව්වැකි. දවසක් මේකා ඔය පන්තියට යන අතරමඟ තිබ්බ රේල් ගේට්ටුවක් කෝච්චියක් එනකොටම ඇරලා දාලා තව පොඩ්ඩෙන් බයිසිකලයක් කඩාන බිඳගෙන කෝච්චියට යනවා. අනූනමයෙන් තමයි බේරුනේ. පොඩ්ඩක් නෙවි ගොඩාක් හොල්මන් මේකාට නම් .ඉතින් තිරංග පන්තියේ හැසිරුනේ කෝමද කියනවා නම් මෙයා සහ කුකුබිටා නංගි හවස ගුරුතුමීගෙන් බැනුමක් අහගත්තේ නැති දවසක් නැති තරම්.

කුකුබිටා නංගිත් ඒකාලේ පන්තියට ආපු හයේ හතරේ සයිස් එකේ ඇඟක් තියෙන නංගි කෙනෙක් .හැබැයි මෙයා ගෑනු ළමෙක් වුනාට කරන්නේ පිරිමි ළමයි කරන වැඩ ඒක නිසා තමයි මිස්ගෙන් මේ දෙන්නම මොකාක් හරි අහගන්නේ. ආ කුකුබිටා නංගිට නම වැටුන විදියත් කිව්වේ නැත්නම් ලොකු හිස්තැනක්, කුකුබිටා කියන්නේ වට්ටක්කා වල විද්‍යාත්මක නාමය මට මතක විදියට. වෙන ඉතින් ඕකේ නම දැම්ම ආගිය මුල ගිය තැන් කියන්න ඕනේ නැහැනේ.

කුකුබිටා නංගි ඉන්නේ චතුරයි හිරානුයි ඉඳ ගන්න පේළියට ඉස්සරහ එතකොට තිරාංග ඉන්නේ අපි ඉඳගන්න පේළියට පිටිපස්සේ. මේ දෙන්න ඉන්නේ පේළියක් අතර වුනාට ගනුදෙනු එක පේළියේ ඉන්නවා වගේ තමයි.තව කියන්න ඕනේ මේ හවස මිස්ගේ ගෙදර උයන්න ආච්චියෙක් හිටියා. ආච්චිට රසට උයන්න පුළුවන්. ආච්චි උයන කෑම රසයි කිව්වේ කාලා එහෙම නෙවෙයි හවස මිස්ගේ පන්තිය තිබ්බේ ගෙදර උඩ තට්ටුවේ හරියටම එතන පහලින් තිබ්බේ හවස මිස්ගේ ගෙදර කුස්සිය. කෑම රසයි කිව්වේ හැමදාම උඩට එන සුවඳ නිසා. මේ සුවඳ ආග්‍රාණය කරල එදාට ස්පෙශල් තියෙන ජාතිය අනුමාන කරන්න තිරංග සහ ඒ පේළියේ හිටපු කවුරුවත් අමතක කළේ නෑ. චතුරයා සහ හිරාන් හිටපු පේළියේ හිටියේ හැමදාම පන්තියේ පරීක්ෂණයෙන් වැඩිම ළකුණු ගන්න ළමයි ටික නිසා පන්තියේ ළමයි ටික ටිකක් අමුතුවට බැළුවත් මිස්නම් ආදරේ කළේ මේ පේළියේ ඉන්න අයටයි ඉස්සරහාම පේළියේ ඉන්න අයටයි තමයි. ඔය ළකුණු වැඩියෙන් ගන්න අය අතරේ හැමදාම අංක එකට තමයි හිරාන්ගේ ළකුණු නම් තිබ්බේ. පහුගිය දවසක හිරාන්ට පන්තියේ ගෑනු ළමයෙක් හම්බවෙලා කියලා තියෙන විදියට හිරානයා සහ චතුරයා පන්තියට එනකොට ගෑනුළමයි ඒ කාලේ කිව්වේ දොස්තරලා දෙන්නා පන්තියට එනවා කියලලු.

ඒ තරමට ජනප්‍රිය සහ ඒ ගෑනුළමයා කිව්වළු චතුර දොස්තර වෙලා නැත්නම් මේ හවස මිස් පන්ති කරන එක නවත්වයි කියලා. කොහොමින් කොහොම හරි පළවෙනිපාර චතුරයා විභාගයට එදා වගේම පැය භාගයක් පරක්කු වෙලා ගිය හින්ඳා හිරාන් අද වෛද්‍ය ශිෂ්‍යයෙක් චතුරයා මෘදුකාංග ඉන්ජිනේරු ශිෂ්‍යයෙක් හැබැයි දෙන්නම දෙවෙනි පාරටත් පන්ති ගියා හොඳේ. ඉතින් ඔය පේළියේ හිටපු ළකුණු ගන්න අයගෙන් අංක එක හිරාන් වුනාට මිස් වැඩිපුරම ආදරේ කළේ චතුරයාට. ඒ මොකද කියන්න චතුරයාවත් අඩුම තරමේ පන්තියේ අනිත් එවුන්ටවත් තේරුනේ නෑ. සමහරු නම් කිව්වේ මිස්ගේ පුත්‍ර රත්නයත් මම වගේ නිසා වෙන්න ඇතියි කියලා. මිස්ගේ ආදරේ කොච්චරද කියනවා නම් අනිත් ළමයින්ට වෙන පන්තියක් ඇරෙන්න පරක්කු වෙලා පන්තියට එන්න පරක්කු වුනාම මිස් බැන්නට චතුරයා භෞතික විද්‍යා පන්තිය ඉවර වෙලා පැය භාගයක් පරක්කු වෙලා මාසයක් පන්ති ගියත් මිස් මුකුත්ම කිව්වේ නෑ. අනිත් එක මිස් පන්තියේ පාඩම පැහැදිලි කරද්දී වෙන ළමයි ප්‍රශ්න අහල යැව්වම අකමැත්තෙන් උත්තර දුන්නත් චතුරයා අත උස්සලා ප්‍රශ්නයක් ඇහුවත් මොනවත් කියන්නේ නෑ.කොටින්ම කියනවා නම් මිස්ට අදට පවා 2006 චතුර කිව්වම චතුරයව මතකලු. ඉතින් කොල්ලො සෙට් එකට වැඩිය ,"හැමදාම මේ පිරිමි ළමයි සද්දයක් නැතුව හිටියට මෙතන කෑ ගහන්නේ ගෑනු ළමයි "කියලා බැනුම් අහන කෙල්ලො සෙට් එක හිටියේ ඔය පේළියේ එකෙකුට මොකක් හරි වෙනකම්. ඇත්තටම ඔය ගෑනු ළමයින්ගෙ කෑ ගැහිල්ලට හේතුව වුනේ ඔය පන්තියේ පිරිමි ගැහැනු අනුපාතය එකට හතරක් වගේ වෙච්චි නිසයි.

චතුරයයි හිරානුනයි ඉඳ ගන්න ඩෙස් එක තිබ්බේ හරියටම පත බාල්කයක් යට. ඔන්න නියම වැඩේ වෙච්චි දවස ආවා. එදා කොහොම හරි කරපු පාඩම වුනෙත් ක්‍රියාකාරී සත්වයා පාඩමේ ප්‍රජනනය කොටස. පාඩම මැදහරියක් යද්දී එකපාරටම හිරාන්ගේ පොත උඩට රෝසම රෝස ඉපදිලා දවසක් දෙකක් ඇති ඇස් ඇරලත් නැති මී පැටියෙක් වැටුනා.මිස් නෝට් එක කියවන අතරේ ඔන්න හිරානයා දැන් මගේ ඇඟට අනිනවා, බැලින්නම් මී පැටියෙක්. දැන් දෙන්නම මේකා කොහෙන්ද ආවේ කියලා බැලින්නම් බාල්කේ උඩ නිකන් රෙදි කැලි ඒක් දෙකක් පේන්න තිබ්බා, මීයා කූඩුව හදන්න ඇත්තේ මිස්ගේ රෙදි කපලාද කොහෙද? ඔන්න ඉතින් චතුරයට ඇනපු හිරානයා කියනවා මිස්ට කියන්නයි කියලා, "මගේ පොතටයැ වැටුනේ උඹ කියහන්" මොකද නැගිටලා ගිහින් විසි කරලා එන්නවත් මේසෙට නැගලා බාල්කෙන් තියන්නවත් බෑ මේ පන්තියේ ඉඳ ගත්තොත් ඉඳ ගත්තම තමයි ආයේ නැගිට්ටොත් ඉඩ නෑ සොරි.කොම් තමයි. ඔන්න ඉතින් වදෙන් බේරෙන්න බැරි තැන චතුරයා අත උස්සලා "මිස් මිස්"කිව්වා, මිසුත් හැරිලා බලල "මොකද චතුර " කියලා ඇහුවා. ඔන්න ඉති චතුරයා හිරන් දිහාට හැරිලා "උඹ කියහන්" කිව්ව, ඒත් ඉතින් මේකා කියන පාටක් නැති නිසා අන්තිමට මමම මිස් මේ මේ කියලා තෙපර බාද්දී මිස් ළඟට ආවා. ආවම චතුරයා ඉක්මනටම හිරානයගේ පොතත් එක්කම මී පැටියා මිස්ට දුන්නා.

ඔන්න ඒ වෙලාවේ තමයි වටේම ඉන්න එවුන්ට වැඩේ මීටර් වුනේ. ඕක දිහා බලපු කුකුබිටා නංගි එකපාරටම "අනේ.. ස්වී......ට් මී පැටියා........." කියලා ඇදල පැදලා කිව්වා..ඕක ඇහුවම කොල්ලන්ට ඉතින් මොකද මිස්

ඉන්නවද කියලවත් බැලුවේ නෑ ඕකට හිනහා වෙන්න ගත්තා. ඊට පස්සේ මිස් හිරාන්ගේ පොතත් පිටින්ම මී පැටියව අරගෙන පන්තියෙන් පල්ලෙහාට ගියා. ඒ අතරේ කට හැකර තිරංගයා " ප්‍රජනනය පාඩම අතර තුරේ

හිරාන්ට මීදරු ප්‍රසූතියක් කියලා " මහා හයියෙන් කැත විදියට නෝන්ඩිය දෙනවා. ඕක අහලා ඉතින් කෙල්ලන්ට තවත් හිනා. ඒ අතරේ කුකුබිටා නංගී පිටිපස්සට හැරිලා හිරාන්ට කියනවා "අනේ ශෝයි මී පැටියා මිස් ඒකව පෙට්ටියකට දාල අපහු තියයි නේද කියලා" මේකිට මොන මී පෙට්ටිද ඔක්කොම එක්ක හිනා වෙනවා මොනව කරන්නද පේළියේ අනිත් උනුත් සද්දයක් නෑ අපි දෙන්නත් බිම බලාගෙන හිනා වෙවී හිටියා.

ඔක්කෝම හිනාවෙනවා මදිවට මේකිට මී පෙට්ටි, මේ හැල බතලිටත් ඕනේ නැති ඉලව්වක් නෑ. හිරාන් තවත් කටු කුටු ගාමින් බනින අතර කුකුබිටාට එරවූ නිසා ඇය අනිත් පැත්තට හැරී අනේ පව් මී පැටියා කියා තවත් පාරක් විස්සෝප විය.. ඒ අතරේ කට හැකර තිරංගයාට තවත් මතෘකාවක් හම්බ විය. ඒ මිස්ගේ කුස්සියෙන් රසම රස යි කියා සිතිය හැකි මස් කරියක සුවඳ ඒමයි ඊළඟට මේකා කීවේ " අලුත උපන් මී පැටිය හොද්දේ නටයි දැන්" කියාය.ඒකට මුළු පන්තියම තවත් සිනා සෙන්නට විය. ඒමදිවාට මිස් මීයාව කැලයට විසිකර පොත ආපසු ගෙනවිත් දුන්නෙන් කුකුබිටාට මී විස්සෝපය දවසේම විය. තිරංගයාගේ කට නම් වැහුනේ ම නැත . එදා පන්තිය ඉවර වනතෙක්ම මිස් සිටියද, දවසේ මාතෘකාව වුනේ මී දරු ප්‍රසූතිය සහ අලුත උපන් මී ව්‍යංජනයයි . පසුදා පාසැලට යන විටද තිරංගයා පාසලද වනසා හමාරය. හිරාන් සහ තිරංගයා එකම පන්තියේ වූ නිසා එදා උදය රැස්වීමේදීද කට්ටියගේම මාතෘකාව මීදරු ප්‍රසූතියයි. සති දෙකක් පමණ යනතුරු හිරාන් පන්තියට යනවිට කෙල්ලන් එහෙන් මෙහෙන් හිනා වෙන්නට විය.ඉන්පසුව එයද නැති විය . නමුත් ළඟදී හම්බ වුන එක්කෙනාටනම් මුලින්ම මතක් වී තිබුනේ එයයි.

Picture source : http://www.masterfile.com/stock-photography/image/614-02242767 Accessed 21st July 2011 14.30 [Online]

චතුර....

විමසිලිමත්ව තහනම් ගසට නගිනු..

2011-07-20T20:58:00.000+05:30

සැපත සොයන කළ

නොමනැති නුවණ

තහනම් ගහටමයි යොමුවන

සිත එවිට

අසුවූ කළට නොමනා කම්

කළ සොඳින

විපත ගෙනෙයි තහනම්

රස සිහි ගන්වමින..

මේ වීඩියෝවත් මිතුරෙක් විසින් මා වෙත එවන ලද්දකි. අපූරු අදහසකින් නිර්මාණය කරන ලද තවවත් අනර්ඝ වෙළඳ දැන්වීමකි. තහනම් රසය වින්ඳොත් එහි ප්‍රථිඵල විඳින්නටද වන්නේද ඔබටමය. එනිසා ඔබ ඒ ගැන සැලකිලිමත් වන්න.

සැලකිය යුතුයි

සමහර වෙලාවට ඔබ සිටින තැනම රැඳී සිටීම වඩාත් සුදුසුය..

චතුර..

බස් වෙළඳාම සහ මිතුරා..

2011-07-20T06:14:00.000+05:30

පසුගිය දිනෙක සිදු වූ සිදු වීමක් නිසා මෙම සටහන තැබීමට සිත් විය. තොරතුරු තාක්ෂන උපාධි අපේක්ෂකයන් වන අප ව්‍යාපෘතීන්හි අවසන් කාලා සීමාවේ කෙතරම් වෙහෙසක් දරනවාද යන්න ඔබට එම තත්වයේ නොසිට වටහා ගත නොහැකි යයි සිතමි. එහෙත් සත්‍ය වශයෙන්ම එය ඉතා දුෂ්කර කාලා සීමාවක් වන්නේය. මන්දයත් ව්‍යාපෘතීන් කිරීමට බොහෝ විට සිදු වන්නේ ඒ සම්බන්ධ විෂයන් ඉගෙන ගන්න කාල සීමාව අතර තුර වීම මෙයට හේතුවයි. තවද එය නිම කිරීමට ලැබෙන මාස දෙකක පමණ කෙටි කාලයත් ව්‍යාපෘතියේ ඉලක්ක සියල්ල නියම ආකාරයෙන් සපුරා ගැනීම අසීරු කාර්‍යයක් වීමත් මෙයට එක් හේතුවක් වේ. සත්‍ය වශයෙන්ම මාස දෙක හමාරක පමණ කාලයක් මෙම ව්‍යාපෘතියකට ලැබුනත් මෙම ව්‍යාපෘතිය ආරම්භ කිරීමට තරම් සෑහෙන දැනුමක් ලැබෙන්නේ ඒ ඒ විෂයය සති දෙකක් තුනක් පමණ කාලයක් හැදෑරීමෙන් පසුවය.

එම නිසා සත්‍ය වශයෙන්ම ව්‍යාපෘතියට ලැබෙන්නේ මාස දෙකක පමණ කාලයකි. ඒ කාලය අතර තුරත් දේශන වලට සහභාගී වීම දේශන වලදී ලබා දෙන විශය මාලාවේ අමතර පැවරුම් කිරීම විශයයන් තුනක් හෝ හතරක එකවර කරන්නට වීමත් යන කරුණු නිසා බොහෝ විට ව්‍යාපෘති සඳහා කාලය සොයා ගැනීම දුෂ්කරය. තවද විෂය මාලාවෙන් ලැබෙන න්‍යායාත්මක දැනුම හා ප්‍රායෝගික දැනුම තම තමන්ගේ ග්‍රහණය කිරීමේ හැකියාව දක්ෂතාව යන කාරණා නිසා

එය නිවැරදි ආකාරයෙන් තම දැනුමට තවත් එක් කරුණක් ලෙස නොව ප්‍රායෝගිකව යොදා ගත හැකි ආකාරයේ දැනුමක් බවට පත්කර ගැනීම සඳහාද අමතර කාලයක් මිඩංගු කර අභ්‍යාසයන්හි නියැලීමට සිදුවේ.මේ සියළු සකල විධ කරුණු කාරණා සම්පූර්ණ කරගෙන ව්‍යාපෘතීන් දෙකක් හෝ තුනක් එකවර කිරීමට සිදුවන අතර එය කිසිවෙකු විසින් කළ දෙයක්, උපුටා ගැනීමක් , වෙන කෙනෙකුගේ අදහසක් හෝ වෙනත් කෙනෙකුගෙන් උපදෙස් ලබා ගත්තක් නොවිය යුතුය.මේ සියළු සකලවිධ කරුණු සම්පූර්ණ කරගෙන ව්‍යාපෘතියක් සාර්ථකව නිම කර ගැනීමට භාර දීමට ඇති අවසන් තත්පරය දක්වා කාලයද අප ප්‍රයෝජනයට ගන්නෙමු. ඒ නිසාවෙන් මෙම කාලසීමාව ඉතා දුෂ්කර කාලසීමාවක් වන්නේය.

පසුගිය සතියේ දිනයක අපහට මෙම වාරයේ විශයයන් දෙකක් සඳහා වූ ව්‍යාපෘතීන් භාර දීමට සිදුවී තිබුනේ එකළඟ වූ දින දෙකකය. එම නිසා එම දින කිහිපය මමත් මාගේ මිතුරාත් වෙහෙසී නිම කිරීමට උත්සාහ ගත්තෙමු. එම දින කිහිපයම රෑ නිදිවරා වැඩ කිරීමෙන් පසු සාර්ථකව ක්‍රියාත්මකවන වැඩසටහනක් අපට නිම කරගත හැකි විය. එදින ස්වස පහට ප්‍රථමයෙන් භාර දීමට තිබූ එම ව්‍යාපෘතියේ අපට ඉතිරිව තිබුනේ වාර්තාවේ යම් යම් වෙනස් කම් කිහිපයක් කර එහි මුද්‍රණ පිටපතක් ලබා ගෙන එය අධ්‍යයන අංශය වෙත භාර දීමටයි. සියල්ල අවසන් කරගෙන එක්ව එම කටයුත්ත පැයකින් හමාරකින් ශිෂ්‍ය ශාලාවේදී අවසන් කර මුද්‍රණය කර භාරදීමට සැලසුම් කරගෙන මමත් මගේ මිතුරාත් යාමට බසයට නැගුනෙමු.

බසයට නැගුන මාගේ මිතුරා ඔහුට තදින් නිදිමත ඇති හෙයින් ඔහු නිදා ගන්න බවත් ගමනාන්තයට ළංවූ කල්හි ඔහුට ඇහැරවන මෙන් මා හට කියා නින්දට වැටුනේය. මා සිටියේ කවුළුව අසල වන අතර ඔහු එම අසුනේම අනෙක් පස හිඳ සිටියේය. ටික වේලාවක් යන විට බස් රථයට නැඟුන වෙළෙන්දෙක් කිසියම් පත්‍රිකාවක් සමඟ බ්තවත් කුඩා පොත් කීපයක් ( මා දුටු ආකාරයට මේවා පෙර පාසල් යන දරුවන් සඳහා රචනා කරන ලද පොත් විය ) එක් එක් මඟියාගේ ඔඩොක්කුවට දමන්නට විය. කිසි අයෙක් එය නොගෙනීමට අහක බලා ගත්තේ වීද , ඒත් මොහු ඒ පුද්ගලයාගේ ඔඩොක්කුවටද එය බලෙන් දමන්නට විය.

ඔහු අප සිටි අසුන ළඟටම විත් මාගේ ඔඩොක්කුවට දැමීමට පෙර මාගේ මිතුරාගේ ඔඩොක්කුවටද එය දමා ඔහු සිටි ඉරියව්වට අනූව ඒ පොත් බිම පතිත වේ යයි සිතාදෝ ඔහුව මඳක් සොලවා ඇහැරවන්නට විය. මාගේ මිතුරාටද ඉතා නරක පුරුද්දක් විය ඒ තමන් නිඳා සිටින විට වෙනකෙකු ඔහු ඇහැරවීමට උත්සාහ කළහොත් ඒ පුද්ගලයාව තල්ලු කර දැමීම හෝ ඒ පුද්ගලයාට විසිවන තරමේ පා පහරක් එල්ල කිරීමය. එය ඔහු සමඟ රාත්‍රී කාලයේ පාඩම් කිරීමට එකතුවන මගේ මිතුරන් කිහිප දෙනෙකුට අත් විඳින්නට සිදු වූ සුලභ අත්දැකීමක් විය. ක්ෂණයෙන් අවදි වූ මාගේ මිතුරාට එදිනද ඔහු බසයේ සිටින්නේ යයි අමතක විය ඇහැරවීමට සෙලවූ සැණින්ම ඔහු ඒ පුද්ගලයාට පාපහරක් එල්ල කළේය.සැනින් ඒ පුද්ගලයා විසිවී පතිත වුනේ ඉන් එහා අසුන් පෙළේ අයිනේ වාඩි වී සිටි තරමක් සැර පරුෂ මෙනුමැති තරබාරු කාන්තාවකගේ ඇඟ උඩටය. ක්ෂණයෙන් කෝප ගත් ඒ කාන්තාවද කැඳ බීලද ඉන්නේ මනුස්සයෝ හයියෙන් අල්ල ගන්න බැරිද කියමින් සිදු වූ දේ නොදැන ඔහුව තල්ලු කර දමමින් ඇයගේ අතෙහි වූ කුඩයෙන් පහරක් එල්ල කිරීමටද මැලි නොවූවාය. අවදි වූ මාගේ මිතුරාට ඔහු කළ දෙය පෙනුනේ එවිටය. කිසිදු වදනක් නොදෙඩූ එම මිනිසා නැවත ඔහුගේ පොත්පත්‍රිකාද එක්කසු කොට ගෙන බසයේ ඊළඟ නැවතුමෙන් බැස ගියේය.

ඉන්පසු සිදු වූ සිදුවීම දැක බසයේ වූකිහිප දෙනෙකුම මාගේ මිතුරාට "ඔහොම කරපු එක තමයි හොඳ වැඩේ " කියාද කීවෝය. නමුත් මම මාගේ මිතුරා කළදේ නම් කිසිසේත් අනුමත නොකරමි. නමුත් මා සිටි තත්වයද අනූව මමද එසේ සිට ඇහැර වූවානම් මටද කෝපයක් පැන නැගෙන්නට තිබිණ.නමුත් කිසිවිටෙකවත් පහර දීමට තරම් මා සාහසික නොවන්නෙමි. නමුත් මාගේ මිතුරාට නිඳා ගැනීමට එදින තිබුනේ ඒ පැයක පමණ බසයේ ගත වූ කාලය පමණි මන්දයත් එදිනට පසුදින අපගේ ඊළඟ ව්‍යාපෘතිය භාර දීමට තිබූ දිනය වූ හෙයිනුත් එහි කිරීමට තරමට වැඩ කටයුතු ප්‍රමාණයක් ඉතිරිව තිබූ බැවිනුත්ය.ඔහුට එම වැඩ කටයුතු නිම කිරීමට එදින රාත්‍රියද වෙහෙස වීමට තිබූ බැවින්ය.

මෙම බස් රථයට ගොඩ වන සමහර වෙළෙඳන් තමන් විකුණන දෑ කියා විස්තරයක් බස් රථය ඉදිරියේ කර එය කැමතිකෙනෙක් හට මිලට ගැනීමට කියා බස් රථයේ ගමන් කරයි තවත් සමහරෙක් කරන්නේ මා මිතුරා පහර එල්ල කළ පුද්ගලයා කරන ආකාරයේ දෙයකි. එය කොතරම් වදයක් වන්නේද යන්න මොහොතකට සිතා බලන්න. බස් රථයකට ගොඩ වදින අප බලාපොරොත්තු වන්නේ හුදෙක්ම ගමනාන්තය කරා යාම පමණක් නොවේ. ඒ ගමන සුව පහසු එකක්ද විය යුතුය.

සමහර විටෙක කොන්දොස්තර මෙම පුද්ගලයන් බසයට නංවා ගැනීමට කැමති වන්නේ බස් රථයේ

කොන්දොස්තරට ලබා නොදෙන මාරු සල්ලි මෙම භාණ්ඩ මිලට ගැනීමට මඟීන් වැය කරන නිසා විය හැක. අවසන ඔහු එම වෙළෙඳ අත වන සියළු මාරු සල්ලි තමන්ගේ මුදල් වලට මාරු කර ගන්න අන්දම මා අනන්තවත් දැක ඇත. බස් රථයේ පෙරකී අන්දමින් විස්තර කර තමන්ගේ වෙළඳාම කර ගන්න අයවළුන්ගෙන් මඟීන්ට වන කරදරය අවම නමුත් සමහර විටෙක මේ පොත් පත්‍රිකාවක් සමඟ දමන්නන් එය මිලට ගන්න තුරුම

මඟීන් අසලින් ඉවත්ව නොයයි. බොහෝ විට මෙය බහුලව සිදුවන්නේ කාන්තාවන්ටය, ඒ ඔවුන් මේ වදයෙන් බේරීමට මුදල් දී එය මිලට ගන්න බැවිනි. තවද හිඟන්නන් ගැනද කියනවා නම් කරුණු රාශියකි. ඒ සියළු දේ

වෙනත් ලිපියකින්මතුවට ගෙන හැර පාන්නෙමි. බස් රථයන් හි ගාස්තු සංශෝධන කරනවා මෙන්ම බස් රථ සේවාවන්හි ගුණාත්මක භාවය පිළිබඳව නීති රීති පර්යේෂණාත්මකව සංශෝධනය කිරීමට කාලය පැමිණ ඇත.

Picture source : http://www.mirissa.com/getthere.htm Accessed 19th July 20.00 [Online]

චතුර..

ඔබටත් මෙහෙම දෙයක් වුනොත්..

2011-07-18T21:23:00.000+05:30

මුලින්ම කියන්න ඕනේ මේ වීඩියෝව මගේ යහළුවෙක් එවපු විද්‍යුත් ලිපියක අන්තර්ගත වුන එකක්.එය ඉන්දියානු වෙළඳ දැන්වීමක්. සරල විදියට ඉතාමත් ගැඹුරු අර්ථයක් ඇති අදහසක් මේ වෙළඳ දැන්වීමේ දක්වා තිබෙනවා යයි සිතුන නිසා මේ සටහන තබමි.

මේ විදියටම ඔබගේ පෙම්වතිය හෝ පෙම්වතා ඔබව යම් කාලයක් ආශ්‍රය කරලා ඔබට මේ වගේ දෙයක් කිව්වොත් ඒක දරා ගන්න පුළුවන් වෙයිද?

ඔබ එය දරා ගන්න සූදානම් වුනත් නැවත කිසි දිනෙක ඔබට ඒ නිසා පසු තැවිල්ලක් ඇති නොවෙයිද..?

ඔබට එය දරා ගන්න පුළුවන්නම් ඔබ ඒ පුද්ගලයා සමඟ කෙබඳු ඇසුරක් ඉන්පසුව පවත්වයිද?

ඒ ඇසුර පෙර පරිදිම මෙම හේතුව නිසා කිසි ලෙසකින් වෙනස් වූවක් නොවෙයිද?

ඔබට එය දරා ගන්න බැරිනම් කිනම් දෙයක් සිදු වෙයිද?

ඔබ ඒ පුද්ගලායාට කිනම් ආකාරයකින් ප්‍රතිචාර දක්වයිද?

ඔබ ඒ පුද්ගලයාට වෛර කරයිද?

ඇත්තටම ඔබ ආදරය කළානම් ඔබට ඒ පුද්ගලයාට වෛර කරන්නට පුළුවන්ද?

ඇත්තටම ඒ පුද්ගලයා ඔබට ආදරය කළා නම් ඔහු හෝ ඇය ඔබව මෙතුවක් රවටාවිද?

ඔබට සිතෙන ඔබ සිතන ආකාරයට සිතා මේ ප්‍රශ්නවලට පිළිතුරු සපයා බලා ඔබත් කුමන ආකාරයක තීරනයකට යයිද කියා සොයා බැලීමට ඔබට භාර කරමි.

පුද්ගලයන් විවිධාකාරයි , එක් එක් පුද්ගලයාට දරා ගැනීමට ඇති හැකියාව ඒ ඒ පුද්ගලයාගේ ආත්ම ශක්තිය සහ වෙනත් සාධකයන් මත රඳා පවතින නිසා ඒ ඒ පුද්ගලයා මේ ආකාරයේ සිදුවීම් වලට ගන්න තීරණ විවිධාකාරයි. නමුත් හොඳම දේ තවෙකෙකු රවටා සිත දිනා ගන්නවාට වඩා සත්‍ය පවසා සිත දිනා ගැනීමයි.බොහෝවිට සත්‍ය වසන් කර අහිමි වන දෙයක් හිමි කර ගන්නට යාමෙන් එය පෙරටත් වඩා තම ජීවිතයෙන් ඈතට යාම සිදුවේවි, එය ඔබ ආදරය කරන පුද්ගලයා මත තීරණය වන්නක් .කලාතුරෙකින් අවස්ථාවක ඒ පුද්ගලයා ඔබට පෙරටවඩා ආදරය රැකවරණය ලබා දේවි, නමුත් කෙනෙකු රැවටීම කුමන අවස්ථාවකවත් අනුමත කළ නොහැකි ආකාරයේ දෙයකි.

මතක තබා ගන්න දීර්ඝ කාලීන සබඳතා රඳා පවතින්නේ එහි ඇති විනිවිද භාවය මතයි..ඔබ සබඳතාවයකදී අනෙක් පාර්ශවකරුට යමක් හංගනවානම් එය දීර්ඝ කාලීන සබඳතාවක් නොවේවි..

චතුර..

උඹේ යාළුකම..

2011-07-18T20:36:00.000+05:30

හැමදාම නිදහසේ හිතන

අනුන් ගැන දොස් උඹට නොකියපු

තමන්ගේ පාඩුවේ වැඩක් බලන් හිටපු

උඹ කියපු දේ අහන් හිටපු

යාළුකමට ඒවයේ හරි වැරැද්ද නොහොයපු

මට

උඹ ඔහොම කිව්වේ

යාළුවෝ සෙට් වුනාම මම මෙහෙමයි මගේ නෑයෝ මෙහෙමයි කියලා

පාරම් බෑවේ නැති නිසාද?

ගුරුතුමියෝ ගැන එක එක අවලම් කැත කිව්වේ නැති නිසාද?

ඉරිදා හවසට චීත්ත කොට කලිසමක් ඇඳගෙන පලක් නැතිව එම් සී එකේ

බොරුවට එහාට මෙහාට යන්නේ නැති නිසාද?

පලක් නැති දේ වලට සල්ලි වියදම් කරන්නේ නැතුව

අම්මා තාත්තාගේ දේ රැකගෙන ඉන්න නිසාද?

මම එක එක විච්චූරන නොකරන නිසාද?

අනුන් විච්චූරන නොකලාම උන් ගොඩයෝ කියලා කිව්වේ නැති නිසාද?

ඇක්සන්ට් එක දාලා සිංහලෙන් කතා කළේ නැති නිසාද?

උඹ වගේ පොර ටෝක් දීලා අන්තිමට ඒ හිස් දේ පස්සේ නොයපු හින්දද?

යාළුකමට උඹේ හරි වැරැද්ද පෙන්නන්නේ නැතුව හිටපු නිසාද?

මට ඒ මන්ද මානසිකත්වය නැති නිසාද?

Picture source : http://www.alexremy.com/2007/11/punk-paintings-for-sale.htmlAccessed 18th July 2011 19.15 [Online]

චතුර..

ඒ හිතම..

2011-07-18T19:51:00.001+05:30

එපා වුන විට

අන්තයටම ගොස් එපයි කියපු

කෝපයක් නැගුන විට

කේන්තියෙන් එපයි කියපු

දුකක් දැනුනම දුකෙන්ම එපයි කියපු

පිළිකුලක් දැනුනම

කලකිරීමෙන් එපයි කියපු

ඒ දේට

හැමදාම කියන නිදහසට කරුණුවලින්

වෙනස් වී නැවත හා කියපු

ඒ හිතම

අදත් ඔබේ නිදහසට කරුණු අසා

නැවත හා කියයිද?

Picture source : http://www.illustrationlovers.com/lauratrevey/Accessed 18th July 2011 19.00 [Online]

චතුර..

මෙහෙම අහන එක සාධාරණද..?

2011-07-18T19:12:00.001+05:30

දවස් ගානකට පස්සෙ
ඔයාගේ මුවින් අමාරුවෙන්
"මම ඔයාට කැමතියි"
කියලා අහගත්තට පස්සේ
"ඇයි ඊයේ කතා නොකළේ"
"අපි කතා කළාට
අපිට කතා කරන්න කවුරුවත් නැහැනේ"
"ඇයි කතා නොකර හිත රිද්දන්නේ"
මෙහෙම කියපු ඔයා
මට දැන් දවස් දෙකක් දීපු
නිහඬ පිළිතුරට
මට කේන්ති ආවම
"මට කතා කරන්න
බැරි වුනාට
ඔහොම කේන්ති ගන්නවද?"
කියලා අහන එක
සාධාරණයිද..?

Picture source : http://jilliebeanscene.wordpress.com/category/art/ Accessed 18th July 2011 18.30 [Online]

චතුර..

සිත නුඹ..

2011-07-17T05:58:00.001+05:30

නොලැබෙන බව

දැන දැනත්

අහිමි බව

දැන දැනත්

මිරිඟුව පසු පස

ලුහුබැඳීමට සිහින මවන

ලද දෙයින් සතුටු නොවන සිත නුඹ

වෙන්ව යාමකට සිත නොදී

වෙන්වන බැඳීම

සියළු වෙර යොදමින්

විවිධ වූ හේතු මවමින්

සවිමත් කරන සිත නුඹ

අහිමි කර ගනිම්දෝ

නැවත සවිමත් කර ගනිම්දෝ

එක හිතක් නැතුව

දෙපසට වැනෙන

අකීකරු සිත නුඹ

අහිමි වුවත් හිමි ලෙසම

පෙනෙන මායාකාර පෙම පසුපසම

දිවූ ඒ සිත නුඹය

ගලවා දැමිමි

උදුරා දැමිමි

අදිසි මිරිඟුවේ

මායාකාර බන්ධනයෙන්

හෙම්බත්ව පසු පසම දිවූ සිත නුඹ..

Picture source : http://malcolmlowryatthe19thhole.blogspot.com/2011_05_01_archive.html Accessed on 16th July 2011 23.30 [Online]

චතුර..

වාසනාවන්ත එදින..

2011-07-16T23:55:00.000+05:30

අවසානයේ පුල පුලා බලා සිටි එම දිනය උදා විය.ඒ මගේ අභාග දිනය හෙවත් විභාගයේ අවසාන දිනය වන අද දිනයයි. වෙනදාටත් කළියෙන් නැඟිට ගත් අම්මාද "ඔයාට අදත් විභාගේ නේද..?" කියා ඇසුවාය, "හ්ම්ම්ම්"

ඊයේත් හවස් වනතුරුම පන්තියකට සහභාගී වී පැමිණි නිසාවෙන් අදනම් විභාගෙට නොගිහින් නිදා ගන්න තිබ්බ නම් කොච්චර සනීපද කියා සිතමින් මම ඇඳෙන් නැඟිට්ටෙමි. "අද අයියා එක්ක යන්න එතකොට ලේසියිනේ නේද..?" අම්මා නැවතත් අසයි." හා.."

පොඩ්ඩෝ ඔයා යන වෙලාවට යන්න නම් බෑ මම යනවෙලාවට යන්න ඔයත් ලෑස්ති වෙන්න මම ඔයාව ගෙනිහින් දාන්නම්, දැන් ඉතින් ඔතන මාව කන්න වගේ ඉන්නේ නැතුව යනවා ගිහින් ලෑස්ති වෙලා එනවා මම යන වෙලාවට යන්න ඕනේ..හා හා අනේ මෙහෙමත් කරුමයක් මම යන විදියට ගියානම් ඉවරයි කියා සිතුනත් කන් කරච්චලයෙන් ගැලවීමට නියමිත වේලාවට ඉඟිලි රාජකාරී පුටුවේ වසන අපේ අයියා රත්නයට හිතින් බැන බැන ලෑස්ති වුනෙමි.

ඔය විභාගෙට යන මනුස්සයා යන්නේ අදද හෙටද කියලා අහන්ටෝ.. මෙහෙමත් මල කරුමයක් තවත් ඉවරයක් නෑ යන් යන් කියමින් අපේ අයියාගේ සෝභන සෝමාරී කිරි කිරි රථයට ගොඩ වුනෙමි.වෙනදා මෙන් නොව අයියාගේ රථයේ සිහිල් සුලන් රැලි ගත දැවටෙමින් මඟ දුරක් ආවෙමු.අමුතු ශබ්දයක්ද කර ගන්ඳයක්ද නන්වමින් අයියාගේ සෝභන කරත්තය ප්‍රථම වතාවට මඟ ඇන හිටුනි. අහෝ විපතක මහත.වාහන කුරුටු ගෑමේ ශිල්පයේ අති දක්ශයෙක් වන අයියා දන්න වැඩ කෑලි සියල්ලමද සියළුම ශිල්පයන්ද පාමින් මේ බඩකඩිත්තුව පණ ගැන්වීමට තැනුවේය, නමුත් අවසානයේ මේක බාස් කෙනෙක් ගෙන්නලා මිසක් හදන්න බෑ අපි මේක දාල ත්‍රී වීලර් එකක් ගෙන්නගෙන පාරට යමු කියා කීවේය. හාකෝ ඉතින් යමු යමු. මේක පාරේ දාල යන්න බෑ අර පල්ලෙහා තියෙන ගේ අයිනටවත් තල්ලු කරලා දාලා යන් , පල්ලමනේ පොඩි තල්ලුවක් දුන්නම ඇති..

හාකෝ නිදිමත විභාග මත පෙර දින මහන්සිය සමඟ තල්ලු කරහල්ලකො කාරුත් තුක් විතරක් , කාරයේ හිමි කරුවාගේ මා පියන්ට පින් දීමට නොහැක .එම නිසා කාරය හැදුවන්ගේ මව්පියන්ට පින් දෙමින් කාරය තල්ලු

කිරීමට පටන් ගතිමි. එය තල්ලු කිරීමට පටන් ගත් කල්හි අපේ අයියාගේ අසමජ්ජාති දුරකථනය අද දිනයේ ප්‍රථම වරට දුන් දඬුවම ආරම්භ කළේය. ඒ ඇමතුමකි ආ ඔව් ඔව් මේ මම එමින් ගමන් තමයි තවත් හෑල්ලක් දෙඩවීම ආරම්භ විය තල්ලු කරන්නට ගත් රිය මාර්ගයේ පොඩි බෑවුම් සහිත පෙදෙසක තිරිංග තද කෙරිනි. අහින්සක චතුරයාද මේ කඩිමුඩියේ මේ ඉලාවටම හේත්තු වී පාරේ කවුරුවත් තල්ලු කරන්න අඬ ගහ ගන්නවත් ඉන්නවාද කියා බලන්නට විය. තත්පර දෙකක් ගත නොවුනි හදිසියේම රථය ගමන් ඇරඹුනි හේත්තු වී සිටි එකා කෙසෙල් ගසක් කපා බිම දැමූ ආකාරයටම පාරේ පතිත විනි. හරියටම නින්දෙන් නැගිට්ටේ දැන්ය. පාරේ තිබ්බ සකල විධ කුනුද දූවිල්ලද කමිසයේය. කාරයේ සිටි එකාද බැසවිත් දූවිලි පිස දමා මා නැගිටුවේය. මරන් කන්නට කෙන්තියක් ආවත් දැන් ඉතින් මොනවා කරන්නද කියා සිතමින් මා කිසිත් නොකීවෙමි. අවසානයේ අයියා ඔහුගේ සියළු සබ්බ සකල මානාවද මගේ බෑගයට පටවමින් කාරයද මඟ නතර කර දමා මාවද බසයක නංවා වැඩට යාම පසෙක ලා ගරාජයකට යන්නට පිටත් විය.

යන්නට නැගගත් බසයද සුපිරි බස් රථයක්ම විය.එහි සිටි සෝමේ මාමලා දෙන්නාම මුලු ලෝකයටම යන අවසාන බස් රථය එය යයි සිතාදෝ ගමන් මඟෙහි වූ සියළු නැවතුම් වල සියළුම මඟීන් නංවා ගත්තෝය. නැගීමට කැමැත්තක් නැති අයවළුන්ව බලෙන් ඇද දමාගත්තේ නැති එක විතරය. කෙමෙන් කෙමෙන් බස් රථයද ගමනේ මාගේ ගමනේ අවසානයට ලඟා විය. ප්‍රශ්න පත්‍රයට විනාඩි පාලොහක්ම ඒ වනවිට ප්‍රමාද වූ හෙයින් දනි පනි ගා බසයෙන් බැසගත් චතුරයා යුසේන් බෝල්ට් ගේ පිම්මෙන් දුවන්නට විය. මෙච්චර වෙලා යස අගේට ඉඳගෙන හිටපු එකාට මොන මල යකෙක් වැහෙන්නට ඇතිද කියා බසයේ සිටි ඈයෝ කල්පනා කරන්නට ඇත.

වෙර වීරිය යොදා දුවගෙන විත් වෙනදා විනාඩි දහයක් පමණ ගතවන ගමන තත්පර දහයකින් නිමා කරමින් චතුරයා ලෝකයේ වේගවත් ගමනින් ගමන් කරන හෙවත් විදුලි වේගයෙන් යන " අප මහා සෝපනයේ " දොර

වැසීමට ඔන්න මෙන්න තිබියදී විභාග මධ්‍යස්ථානය පිහිටි සයවන මහලට යාම සඳහා එය තුලට රිංගා ගත්තේය. දෙමහලක් පමණ විදුලි වේගයෙන් සෝපානයේ ගමන් ගත් චතුරයාට සෝපානයේ ගමන් ගතහොත් විභාගය සඳහා නැවත එළඹෙන වර්ෂය තෙක් නැවතීමට සිදුවන බව පෙනී ගියෙන් නැවත දෙවන මහලෙන් සෝපානයෙන් බැස පියගැට පෙළ දිගේම දුවගෙන විත් විභාග මධ්‍යස්ථානයේ දොරකඩට වී ශාලා නාම ලැයිස්තුවේ වූ නම් කියවන්නට විය.

"අ" යන්නෙන් සහ "බ" යන්නෙන් නම පටන් ගන්නවුන් එම විභාග මධ්‍යස්ථානයට එදින සහභාගී වී නොතිබුන හෙයින් චතුරයාට හිමිව තිබුනේ අංක එකයි. චතුරයා විභාග මධ්‍යස්ථානයට ඇතුළු වූවේ "ආ දැන්ද විභාගයට එන්නේ" යයි කවුරු හරි අසයි යන නියත බයෙනි . නමුත් විභාග මධ්‍යස්ථානය භාරව සිටියේ චතුරයා හොඳින් හඳුනන දේශක වරියකි. ඇය චතුරයාට තිබූ ආසනය දක්වා ප්‍රශ්න පත්‍රයද ගෙනවුත් දී ප්‍රශ්න පත්‍රයට පිළිතුරු තබා හෝඩියේ අකුරුවත් මතකයට නො එන තත්වයක සිටි චතුරයාට දෙවරක් සුද්ධ සිංහලෙන් "කාම් ඩවුන් " කීයමින් සැනසීමට උත්සාහ කළාය. චතුරයා මධ්‍යස්ථානයේ අංක එක වූ හෙයින් ලැබී තිබුනේ දේශනා ගාරයක් වූ එම ශාලාවේ උස්ම ස්ථානය වූ වේදිකාවයි. එහි වූ ඩෙස්කුව සහ පුටුව දේශක වරුන්ට ලබා දී තිබූ ඒවාය. එම නිසා ශාලාවේ සිටිය වුන්ට චතුරයාව නව දේශකයානෝ ලෙස පෙනෙන්නට ඇත.

ප්‍රශ්න පත්‍රයට පිළිතුරු වෙන වුන්ට වඩා දෙවරක් වේගයෙන් ලියමින් සිටි චතුරයාට හුරු පුරුදු ජංගම දුරකතනයක නාදය ඇසුනි. චතුරයාට බෑගය දෙස බැලුනේ නිතැතිනි.එවරනම් දේශක තුමියට ටිකක් තරහා ගොස් ටිකක් ඔරවා චතුරයාට "ගෝ ඇන්ඩ් ස්විච් ඉට් ඔෆ්ෆ් " කියා නැවතත් සිංහලෙන් වදාලාය. අනතුරුව චතුරයා බෑගය සොයා යාමට නැඟිට්ට පමණි කකුල මේසයේ පැටලී මේසය සෙලවී ඒ මත වූ චතුරයාගේ පෑන් පැන්සල් සහ ප්‍රශ්න පත්‍රය යන සියල්ලම බිමට පතිත විය. අසල වූ යහළු බාලිකාවන් කිහිප දෙනෙකු කිචි බිචි ගෑවද දේශක තුමියගේ "කාරුණික " බැල්මේ ආනිසන්සයෙන් එය නතර විය. චතුරයා ජංගම දුරකථනය නිවා පැමින යහතින් ප්‍රශ්න පත්‍රය නිම කෙරුවේය.ඊළඟ වාරය ආවේ පිළිතුරු පත්‍රය බාර දීමටයි. වැඩි සැලකිල්ලට ප්‍රථමයෙන්ම පිළිතුරු පත්‍ර බාර ගැනීමට චතුරයා ළඟට පැමිණි දේශක තුමියට චතුරයා ප්‍රශ්නපත්‍රය ආසනයෙන් නැඟිට භාර දීමට ගියේය. කළින්වරද චතුරයාගේ කකුලේ පැටළුනු ඒ විනාශකාරී ඩෙස්කුවේ කැඩුන ලී කැබැල්ල මෙවර චතුරයාගේ සපත්තුවේ හොඳින් පැටලී තිබින. නැඟිටීමට ගිය චතුරයා හොඳින් ඩෙස්කුවද පෙරලාගෙන වේදිකාවෙන් බිමටම ,දවසේ දෙවන වරටත් බිමට පතිත විය.

විපතක මහත, එවරනම් දේශක තුමියගේ බැල්ම ගණනකටවත් නොගත් බාලිකාවෝ බෙරිහන් දී සිනාසුනහ. කවුරු කළාද යන්න දැක්කේ නැතත් ශාලාවේ පසුපසින් විසිල් නාදයක්ද ඇසිනි.නමුත් දුකට සැපට එකට සිටින

චාලියා පැමිණ චතුරයාට උදවු කළේය. ඒ විභාගය එසේ නිමා වුවද සවසද තවත් විභාගයකට මුහුණ දීමෙන් පසු අවසන් වසර සිසුන් සඳහා වූ වැඩමුළුවකට සිසුන් මදි වී ඇතැයි කියා චාලි ගොයියා කී නිසාවෙන් දුකට සැපට සනී චාලි ගොයියාගේ ඉල්ලීම අහක නොදා එයට සහභාගී වීමට තීරණය කළෙමි.

චාලි ගොයියාගේඉල්ලීමට ආවද එය ඉතා ඵලදායී එකක් විය. සිසුන්ට අධ්‍යාපන කටයුතු වලට බාධා නොවන අයුරින් "නිල් කැබලි " ආයතන කිහිපයක ප්‍රධාන පෙළේ නිළදාරීන් විසින් මෙහෙය වූ එය ආරම්භ වූයේ හවස

හතරටය. කෙසේ හෝ එය රාත්‍රී නවය දක්වා දීර්ඝ විය. දේශනයන් ඉතාමත් ලෙස සිත් ඇඳගන්න වූ නිසාවෙන් චතුරයාට එය දමා ඒමට කිසි සේත් සිත් නොවීය.බලෙන් වගේ චතුරයාව මේකට ඇදගෙන ගිය චාලි ගොයියාට

රාත්‍රී අට පමණ වන විට ගෙදර යාමේ කඩි කුලප්පුවක් සෑදින. එතැන් පටන් ඔහු "අඩේ මචාන් වරෙන් බන් යන්න" කියා දන්න එකම සිංහල පද පේළිය කියමින් චතුරයාට කන්නලව් කරන්නට විය. නමුත් චතුරයා එළියට ආවේ දේශනය නිම වී නමයයි තිහට පමණය. ඒ වනතුරු චාලි ගොයියා සිංහල භාශාවේ දන්න සියළු දෑ යොදමින් චතුරයා ආමන්ත්‍රණය කරන්නට විය.චාලි ගොයියාගේ සිංහල භාශාව සහ චාලි ගොයියා ගැන සටහනක් පසුවට තබමි. බස් නැවතුමට නමයයි තිහට ආ චතුරයාට ගෙදර යාමට බසයක් පැමිණියේ රාත්‍රී දහයට පමණය. රාත්‍රී එකොලහ වන විට පමණ බසයෙන් බැස ගත් චතුරයා ගෙදර යනවිට හතර වරිගයම චතුරයා හොයන්න යන්නට සූදානම්ය. විභාග ශාලාවේදී ක්‍රියා විරහිත කර දැමූ ජංගම දුරකථනය තවමත් එලෙසම බෑගයේ තිබෙන බව චතුරයාට මතක් වූයේ එවිටය.

Picture source : http://www.thisnext.com/tag/fabulous-life Accessed on 16th July 2011 23.00 [Online ]

චතුර..

නොදැනෙන නොහැඟෙන ප්‍රේමය..

2011-07-08T20:41:00.001+05:30

සිතින් සිතකට
පෙම් බැන්ඳත්
සිතක් පුරා
ඒ සිතට සිතුම් පිරුවත්
දහසක් සිතුවිලි මල්
සිතේ පිපුනත්
හදින් හදකට ලං වූවත්
හද පුරා පැතුම් මල්
පීදුනත්
හද බැඳි දේ දහසක් වුවත්
එහි ඇති පල කිම
එයින් එකකුදු
ඔබෙ ඔය දැඩි හිතට
රළු හදට
නොදැනේ නම්
නොහැගේ නම්

Picture source : http://www.artween.com/Artists/Debora-Laura-Campobasso/Artworks/Impossible-Love Accessed 08th July 2011 20.30 [Online]

චතුර

හුදකලා ප්‍රේමය

2011-07-07T21:24:00.001+05:30

හැමදා ඒක පාර්ශවිකවූ
නමුත් කෙටි කලෙක සිට
ද්වී පාර්ශවීය වූ
අන්ධකාර ලෝකයේ
අහු මුළු සොයමි මම එළියට එන්නට
ඔබ වැරදි කළත්
මම වැරදි කළත්
අවසානයේ මම දොස් අසන
මරණයට කැප වූවන්ගෙන්ද
අසන නිදොස් බව
කිසිදිනෙක ඔබ මගෙන් ඇසුවේද කියනු මැන
දැනේ මට වෙනසක්
සිතේ සිතුවිල්ලකි එය
ඉඩ නොදෙනු වස් එයට
දුනිමි ඔබහට දඬුවමක්
සැමදා මගේ දොස් දකින ඔබ මෙ ලෙසින්
සිතන්නට මගේ සිත පෙලැඹුනේ මේ ලෙසින්
නාමයට ද්වීපාර්ශවද
පෙම් කරනුයේ මා පමණද
නොතිබේද ඔබ සිතේ
මා කෙරේ
ප්‍රේමයක්..

Picture source : http://powerofh.wordpress.com/category/poetry/, Accessed 07th July 2011 20.30 [Online]

චතුර....

විඳින කළට..

2011-07-07T20:40:00.001+05:30

කරන කළට සිතුවද නුඹ
දුකක් දැනෙයි කියා අන් හට
හිතැසි වෙසින් හිඳ
මිතුරු කමක් පා
පාවා දීමට පැමිණි ඔබ
සිතුවද කෙදිනක මෙසේ වෙයි කියා..
වෙනෙකෙකුගේ ජීවිතය
තවෙකෙකුගේ අරමුණක්
ඉෂ්ඨ වීම වලකනු වස්
නොපනත් කම් කළ නුඹ
සිය මතය ප්‍රකට කර
එයම හැර වෙනකක් නැතැයි සිතූ නුඹ
නුඹට පමණක් නුවණැස ඇතැයි සිතූ නුඹ
අනුන් පරදවීමට
තමන් දේ කර ගැනුම පසෙක ලා
උනුන් පා පැටලවීමට ගිය කළැ
සිතුවද නුඹ හට මෙසේ වෙයි කියා..
එකෙකුගේ අහිංසක කම
නිහින කමෙකයි සිතා
උන් තලා පෙළන කළ
දැනුනෙද අනුකම්පාව නුඹ හට
සිනා නොමසෙමි නුඹ හට
වෛර නොකරමි නුඹ හට
නමුත් මම නුඹහට
කරමි උපකාරය
දෙමින් මෙම උපදේශය
නුඹ හට වුන දේ දැක
මතුවට ගෙන එය ආදර්ශය
මෙවන් අවමාන කම්
නොකරනු මින් මතුවට
කෙනෙකු රිදවූවොත්
කෙනෙකුට අවැඩක් කළොත්
සෙවණල්ල මෙන් එහි විපාකය
එනු ඇත ඔබ පසු පසින්..

Picture source : http://www.artquotes.net/artists/mccurry/regret_painting.htm, Accessed 07th July 2011 20.00 [Online]

චතුර....

අවසන් ලියුම..

2011-07-01T19:36:00.000+05:30

ජීවිත කාලයක් ඔබ හා එක්ව සිටීමට ඔබගේ දුක සැප විමසීමට ඔබව රැක බලා ගැනීමට අග්නි දළුවක් වටා ගමන් කර මා ඔබට පොරොන්දු වූයෙමි. ජීවිතයේ විවිධ වූ කටුක සමයන් හි ඔබ හා එක්ව සියල්ල සමසේ විඳ දරා ගනිමින් ඔබට මා දැක්වූ ආදරය සත්‍යයකි. නමුදු වයස් ගත වීම හෝ අප කැදැල්ලේ දරුවන් නොමැති වීම හෝ ඔබ අධික ලෙස රෝහලේ රාජකාරීන්ට කැපවූ නිසාවෙන් හෝ පසුකාලීනව අප අතර යම් දුරස් බවක් ඇති විය. ජීවිතයේ එක්ව ගමන් කළ අප දෙදෙනාගේ ඒ බැඳීම අප දෙදෙනා අතින්ම ගිලිහී ගියේ අපටත් නොදැනීමය.

පසුව ඔබ මා ගැන සොයා බැලීමද මා හට තරමක පීඩාවක් වූයේ මේ වෙන්වීම මසිතෙහි ඇති කළ යම් පසුතැවිල්ලක් බඳු වූ සිතුවිල්ලය.එය පසුතැවිල්ලක්ද එසේත් නැතහොත් මා වරදකාරයෙක් යන හැඟීම මසිතෙහි වූ නිසාවෙන් ජනිත වූ සිතුවිල්ලක්ද යන්න තේරුම් ගැනීමට මුලදී මාහට අපහසු විය. නමුදු කල් යත්ම ඒ මාගේම හෘදසාක්ෂිය මා ඔබට වරදක් කරනවා යන්න නිසා හටගත් සිතුවිල්ලක් බව මා හටම පසක් විය. දැරියක ලෙස අප හමුවට ඉගෙනීමට ආ කුසුම් කලෙකට පසු වැන්ඳඹු මවක් ලෙස සරණාගතයන් සමඟ දූපත් වාසයට පැමිණීමෙන් ඈ කෙරෙහි වූ අනුකම්පාව තවත් තීව්‍ර වන්නට විය. එය ආලයක් බවට පත් වූයේ කෙසේද යන්නත් එම ආලයට මා වාල් වන්නටත් හේතුව අදටත් මට සිතා ගත නොහැක.

හොරේන් නාස්කුර් සමඟ කුසුම් බැලීමට යාමට මා පෙළඹවීමට මූලිකම හේතුව වූයේ මෙම ආගන්තුක ආලය යයි මා තදින් විශ්වාස කරමි. ඇයට මා ආලය කළද ඈ පිළිගත්තේ හොරේන් නාස්කුර්ගේ ආලයයි.ඇය ඔහුට ආලය කරනවා යයි දැන දැනත් මා සිතේ ඈ කෙරෙහි වූ ලෙන්ගතුකම අල්පමාත්‍රයකින්වත් අඩුනොවූයේ කෙසේ දැයි මා නොදනිමි.මෙම ලියවිල්ල ඔබ අතට පත්වන විට බොහෝ විට මා ජීවතුන් අතර සිටිනු නැත.හොරේන් නාස්කුර් ෆෝකීර් රැගෙන ආවත් දූපතෙන් පිටවීමට කිසිසේත්ම කැමැත්තක් නොදක්වන කුසුම් මෙහි තනිකර දමා ඒමට මසිත සූදානම් නැත. මගේ අවසාන හුස්ම පොද වාතලයට මිශ්‍රවනතුරු ඈ සමඟින් සිට ඈ වෙනුවෙන් සටන් කිරීමට මසිත දැන් සූදානම්ය.

මගෙන් වරදක් සිදු නොවූ වගත් එයට මා වග නොකිව යුතු බවත් මම කවදාවත් නොපවසමි. මාකළ වරද වරදක් ලෙස සලකා මා හට සමාව භජනය කරන ලෙසද මා ඔබෙන් නොඉල්ලමි. මෙම ලියමනෙහි මූලික පරමාර්ථය වන්නේ ඔබෙන් සමු ගැනීමයි .හොරේන් ෆෝකීර් සමඟ දූපතෙන් පිට වීමට සූදානම් වෙයි. ඉතින් මා ඔබෙන් සමු ගන්නම් නිලීමා. කවදා හෝ පෙර මෙන් අපට එක්ව සිටීමට ලැබේවා යයි පතමි.

නිර්මාල්..

Hungry Tide by Amitav Gosh ඇසුරෙනි.

Image Source : http://rohinimitra.blogspot.com/2010/07/partitioned-tigera-study-of-amitav.html Accessed 1st of July 2011 7.33 PM [Online]

චතුර.... ( කැන්ඩි )

කැන්ඩිගේ මතක අහුර වෙනස් වූ වගයි..

2011-07-01T12:25:00.000+05:30

පාඩම් සහ ව්‍යාපෘති වැඩ කටයුතු එක්ක ටිකක් හිර වෙලා හිටියත්, ටිකක් නෙවෙයි දැන් නම් ගොඩාක් හිරවෙලා හිටියත් ඒ දේවල්ම විතරක් කර කර ඉන්න අමාරු නිසා මාස දෙකකට විතර පස්සේ මම බ්ලොගයට ගොඩ වදින්න තීරණය කළා. දැන් කවුරුවත් අහන්න යන්න එපා මම විභාගයට ව්‍යාපෘතියට භාර දෙන්න යන්නේ බ්ලොග් එකේ මේ පෝස්ට් එකද කියලා? දැනටමත් දැන් කර කර ඉන්න වැඩේ මොකක්ද කියලා දැකපු එක්කෙනෙක් මගෙන් ඔය දේ ඇහුව්ව. ඒත් ඉතින් හැම වෙලාවේම ඔය දේවල් කර කර ඉන්න බැරි නිසා තමයි මම මාස දෙකක් තුරාවට පැත්ත පළාතටවත් ආවේ නැති බ්ලොගය පැත්තට ගොඩ වදින්න හිතුවේ.

කාලෙකින් ලිව්වේනැති නිසා ලියන්න දේවල් නම් ගොඩක් හිතේ තියෙනව, ඒත් ඒ දේවල් ලියන්න කළින් මම කාලෙක පටන් කරන්න කියලා හිතාගෙන හිටපු තවත් දෙයක් ඉස්සෙල්ලම කරන්න ඕනේකියලා හිතුන නිසා ඒකට මුල් තැන දෙන්න තීරණය කළා. ඒ තමයි මම කාලෙක පටන් බ්ලොග් ලියන නම වෙනස් කරන එක. බ්ලොග් අවකාශයේ වැඩිය ජනප්‍රිය නොවුනත් දන්න කියන හැමකෙනාම මගේ බ්ලොග් අඩවිය හඳුනන්නේ කැන්ඩිගේ මතක අහුර සහ මම කැන්ඩි ලෙස.

මුලින්ම කැන්ඩි කියන නමින් මම බ්ලොග් එක පටන් ගන්න තීරණය කළේ මට පාසල් කාලයේ සියළුම යාළුවෝ කතා කළේ කැන්ඩි කියන නමිනුයි, ඒ මම නුවර පාසලක ඉඳලා නාලන්දයට ඇතුලත් වුන නිසයි, අදටත් පාසල් කාලයේ මිතුරන් චතුරට වඩා අඳුරන්නේ කැන්ඩිවයි. නමුත්කාලෙක පටන් මට හිතිලා තිබුන දෙයක් තමයි මගේම අනන්‍යතාවයෙන් මගේ අඩවිය ලියන්න පටන් ගන්න ඕනේ කියන එක, ඒකට පැහැදිලිවම හේතුවක් කියන්න බැරිවුනත් ගොඩාක් කාලෙක ඉඳලා මට ලැබුන සමහර කමෙන්ටු සහ විවිධ දේ නිසා මට මේ දේ හිතුනා කියලා කියන්නත් පුළුවන්. ලියපු සමහරදේවල් සමහර වෙලාවට ලියපු ආකාරයෙන් නැතුව වෙනත් වෙනත් ආකාරයන්ගෙන් තේරුම් අරගෙන ඒවාට ඒ ඒ ආකාරයේ මත පළ කරන්නත් ඒ නම හේතු වෙන්න ඇති කියලා මට හිතුන නිසාවෙන් තමයි මම මගේම අනන්‍යතාවයකින් ලියන්න පටන් ගන්න හිතුවේ.ඒක නිසා මම මගේ ඇත්ත නම ඒකියන්නේ මට අම්මයි තාත්තයි දීපු නමින්ම මගේ අනන්‍යතාවය පවත්වන් යන්න තීරණය කළේ.

විශේෂ හේතුවක් නැති වුනත් මේක මට හිතුන නිසා කරපු දෙයක් කියලා කියන්න මම ගොඩක් කැමතියි, මොකද මේකත් යම් දෙයකට බයේ කරපු දෙයක් කියල සහ වෙනත් කෙනෙකුට තවත් වෙනත් අදහසක් ඇතුව තේරුම් යන්නත් ඉඩක් තියෙන්න පුළුවන්. ලියන සමහර දේවල් වල සියළු තොරතුරු දෙන්න බැරිවුනහම එක් එක් අය ඒදේ කියවලා තමන්ගේ බුද්ධි මට්ටමට අනූවයි තේරුම් ගන්නේ.ඒක මට පැහැදිලිවුනේ අවසානයට ලිව්ව පොස්ට් කිහිපයෙන් එකකට ආපු අමුතුම අර්ථකථනයක් සහිත කමෙන්ටුවක් නිසයි,එක් එක් පුද්ගලයාගේ සිතන පතන විදිය වෙනස් කරන්න මට බැරි වුනත් ඒ දේවල් ඒ ඒ ආකරයෙන් හිතන්නට තුඩුදුන්න හේතු නැති කළහම ඒ ඒ දෙයෙහි ඇති සත්‍ය ඒ ඒ ආකාරයෙන් පෙනෙයි කියලා හිතන නිසා මම මේ නම වෙනස් කිරීම කරන්න හිතුවෙ.

නම වෙනස් කළත් ලියන්නේ මමම නිසා "වෙනදා වගේ මේ පැත්තේ ආව " ගිය නමින් පමණක් අහලා තියෙන දැකලා නැති ඒත් හොඳ යහළු බැම්මක් තියෙන මම ලියන දේ ගැන අදහස් කියන මගේ බ්ලොග් යහළුවෝ දෙතුන් දෙනා මාත් එක්ක ඉඳියිකියලා මම හිතන ගමන් තමයි මේ වෙනසට මුල පුරන්නේ..

මම රචනා කරපු අනෙක් සියළුම අඩවි වලත් නම් වෙනස් වෙන්නේ මේ විදියටයි.

කැන්ඩිගේ මතක අහුර = චතුරගේ මතක අහුර..
කැන්ඩිගේ තොරතුරු තාක්ෂණ පන්තිය = චතුරගේ තොරතුරු තාක්ෂණ සිප්සල..
කැන්ඩිගේ ඇසින් = චතුරගේ තෙවැනි ඇසින්.......

The Story of Candy = The Story of Chathura..

Picture Source : http://www.flowcrete.com/OurNews/Flowcrete_Launch_New_Flooring_Website.aspx Accessed on 01 st July 2011, 11.22 AM [Online]

චතුර....( කැන්ඩි )

අපූරු ආයා....

2011-04-09T10:47:00.001+05:30

China Smack 2010 Web Site,[Online],Available :http://http://www.chinasmack.com/2008/stories/new-rules-for-nanny-in-shaanxi-province.html/[Accessed 09 April 2011]

හදිසියේම දුරකතනය නාද වන්නට විය.වෙනදා මෙන්කවුරුන් හෝ ඇවිදින් එයට පිළිතුරු දෙන තෙක් මම බලා සිටියෙමි. එයට පිළිතුරු දීමට ගොස් පොඩි පුතේ ඕක ගන්නකෝ මම එනකන් ,පොඩ්ඩො ඕක බලනවකෝ යන විධානයන් දෙක දිනපතා ඇසීමට මා අකමැතිය.වෙනදා මෙන් අම්මා වහාම දුරකථනයට පිළිතුරු දුන්නාය. පොඩි පුතේ ජානි අක්කට පොඩි හදිස්සියක් කියලා මට එන්න කිව්වා ගිහින් එන්න යමුද පොඩ්ඩකට, මට වැඩක් තිබුණත් අම්මාට බකීමට නොහැකි නිසා මම අම්මාට හා මම ඇඳුමක් දාගෙන එන්නම් කියා කාමරයට වැඩුනෙමි. විනාඩියට දෙකකට වෙනත් ඇඳුමකට බැසගත් මා අම්මා සමඟ ජානි අක්කගේ නිවසට යාමට පිටත් වුනෙමි.

ජානි අක්කා මගේ ඥාතී සොහොයුරකුගේ බිරිඳයි. විධායක ශ්‍රේණියේ රැකියාවන් කරන ඔවුන්ගේ නිවෙස තිබෙන්නේ අප නිවසේ සිට පැය කාලකින් පමණ ළඟා විය හැකි දුරකින්ය. නමුත් ඒ වාහනයකින් යනවා නම්ය. ඔවුන් දෙදෙනාගේම පවුල්වල පිරිස පදිංචිව සිටින්නේ විදේශයන් හි නිසා ඔවුන් දෙදෙනාට වැඩිහිටිකමට ඥාතී කමට මිතුරු කමට් සැම විටම ළඟින් සිටින්නේ අපේ අම්මාය. තවම උදේ දහය පමණ නිසා මේ වේලාවේ ඇයට ඇති හදිසි ප්‍රශ්නය කුමක්දැයි මට හෝ අම්මාට සිතා ගත නොහැකි විය.

අප නිවසට ගොඩවන විට ඇගේ ආයා හඬමින්ද ඇය අටමසක් වයසැති බිළිඳු පුතු නලවමින්ද සිටියෝය. මොකද පුතේ වුනේ කියා අම්ම ඇසුවාය. මේ බලන්නකෝ නැන්දේ කියා ජානි අක්ක තොර තෝන්චියක් නැතුව ගලා ගිය ඇයගේ කතාව ආරම්භ කළාය. ඇය කී පරිදි කතාව මෙසේය. ඊට පෙර මම මේ ටිකද කියන්නෙමි, ඒ මෙය කියවන ඔබට අගක් මුලක් නොතේරෙන තත්වයකට පත් විය හැකි නිසාය. විධායක ශ්‍රේණියේ රැකියාවක් කරන නිසාවෙන් ප්‍රසූතිය සඳහා ලැබී තිබුන නිවාඩු අවසන් වූ වහාම ඇයට රැකියාවට යාමට සිදු වූ නිසා මීට මාස දෙකකට පෙර ඇය රැකියාවට ගොස් පැමිණෙන තෙක් දරුවා බලා ගැනීමට ආයා කෙනෙක් සේවයට ගත්තාය. අසල්වාසී නිවසක තරුණියක් වූ ඇයට ජානි අක්කා දරුවාට සහ එම තරුණියට කෑමද සියළු දේද පිළියෙළ කරදී උදෑසන රැකියාවට පිටත් වී යන්නීය. ආයාට කිරීමට තිබුනේ ඇය රැකියාවට ගොස් එනතුරු කවා පොවා දරුවා බලා ගැනීම පමණි, දරුවාගේ දිනපතා රෙදි සේදීම ආදී කටයුතුද ජානි අක්ක රැකියාවට ගොස් පැමිණි පසු ඇය අතින් සහ මගේ ඥාතී සොයුරා අතින් සිදු විය.

ජානි අක්කා කී කතාව මෙසේය මෙහි සමහර ස්ථාන වලදී මට නම් සිනහා නොවී සිටීමට බැරි විය.

දරුවා උපන් දා සිට සෑම දෙමව්පියෙකු මෙන් මේ යුවලද අදාල සායනවලට මාසිකව සහ භාගී වී වෛද්‍යවරුන් හමු වී දරුවාගේ වැඩීම නිසි පරිදි සිදුවේ දැයි පරීක්ෂා කරවාගෙන ඇත.

ජානි අක්කා නැවත සේවයට යනතෙක් ඇයගේ පොඩි පුතුගේ වර්ධනය හෝ සෞඛ්‍ය තත්ව්ය නොවෙනස්ව සාමාන්‍ය ආකරයටත් වඩා හොඳින් තිබී ඇත. නමුත් ඇය සේවයට ගිය පසුගිය මාසදෙකෙහි දරුවාගේ වර්ධනය පෙර මාස වලදී මෙන් යහපත් ආකාරයෙන් සිදු වී නැත. දරුවා කිහිප වරක් රෝගී තත්වයන්ගෙන්ද පෙළී තිබිණ. පසුගිය දිනෙක ඇය වෛද්‍ය වරයා හමුවූ මොහොතක දරුවාට ලබා දෙන ආහාර ක්‍රමවත් කළ යුතු බවත් නිසි පරීදි දරුවා පෝෂණය කරන අයුරු දැන ගන්න ලෙසටත් ඇයට උපදෙස් ලැබී තිබේ. ඉන්පසුව සියල්ල සූදානම් කර රාජකාරියට යන ඇය හට යම් සැකයක් පහළ වී ඇත. ඇයගේ සැකය නිසා රාජකාරියට පිටත්ව ගිය ඇය සිය සේවා ස්තානයේ මඳ වේලාවක් රැඳී සිට නිවාඩු දමා හදිසියේම නිවසට පැමිණ තිබේ. එවිට දරුවා හඬන ශබ්දය ඇසී ඇය දරුවා නිදන කාමරයේ ජනේලයෙන් ගෙතුලට එබී බලා ඇත. එවිට ඇය දැක තිබුනේ මවකට නිම්හිම් නැති කෝපය දනවන දර්ශනයකි.දරුවා ඇඳේ පසෙක හඬමින් සිට ඇත. අටමස් වියැති බිළිඳා අත විස්කෝතුවක් තබා දරුවා ඇඳේ පසෙකට කර ඇය ඇඳේ මුනින්තලාව ඇයගේ ජංගම දුරකථනයෙන් ඇයගේ පෙම්වතා සමඟ හෝ වෙනත් අයකු ලෙස උකුළු මුකුළු පාමින් කතා කරන අතර තුර දරුවාගේ කිරි බෝතලයෙන්ම එයටම මුව තබා ඇය කිරි බිබී සිට ඇත. එය දුටු ජානි අක්කා කෝපයෙන් දොර ඇරගෙන ගොස් ආයාට බැන ඒ අතර තුරදී අම්මා අමතා ඇත.

අවසානයේ ආයා කෙසේ හැසිරුනත් වෙන කුමක් කළත් පළක් නොවන හෙයින් ඇය හට ඇයගේ වේතනය ලබා දී පිටත් කිරීමට සිදු විය.රාජකාරියට වඩා දරු සම්පත ලොකු නිසාවෙන් ජනි අක්කා තවත් මාසයක නිවාඩු අනුමත කරවාගෙන විශ්වාසවන්ත අයෙක් ලැබෙන තෙක් ඇය නිවසේ නතර වීමට තීරණය කළාය.

ඔබත් බිළිඳෙකුගේ දෙමව්පියෙක් නම් සහ ඔබගේ දරුවා පිටස්තරයෙක් සමඟ රඳවන වා නම් මීට වඩා ඔබගේ දරුවා කෙරෙහි සැලකිලිමත් වන්න. සැකයක් ඇති කර නොගත්තත් එම පුද්ගලයා නිසි පරිදි සිය සේවය ඉටු කරනවාදැයි ඒ පුද්ගලයාට නොදැනෙන සේ විමසා බලන්න. මෙහිදී වැදගත් වන තවත් කරුණක් වන්නේ පුද්ගලයෙකු සේවයට ගැනීමට පෙර එම පුද්ගලායා කෙබඳු චරිතයක් දැයි සොයා බලන්න. අවසානයේ යමක් සිදු වී එයට පිළියම් සොයනවාට වඩා සිදුවීමට පෙර වලක්වා ගැනීම යහපත්ය.

කැන්ඩි....

අවසාන මොහොතේ දුටු ඥාතියාණෙනි ඔබට නිවන් සුව...!!!!

2011-04-03T18:43:00.000+05:30

Flicker By Sarah Sad and Beautiful Collection[Online],Available:http://www.flickr.com/photos/sadandbeautiful/3549518115/in/photostream/[Accessed [Accessed 2 April 2011]

නිවසට ආ නාඳුනන අමුත්තකු පැවසූ දෙයින් මම පුදුමයට පත් වීමි. ජීවිතයේ කෙදිනකවත් අසා නැති ජීවිතයේ කෙදිනකවත් දැක නැති අඩුම තරමේ මෙළොව ළඟ නෑ කමක් ඇති නුඹ වන්නෙක් ජීවත්ව සිටීදැයි නොසිටි මා හට අමුත්තාගේ පණිවුඩය පුදුමය දනවන්නක් විය. ඔබගේ වියෝව ඇසූ මා හට පළමුව දුකක් හෝ සතුටක් ඇති නොවිනි, මා සිත තුල ඇති වූයේ හිස් බවකි. කෙඳිනකවත් අසා නැති ඔබ ගැන සියළු තතු හෙළිවන්නට විය.

අපගේම වූ ඔබ මින් විසිපස් වසරකට පෙර ජීවත් වූ ආකාරයත් තමන්ගේ වූ කෙනෙකුට කළ කී දෙයත් මා හට අසන්නට ලැබුනි. කිසිදා නොදුටු ඔබ ගැන ආදරයක් වෙනුවට මා සිත ප්‍රථම වරට ජනිත වූයේ පිළිකුලකි. නමුත් කිසිදා නුදුටු කිසිදා නොඇසූ ඔබගැන ඔබ ඒ දේ කළේ ඇයිද යන්න ඔබේ සිතැඟි නොඅසා ඔබ ගැන වෛරයක් ජනිත වීමට මාසිත ඉඩ නොදුනි. නමුත් කොතරම් බැහැර කරන්නට හැදුවත් මුලින් ඇති වූ පිළිකුළ නම් සිතෙන් ඉවත් කිරීමට මා හට නොහැකි විය. කොතරම් අමතක කර දමන්නට වීරිය කළත් අවසානයේ සිතේ කොනක පැලපදියම් වූ එය නුදුටු ඔබ ගැන නිතරම මසිත ඇති කළේ ඔබ ගැන පිළිකුල් සහගත සිතුවිලිය. සියල්ල දැන ගත් පසු මගේ සිත මගේ ගමන වැලැක්වීමට තැත් කළත් මින්මතුවට ඔබ ගැන සෙවීමට මීට වඩා කාරණාවක් නොවේ යයි සිතේ මුල්ලක වූ තවත් සිතුවිල්ලක් කෑ ගසා කී හෙයින් ඔබ දැකීමට යන ගමන වැලකුනේ නැත.

වසර තිහක පමණ කුරිරු අතීතයකින් පසුව කිසිදා අපගේ කිසිවෙක් පය නොගැසූ ඔබගේ ප්‍රතාපවත් ගෘහයේ දොරකඩට මම පැමිණියෙමි. මා වැන්නකු සිටී දයි නොදැන සිටියද මා හට පරවේණීව උරුම වී තිබූ බාහිර ස්වරූපය නිසා ඔබගේ සමීපතමයින් ලෙස ඔබ වැළඳගත් ඔබගේ සමීපතමයින්ට මා හඳුනා ගන්නට හැකි විය. ඔබ ගැන පිලිකුල් සහගතව සිතූ මගේ සිතිවිලි ගොන්නත් සමඟ වසර තිහක පමණ නොදත් අතීතය මා ඉදිරියේ දිග හැරෙන්නට විය. සත්‍ය නොපැවසුනද මා හට සත්‍ය පසක් වන්නට විය.එහි සැබෑ ස්වරූපය මා හට දර්ශනය වන්නට විය. එය එසේ වන්නට වන්නට පෙර සිතේ කොනක වූ ඔබ ගැන වූ පිළිකුල නැවත දළු ලා වැඩෙන්නට විය. ඔබ කල වරද ඔබගේ සමීපතමයින් සැඟවීමට උත්සාහ කළේ ඒ දේ මා උපත ලැබීමට සිදු වූ හෙයින් සමහර විටෙක අවසන් මොහොතේ හෝ ඔබ කරා පැමිණෙන්නට මා හට සිත් දුන්නේ ඒ පෙර වැරදි නොදත් නිසා යයි සිතන නිසා බව ඔබගේ සමීපතමයි ව්‍යංගයෙන් පැවසූ දෙයිනුත් මා ඉදිරියේ ඔවුන් මුව ඇඳි ඒ සැඟවිය නොහැකි සිතුම් නිසාවෙනුත් නිසැකයෙන්ම පසක් වන්නට විය. එය එසේම වන්නට ඉඩ හැරීම විනා එය නිවැරදි කිරීමට මා සිත ඉඩ නොදුන්නේ සත්‍ය දැන ගැනීමට මසිත තුල වූ බලවත් කුහුල නිසා විය හැක.

ඔවුන් පැවසුයේ සත්‍ය නොවුනත් තවදුරටත් එහි රැඳුන මා හට සත්‍ය වසන් කිරීමට ඔවුන් හට නොහැකි විය. මෙයට තිස් වසරකට පෙර ඔබ ජීවත් වූ ආකාරය කෙතරම් අසාධාරනද යන්න ඒ දේ අසා නැවත නැවත සිතෙන්නට විය.අවසානයේ ඒ දේ එසේ වූවද ඔබගේ කතාවද ඇසීමට මා සූදානම් වීමි. ඔබගේ කතාවද මා ඉදිරියේ දිග හැරෙන්නට විය. වසර විසිපහකට පෙර ජීවිතයේ කෙදිනකවත් සමාව දිය නොහැකි වරදක් කර සමීපතමයින් ලෙස තෝරා ගත්තවුන් සමඟ ඔබ ගෙවුනු වසර විසිපහ ගත කළ අන්දම මා ඉදිරියේ දිග හැරුනි.

ඔබ කර ඇත්තේ කෙදිනකවත් සමාව දිය නොහැකි වරදක් වූවද වසර විසිපහක් මුළුල්ලේ ඔබට ලැබුන දඬුවම සැර වැඩිද කියා ඔබගේ ජීවනාන්දරය ඇසූ මට සිතුනි. ඔබ සියළු වරද කර ඔබ හා සමීප කර ගත්තවුන් ඔබගේ දෙයින් ඔබ දුන් දෙයින් ඔබගේ විසල් බූදලයෙන් ජීවත් වුනද අවසානයේ ඔබ හා ජීවිතයේ අවසාන කාලය ගත කිරීමට ඔබ සමඟ ඉතිරිව ඇත්තේ ඔබගේ වයෝවෘධ සොහොවුරිය පමණි. විසිපස් වසරකට පෙර කළ වැරදි ඔබ හට මෙළොව දීම දිට්ඨ ධම්ම වේදනීය ලෙස විපාක දී ඇත. විසි පස් වසරක්ම ඔබ ජීවිතය ගෙවා ඇත්තේ තමන් කළ වැරදි වලට ප්‍රතිවිපාක ලෙස ලැබූ දේ නිසා මහත් වූ සිත්තැවුලෙනි.ඒ දේ කරන විට ඔබට එසේ වේ යයි ඔබ කිසිදා නොසිතන්නට ඇත.ඔබ හා ඒ දේ හිදී සමීපතමයින් ලෙස සිටිය වුන්ට ඔබට වඩා ජීවිතය දඬුවම් ලබා දී ඇත.අවසානයේදී පිළිකුලක් ලෙස ඉතිරිව වෛරයක් බවට පත්වන්නට තිබූ ඔබ කෙරෙහි වූ ඒ සිතුවිල්ල ඔබ ගැන අනුකම්පාවක් දයාවක් බවට පත් විය.

ඔබ ජීවත්ව සිටියදී මා හට ඔබ සිටි තත්වය දකින්නට ලැබුනා නම් ඔබගේ ජීවිතයට මීට වඩා යහපත් වාසනාවන්ත අවසානයක් ළඟා කර දෙන්නට ඉඩ තිබුනා නේද යන්න පමණක් මගේ සිතේ ඉතිරි විය.

අවසාන මොහොතේ දුටු ඥාතියාණෙනි ඔබට නිවන් සුව...!!!!

කැන්ඩි....

සයිබරයේ ආචාරධර්ම..

2011-04-02T12:51:00.000+05:30

අන්තර් ජාල භාවිතයේදී අප සන්නිවේදනය සඳහා නොයෙකුත් Messenger මෘදුකාංග භාවිතා කරන්නෙමු. උදාහරණ වශයෙන් Skype, Yahoo Messenger, Google Talk ,Windows Live Messenger ,OOVOO වගේ ඒවා කියන්න පුළුවන්. නමුත් ඒවා භාවිතය ගැන අප නිසිලෙස දැනුවත් වූවත් ඒවා භාවිතයේදී ඒවා නිසි ලෙස ක්‍රියාවට නංවනවාද යන්න නම් සැකයක් ඇත.මන්ද යත් බොහෝ දෙනෙක් මේවා භාවිතා කළත් ඒවායේ පහසුකම් ගැන දැන ගත්තත් ඒවා භාවිතයේදී ඒ දේවල් ක්‍රියාත්මක කරන්නේ නැහැ. තවත් එක් කරුණක් වන්නේ තවත් සමහරු මේ දේ මේකයි කියලා දැනගෙන හිටියත් ඒ දේවල් ගැන නොතැකීමයි.

අප සැබෑ ලෝකයේදී අනෙක් කටයුතුවලදී අනුගමනය කරන ආචාරධර්ම විධි මෙහිදී යොද නොගන්නා එක තමයි මෙහිදී ඇති ප්‍රදානතම ගැටළුව. සරල උදාහරණයක් වශයෙන් කියනවා නම් සාමාන්‍යයෙන් අප කාර්යාලයකදී වෙනත් පුද්ගලයෙකුගේ කුටියකට ඇතුළු වීමේදී එයට කඩා පනින සිරිතක් නැත. සාමාන්‍යයෙන් පිටින් සිට දොරට තට්ටු කළ පසු එයට පිළිතුරක් ලැබුනහොත් ඇතුලට යාම තමයි අපගේ සිරිත. මේ වගේ සරල දෙයක් සරල හොඳ පුරුද්දක් අප සයිබරයේදී ක්‍රියාත්මක කරනවාද යන එක ලොකු ගැටළුවක්.

මම කළින් සඳහන් කළ Messengers හි තමන් ගේ වැඩකටයුතු හා කාර්ය බහුලත්වය අනූව Status යන එක Busy Mode දමා තිබෙන්න පුළුවන් .ඒ අවස්ථාවල අප ඒ පුද්ගලයෙක් හා සංවාදයක් ආරම්භ කිරීමට ප්‍රථම අඩුම තරමේ මම කතා කරන්නේ මේවගේ දෙයකට ඔබ කාර්යබහුලද මේවෙලාවේ කියා විමසන්න තරම් ආචාරශීලී වන්න.පෙරකී ආකාරයෙන් Busy Mode කර තිබේ නම් ඔබ සංවාදයක් ආරම්භ නොකර ඉන්නවානම් වඩා හොඳය. මන්දයත් පෙරකී පුද්ගලයා එසේ කර තිබෙන්නේ සත්‍ය වශයෙන්ම ඔහු කාර්යබහුල හෝ එම ස්ථානයේ පරිඝනකය ඉදිරිපිට ඔහු නොමැති නිසා විය හැක. ඔබට සංවාදය ආරම්භ කිරීමට අවශ්‍ය කාරණය ඉතා හදිසි එකක් නම් ඔබගේ අවශ්‍යතාවය සඳහන් කර පෙරකී ආකාරයෙන් ඔහු හෝ ඇය කාර්යබහුලද කියා විමසීමට තරම් ආචාරශීලී වන්න.

ඔබ තවත් ආකාරයකින් අනුන්ට බාධා කර නිදහසට කරුණක් ලෙස මෙසේ කියන්නට පුළුවන්. " ඔබ ඔය තරම් කාර්යබහුලනම් ඇයි ඔබ online ඉන්නේ කියා " එසේ අසන උදවියද නැත්තේ නොවේ. මතක තබා ගන්න ඒ පුද්ගලයා එහි රැඳී සිටින්නේ ඔහුගේ කාර්යය කරන වෙනත් අයෙක් සමඟ සන්නිවේදනයට පහසු නිසා විය හැක. එම පුද්ගලයාගේ online list එකේ ඉන්න එකම පුද්ගලයා ඔබ පමණක් යයි කොයි විටෙකවත් සිතා වැඩ කටයුතු නොකරන්න.

ඔබට යම් පුද්ගලයෙක් දිගින් දිගටම මෙසේ කරදර කරයි නම් ඔබට එම පුද්ගලයා Block කිරීමේ පහසුකමද බොහෝ Messenger සේවාවන් විසින් ලබා දී ඇත.

ඔබ කෙනෙකුට ආචාරශීලී වනවානම් අනෙක් පුද්ගලයිනුත් ඔබට ආචාරශීලී වනවා ඇත.

කැන්ඩි....

ඇත්තටම උඹට යාළුවෝ ඔච්චර තිත්තද..?

2011-03-30T19:37:00.002+05:30

ෆෝන් ඕෆ් කරලා
චැට් බ්ලොක් කරලා
ගෙදරට ගත්තත් උත්තර නෑ
කිසිම කතාවක් නෑ
හුඹහට වැදුන සර්පයා වගේ
උඹේ ඔලුව ඉදිමිලාද
අඟක් මෝදු වෙනවද
ඇත්තටම උඹට යාළුවෝ ඔච්චර තිත්තද..?

ඇඳක් උඩට වෙලා පොතක් කියවන්න
නාන කාමරේට වෙලා සින්දු කියන්න
ගහක් උඩට නැගලා ගෙඩියක් කන්න
ආදරී ඉස්සරහින් වාඩි වෙලා බ්ලොග් ලියන්න
වහලේ උඩට නැගලා අහස බලන්න
සීලිමට වෙලා නිදා ගන්න
අස්මඬලට නැගලා වටේ බලන්න
ඇලේ බැහැලා මාළු අල්ලන්න
වෙලට බැහැල මඩ ගාගන්න
තණ බිස්සේ නිදියගෙන කල්පනා කරන්න
ගඟබොඩ ගිහින් කුරුම්බ බොන්න
සිරියගේ ගොටුපිට්ටු කන්න
අම්මට කියලා ඔළුවට තෙල් දා ගන්න
ආච්චි අම්මගේ ඔඩොක්කුවේ ඔළුව තියන් ඉන්න
නැන්දගේ සව් දොදොල් කන්න
ලොකු අම්මත් එක්ක පන්සල් යන්න
සීයගේ වීර කතන්දර අහන්න
අයියගේ දුව වඩාගෙන වදුරො පෙන්නන්න යන්න
අල්ලපු ගෙදර කලූට බැල්ම දාන්න

තියෙන දවස් ටිකත් මම උඹලගේ හිස් වැඩ බලන්න එන්න ඕනෙද..?

කැන්ඩි....

අකීකරු මගෙම හිත ..

2011-03-30T02:04:00.001+05:30

Space Collective 2011,Self-Evolving personal cargo Web Site,[Online],Available:http://spacecollective.org/SelfEvolving/4609/The-Extended-Mind[Accessed 30 March 2011]

තරහවක්

ආදරයක්

අනුකම්පාවක්

ලැජ්ජාවක්

එකවර ඇති වුනත්

මේ දේ මෙහෙමයි කියලා තේරුම් ගත්තත්

ආය බලන්නේ නෑ කියලා නීති දැම්මත්

මේක කරන්නේ නෑ කියලා පොරොන්දු වුනත්

කිසිම දෙයක් ගණන් නොගෙන හිටියත්

දුක යටපත් කරන් හිටියත්

වෛරය මැඩ ගත්තත්

කෙනෙක් ගැන දුක හිතුනත්

හොඳක් කළත්

නරකක් කළත්

හැමදේටම නීති දැම්මත්

හැමදේ ටම සීමා පැනෙව්වත්

හැමදේටම පොරොන්දු වුනත්

ලද සැණින්

නිදහස සොයා යන

අකීකරු මගෙම හිත

මෙල්ල කරමි මම අද සිට

කැන්ඩි....

ස්කූල් වෑන් එක..

2011-03-29T12:08:00.000+05:30

Prime Radio SriLanka 2010, Prime radio Web Site,[Online],Available :http://www.primeradio.lk/news/2010/11/21/special-license-to-school-vans/[Accessed 29 March 2011]

ඉස්සර ටිකක් පොඩි කාලේ කැන්ඩි කරපු සමහර වැඩකටයුතු හින්ඳා සහ කැන්ඩි ඉස්සර හැසිරිච්චි විදිය හින්ඳා කැන්ඩිගේ අම්මට කැන්ඩි ගැන ලොකු බයක් හිතේතිබ්බලු.මේකා තනියම යැව්වොත් රස්තියාදුකාරයෙක් වෙනවා කියලා හිතිච්චි හින්ඳමද කොහෙද කැන්ඩිගේ අම්මා නීතියක් පැනෙව්ව කැන්ඩිට කිසිදා තනියම ගමන් තහනම් ය කියලා, ඉතින් වෙන මොනවා කරන්නද දෙන දෙයක් කාලා ඉන්න එපාය ,කැන්ඩිට ඉතින් ඊට පස්සේ හැමදාම කවුරු හරි එක්ක මිසක් පන්තියකටවත් යන්න ලබුනේ නෑ. කොටින්ම කියනවනම් හිරගෙදර.

ඒක නිසා කැන්ඩිව ගේ ළඟින් යන ස්කූල් වෑන් එකේ නැතුව යැව්වේ කැන්ඩිගේ අම්මලාගේ ගමේ ඉඳන් ආපු ස්කූල් වෑන් එකක. ඒ වෑන් එකේ ඇන්ටියෙකුත් හිටිය නිසා තමයි වැඩිමනකුත් කැන්ඩිගේ අම්මා ඒ වෑන් එකට කැමති වුනේ. වෑන් එකේ ඇන්ටි කැන්ඩිගේ අම්මාගේ දුර නෑයෙක්. ඉතින් කැන්ඩිට ඔය වෑන් එකේ හම්බවුනේ ඉස්සරහම ආසනය නිසා ඉතින් වැඩිය බාලිකාවන්ගේ මූණු ටික බලාගන්නත් ගොඩාක් කාලයක් ගත වුනා,ඒත් ඉතින් මොනවා කරන්නද නෝ කතා නෝ සිනා ඇන්ටි ඉන්නවනේ.

ඇන්ටි මේ වෑන් එක කරන්නේ ඩ්‍රැයිවර් කෙනෙක් දාලා ඩ්‍රැයිවර්ට දවසේ පඩිය දීලා තමයි. ඔය වෑන් එකේම තමයි ඇන්ටිගේ දුවයි පුතයි ගියෙත්. ඔය දෙන්නත් හිටියෙ ඇන්ටිගේ වර් එක හිතට අරන් තමයි.කැන්ඩි වෑන් එකට ඇතුළු වුන කාලෙම තමයි ඇන්ටි අළුතෙන් වෑන් එකක් ගත්තෙත්.ඔය අළුත් වෑන් එකට අළුත් රියදුරු මහත්තයෙකුත් ආවා. ඉතින් ඔය අළුත් රියදුරු මහත්තුරු ගොඩ දෙනෙක් හැමතැනම පාරවල් දන්නේ නැහැනේ. මේ අළුත් රියදුරු මහත්තයත් එහෙම තමයි. ඔන්න ඇන්ටිට මේ රියදුරු මහත්තය කියනවා ," නෝනා මට හරියට හැරෙන තැන කියන්න." ඔන්න ඇන්ටිත් කියනවා " ඔය පාරෙන් රාජකාරුණා මාවතට දාන්න" ඔන්න ඉතින් අර රියදුරු මහත්තයා දහ අතේ හොයනවා රාජකරුණා මාවත ,හොයලා ආයෙත් අහනවා " නෝනා කොයි පත්තටද හැරෙන්නේ..?" ඇන්ටි ආයෙත් කියනවා " රාජකරුණා මාවත පැත්තට " ඔන්න ඉතින් මේ රියදුරු මහත්තය ටිකක් මූණ ඇඹුල් කරලා බැලුවම ඉස්සරහ හිටපු කැන්ඩි දකුණට අත දික් කරලා පෙන්නුවා, ඉතින් ඊළගට ආයෙත් මේ රියදුරු මහත්තයා අහනවා " නෝනා කොහෙටද හැරෙන්නේ " ඇන්ටිත් ඉතින් කියනවා, " සිරිධම්ම මාවතට " ඔන්න ඉතින් ආයෙත් කැන්ඩි අනාරාධිතවම පාර පෙන්නුවා.

ඔහෝම ඔහොම පාරහොයන් කැන්ඩිලගේ ඉස්කෝල පැත්තට එනකොට පටන් ගන්න වෙලාව පහු වෙලා, ඇන්ටිගේ දුවගේ පාසල වුනේ ගෝතා බාලිකාව, ඇන්ටිගේ පුතා ගියේ කැන්ඩිගේ පාසලේ සහෝදර පාසලට. ඔන්න ඉතින් ඇන්ටිගේ දුවයි පුතයි ඉතින් දැන් "මේ ඩ්‍රැයිවර් එක්ක ආවම හැමදාම මෙහෙම වෙයි "කියලා බැහැලා ගියා. ඔය දෙන්නම බැස්සට පස්සේ තමයි කැන්ඩිගේ පාසලට එන්නේ, ඔන්න ඉතින් කැන්ඩිවත් බස්සවලා යන්න ගියා,එදා හවසත් තවත් සතියක් විතර අර රියදුරු මහත්මයට පාර හුරු වෙනකනුත් ඔහෝම තමයි වුනේ. පඩි නඩි හේතු නිසා ඇන්ටිගේ වාහනයට එන රියදුරු මහත්වර වැඩිය කල් හිටියේ නෑ. ඉතින් ඔය විදියට රියදුරු මහත්වරු පස් හය දෙනෙක්ම මාරු වෙලා යන්න ගියා.

මේ රියදුරු මාරුව ඇන්ටිට ටිකක් අමාරු වෙච්චි නිසාවෙන් ඇන්ටි ඊළඟට ගත්ත තීරණය තමයි , ගෙදර දොරේ ඉඩම් කඩම් බලා හදාගෙන හිටිය ඇන්ටිගේ අන්කල්ව රියදුරු වැඩේට ගන්න එක. ඉතින් අන්කලුත් වැඩේට ආවා. අන්කල් කොළඹ ඉගෙනගත් කොළඹ නිතර ආ ගිය කෙනෙක් නිසා පාරවල් නම් වැඩිය ප්‍රශ්නයක් වුනේ නෑ.ඒත් ඉතින් ඔය පාගමනක් දවසක කලින් ඉස්කෝලේ ඇරිලා අන්කලුත් නොදන්න පාරවල් වගයක යන්න සිද්ධ වුනා, ඉතින් අන්කලුත් "මට හැරෙන තැන කියන්න" කිව්වම ඇන්ටි කිව්වේ " කුමාරතුංග මුනිදාස මාවතට හැරෙන්න" " රාජකරුණා මාවතට දාන්න" වගේ දේවල්. ටික වෙලාවක් මේක අහන් ඉඳපු අන්කල් මෙහෙම කිව්ව " මම ඔය මල ඉලව් පාරවල් දන්නේ නෑ, මට හැරෙන පැත්ත කියනවා " ටික වෙලාවක් " වමට හැරෙන්න " "දකුණට හැරෙන්න " කියපු ඇන්ටි ටික වෙලාවකින් ආයෙත් පරණ විදියටම පාර කියන්න පටන් ගත්තා, ඉතින් අන්කල් මෙහෙම කිව්වා,"මනුස්සයෝ මම ඔය නම් කට පාඩම් කරගෙන නෑ මට හැරෙන පැත්ත කියන්න කියලා" ඉතින් ආයෙත් ඇන්ටි වමට දකුණට උත්තරය දෙන්න පටන් ගත්තා. අන්කල්ට හැබැයි එක ප්‍රශ්නයක් තිබුණා ,ඒක තමයි අන්කල් ගොඩාක් කාලයක් වාහන එළවීමෙන් බැහැර වෙලා තමයි ඉඳලා තියෙන්නේ, ඒක නිසා එයාට වාහනය වැඩිය හුරු නැහැ. ඉතින් ටිකක් හෙමින් තමයි යන්නේ. ඒක නිසා ආයෙත් අර පරක්කු වෙන ප්‍රශ්නය ආවා.

ඉතින් ඔහෝම ටික දවසක් යද්දී පුංචි පවුල රත්තරන් කියලා කියන නිසාද කොහෙද ඇන්ටි ගාව සීට් එකේ හිටපු

ළමයි දෙන්නා පිටිපස්සට යවලා ඇන්ටිගේ දුවයි පුතයි ඒ සීට් එකට ආවා.ඔන්න ඉතින් දැන් තමයි හොඳම හරිය. අන්කල් ටිකක් හෙමින් එළවන නිසා ඇන්ටි මෙහෙම කියනවා" ආනන්ද ටිකක් ඇක්සලරේට් කරලා යමුකෝ " ටික වෙලාවකින් පුතා මෙහෙම කියනවා " තාත්තේ ඔය බ්‍රේක් එකෙන් නැතුව ඇක්සලේටරය පාගලා වාහනේ යන්කෝ " ටික වෙලාවකින් ඇන්ටිගේ දුව මෙහෙම කියනවා " තාත්තේ මට හවස පන්තියට යන්න පරක්කු වෙනවා ".. ඒත් සතියක් විතර යනකන් අන්කල් ඕවට උත්තර විදියට හිනා වෙන එක විතරයි කළේ. ඔහොම සතියක් විතර ගියට පස්සේ අර තුන්දෙනා අර විදියට කියන වාර ගණන වැඩි වුනා, තවත් සතියක් විතර යනකොට ඕක අහන් ඉන්න බැරි තරමේ මන්තරයක් වගේ වුනා, එක පාරටම දවසක් අන්කල් වාහනේ පාරේ පැත්තකට කරල නවත්තල මෙහෙම කිව්වා " තමුසෙලා මට මේ වාහනය එළවන්න දෙනවද ..? නැත්තන් තුන්දෙනා එක්ක මේ වාහනය අරගෙන යනවද ..?" . එදාට පස්සේ ඇන්ටි වෑන් එකේ යන එක අඩු වුනා, අන්කල් විතරයි ආවේ, අර දුවයි පුතයිත් කළින් හිටපු සීට් වලටම ගියා. අන්කල්ගේ පරක්කුවට විසඳුම විදියට වැන් එක වෙනදාට වඩා කළින් පිටත් වුනා.

ඔහොම අවුරුද්දක් විතර යනකොට ඇන්ටි එන එක නැත්තටම නැවතුනා. ඒත් ඉතින් නෑකම නිසා කැන්ඩිට පාසල් ජීවිතය අවසාන වෙනකන්ම යන්න සිද්ධවුනේ ඔය වෑන් එකේ . ඔය අතරේ කැන්ඩි සාමාන්‍යපෙළ කළා ඉහළින් උසස් ආකාරයෙන් සමත් වුනත් කැන්ඩිට ඉතින් පාසල් වෙනස් කරන්න උවමනාවක් නැහැනේ, ඒත්

ඇන්ටිගේ දුවනම් ගෝත බාලිකාවට සමු දීලා ආඩම්බරෙන් මිගාර මාතා පාසලට ඇතුලත් වුනා.ඒක නිසා ගමනත් වෙනදට වැඩිය දිග්ගැස්සුනා..

ඔය කියන කාලේ වෙනකොට කැන්ඩි හොඳ නමක් හදාගෙන හිටපු නිසා සහ කැන්ඩිගේ යාළුවා හිරාන්ව ගෙදරට විශ්වාස වන්ත වෙච්චි නිසාවෙන් කැන්ඩිට තනියම අමතර පන්ති යන්න නිදහසක් ලැබුනා. ඒත් හිරාන් එන්නේ නෑයි කියන දාට යන්න ලැබුනේ කළින් වගේ රියදුරු සමඟ අපේ හිරකාර වාහනේ සුපුරුදු පරිදි හිරකාරයා වගේ. උසස්පෙළ කරන අවධියෙත් ඉස්කෝලේ ගියේ වෑන් එකේ වුනාට අවසන් වසර වැඩිය ස්කුල් වෑන් එකේ යන්න ලැබුනේ නෑ, ඒ මොකද කියනව නම් මම කළින් රසායන විද්‍යාව ඉගෙන ගත්තු ගුරුතුමා වන අපේ නැසීගිය බුලත්සිංහල ගුරුතුමා කියන විදියට කැන්ඩිත් උසස්පෙළ අවසන් වසර කොළඹ ක්‍රමයට අනූව දවස් තුනක් පාසලටත් දවස් දෙකක් පුනරීක්ෂණ පන්තියටත් වෙන් කරලා තිබ්බ නිසාවෙන්.

හැබැයි මේ ස්කූල් වෑන් එක ගැන කියනවා නම් අන්කල් වෑන් එකට පස්සේ පස්සේ දැම්මේ අළුත් ටයර් වෙනුවට පරණ ටයර් අර කම්බිත් මතුවෙච්චි ඒවා, ඉතින් මාසයකට එක පාරක්වත් මේ වෑන් එකේ ටයරෙකක් බාලිකා විද්‍යාලයක් ඉස්සරහා බෝම්බයක් වගේ පිපිරෙනවා. .පිපිරෙන්න ටයරයකුත් නැත්නම් නවතින්න වෙන හේතුවකුත් නැත්නම් ඔය වාහනේට හැදෙන අනිත් ලෙඩේ තමයි බොයිල් වෙන එක.මම හිතන විදියට අන්කල් ඔය වාහනේට පස්සේ හයි කරලා තියෙන්නේ කටුගෙදරින් පන්නපු රේඩියේටරයක්.කරුමේ කියන්නේ ඔය බොයිල් වීමත් ඔය බෝම්බ පිපිරවීමත් ඉතින් සිද්ද්ධ වෙන්නේ නිකන් ස්ථානයක එහෙම නෙවෙයි .හන්දියක් මැද්දේ එහෙමත් නැත්නම් බාලිකා විද්‍යාලයක් ඉස්සරහා වගේ ස්ථානවල තමයි. වැඩිපුරම ඔය දේවල් සිද්ධ වුනේ කනත්ත බාලිකාව ඉස්සරහා.කැන්ඩියි අනිත් වෑන් එකේ ගිය කැන්ඩිගේ මිත්‍රයා වන කල්පගේ අදහසට අනුව ඔය වෑන් එක අක්ක වෑන් එකක් නෙමෙයි අයියා වෑන් එකක්. ඒකනේ බාලිකා විද්‍යාල ඉස්සරහටම යන්නේ නතර වෙන්නෙ. ඉතින් ඔය නැවතිච්චි වෙලාවට නිකන් ඉන්නත් බෑනෙ කට්ටියම එකතු වෙලා ඕක තල්ලු කරනවා, ඒත් ඉතින් වෑන් එක තල්ලු කරනකොට බාලිකාවෝ කිචි කිචි ගානකොට හිතා ගත්තැකිනේ කැන්ඩිටයි අනිත් පිරිමි ළමයින්ටයි හිතිච්චි දේවල්..

කැන්ඩි....